عودة متوقعة وقريبة للفنانة ياسمين صبري وزوجها رجل الأعمال أحمد أبو هشيمة، اصبح الأمر مؤكد بعد انتشار صورة لهما خلال الساعات الماضية على السوشيال ميديا، ياسمين صبري بعد فترة من الانفصال ومحاولة علاج الأزمات والمشكلات، عادت مرة اخرى لأبو هشيمة.
من وقت إعلان انفصالهما، رفضت ياسمين صبري الكلام عن زوجها السابق، ورفض أبو هشيمة إعلان سبب الطلاق في مقابلة تلفزيونية ليه، بس الاتنين كان واضح جدا إنهم ناويين يرجعوا لبعض.
ياسمين صبري دايما بتتكلم عن حبها للعيلة، الحب الكبير اللي جواها كان كفاية إنها ترجع تاني للإكس، اللي قالت عنه قبل كده إنه الشخص الصح اللي بيخليها مبسوطة.
رجع أبو هشيمة تاني لياسمين عشان يضحكها.. يخلق لها مساحة من التألق وتحقيق الأمنيات اللي كان دايما بتتمنى تحققها، ومحافظتها على أسرارهم خلته يرجع لها أسرع من المتوقع.
في شهر سبتمبر اللي فات طلعت ياسمين صبري مع صاحبة السعادة، ورفضت تتكلم عن حياتها الشخصية أوي.. بس ظهرت لابسة دبلتها تاني، وده خلى الجمهور يتأكد إنها رجعت لطليقها.
قبلها بشهر أتكلم أبو هشيمة عن الطلاق في برنامج “تفاعلكم” مع قناة العربية، وعلق على موضوع التايجر وقال: الشعب المصري دمه خفيف، و صاحب نكتة و أنا بشوف كل اللى بـ يتكتب عليا و بضحك.
برضه وقتها كان في صور متداولة لأماكن زاروها هما الاتنين في نفس الوقت، لدرجة إن الجمهور قعد يجمع الاختلافات والتشابهات بين الصور والمناظر الطبيعية اللي طالعة معاهم رغم إن كل واحد متصور لوحده.
ياسمين صبري وأبو هشيمة.. اتجوزوا فجأة في ٢٠٢٠ ومعملوش فرح بسبب الكورونا وقتها، وده بعد شهر من إعلان خطوبتهم، وفجأة برده انفصلوا، وقالت ياسمين في بيان ليها إن الانفصال حصل دون توضيح أسباب.
وفجأة برضه في شهر مايو اللي فات اتفقوا عالطلاق.. واتقال إنها هيفضلوا صحاب.. وخلصوا كل إجراءات الطلاق بهدوء .. بس طبعا ده مكنش كفاية
الجمهور عاوز يعرف معلومات أكثر، اتطلقوا ليه؟ يعني ياسمين مش هتسافر بره مصر كتير؟ مش هتركب طيارات خاصة، مش هتنشر صور من أماكن غالية ومليانة إبهار وفلوس فلوس فلوس.
بس الحقيقة إن ياسمين صبري مخرجتش من الجوازة دي ببلاش، وخدت مستحقات كبيرة من طليقها، ومبطلتش تسافر ولا تركب طيارات خاصة، بالعكس بقت بتظهر أكتر في مناسبات عالمية، وبتتصور مع فنانين وفنانات ومشاهير بره وجوه مصر.
بس الغريبة إنها لحد دلوقتي مرجعتش تمثل، كل شوية يطلع خبر إنها هتعمل مسلسل مع أحمد عز لا فيلم، لكن في النهاية هي من ساعة مسلسل فرصة تانية اللي اتعرض في رمضان ٢٠٢٠، ابتعدت عن التمثيل تماما، ومحدش عارف هترجع امتى،مستنيينك يا ياسمين ومبروك عليكي التايجر.
