محدش يقدر ينكر إن الزعيم عادل إمام تاريخه الفني يشرف مصر كلها وجميل أوي إن يكون نجم الوطن العربي في التمثيل من بلدنا بس اللي يشتت العقل إن واحد بيمثل يهز رئيس دولة عربية ويخليه يفكر إنه ينهي حياته ويخطط لكده بشكل ميتصدقش فعلًا، بسبب مسرحية “الزعيم” اللي تعتبر من الروائع في الأعمال المسرحية على مدار تاريخ مصر كله.
تفاصيل حكاية المحاولة اللي عملها الرئيس الليبي الراحل معمر القذافي عشان ينهي حياة عادل إمام بسبب المسرحية دي هنقولكم عليها في الفيديو ده، وكمان تفاصيل الخطة اللي كانت معمولة ومتخرش المية زي ما بيقولوا، ومين كان الضحية اللي دفع تمن نجاة عادل إمام ومصيره كان إيه؟.
تفكير غريب
كلنا عارفين إن الفن ده رسالة وترفيه يا إمام يضحكك ويفك عنك شوية يا إما يديلك رسالة بهدف يحفزك إنك تكون أحسن في حياتك عمومًا، لحد هنا الموضوع تمام ولو بصينا لأعمال عادل إمام على مدار تاريخه قدر يجمع بين الاتنين يعني ده واحد جازف بتاريخه واتحول من الكوميديا للتراجيديا وتقديم الأعمال الاجتماعية اللي بتقول حاجة من أول فيلم “الحريف” اللي يعتبر محطة مهمة في مشواره.
ومحدش بردوا هينسى “مدرسة المشاغبين والزعيم وشاهد مشافش حاجة” وكل المسرحيات اللي ضحكتنا ولسه بنتفرج عليها لحد دلوقي، لكن حكاية إن مسرحية تخلي زعيم عربي بحجم معمر القذافي يزعل أوي بسبب مسرحية الزعيم ويتقال إن عادل إمام بيقلده فيها وبيسخر منه طيب إزاي؟.
أنا الزعيم
عادل إمام قدم مسرحية الزعيم في نص التسعينات وكاو وقتها في عز قوته الفنية والمسرح شغال والسينما شغالة وكل حاجة بيقدمها بتكسر الدنيا فعلًا، بس مسرحية الزعيم، تعتبر أجرأ وأقوى عمل فني اتقدم على خشبة قدام الجمهور في تاريخ المسرح العربي وهي وقتها كانت بتتكلم عن شخصية وهمية لزعيم سياسي بيحكم بلده بس طبعًا الطريقة كانت ما بين الكوميديا والقسوة.
ويمكن أشهر إيفيه فيها كان بيقوله عادل إمام “أنا الزعيم” بس ده إيه علاقته بالعقيد الليبي معمر القذافي، كل القصة إن عادل إمام كان بيلبس في المسرحية لبس زي الزعماء الكبار وده اللي نقله الليبيين اللي اتفرجوا على المسرحية هنا في مصر للرئيس الليبي.
في حاجة في دماغه
ومعمر القذافي كان يقدر وقتها يتجاهل القصة كلها من أولها لآخرها ويقصر الشر وصباح الفل يعني، لأ ده الباشا حمقي أوي وخد الموضوع على صدره زي ما قال فنان الماكيير محمد عشوب، وقال كمان إن معمر القذافي عقله عقل طفل صغير وزعل جدًا عشان عادل إمام كان بيلبس نياشين وجاكت أبيض ويقلد نظرته وطريقة كلامه كل ده خلاه يحطه في دماغه ويخطط عشان ينهي حياة عادل إمام خالص.
وكان وقتها عشوب ليه صديق قريب من المخابرات والقيادة الليبية، قاله إن القذافي طلب عرض مسرحية “الزعيم” في ليبيا عشان يخلص على عادل إمام ويستخدم عشوب نفسه في الخطة دي، ووقتها كلموا الماكيير المشهور إنه يعرض المسرحية في ليبيا وده خلاه يكلم محمد حافظ مدير الفرقة في التلفزيون وقتها عشان يحضروا الترتيبات للسفر.
خطة جهنمية
وهوب زميله ده راح مبلغه بالخطة وقاله انت هتبقى يهوذا وهتجيبه كده تسلمه في ليبيا عشان معمر القذافي عاوز ينتقم منه خلي بالك فرد عليه وقاله ده شخصية عامة ومش أي حد والبلد يحصل فيها قطع علاقات دبلوماسية لو حصل الكلام ده>
يقوم يرد عليه ويقوله انت فاكر القذافي هيكون ليه يد ده هيأجر كام واحد كده ملهومش لازمة يعتدوا على عادل إمام ويخلصوا عليه وعادي ياخدوا بعد كده حكم زي القانون ما بيقول والموضوع ينتهي.
الرد والضحية
المهم محمد عشوب بدأ يتحرك عشان يوقف عرض المسرحية هناك بس معرفش يوصل لعادل إمام بس وصل لمدير الفرقة وقاله الخطة اللي معمولة وكمان وصل للضحية بتاع عادل إمام بقى وده هو عبدالله منصور واللي كان وزير الإعلام الليبي وعشان بيحب مصر أصدر قرار بإلغاء عرض المسرحية في ليبيا، عشان يفسد على القذافي الخطة بتاعته وكان جزاؤه إنه اتقبض عليه، وبالمناسبة عبدالله منصور ده لسه خارج من السجن من شهرين تلاتة كده بإفراج صحي عشان قضايا كده عندهم هناك ملناش دعوة بيها.
اكتبولنا في التعليقات هل فعلًا شايفين عادل إمام كان بيقلد القذافي في الزعيم ولو كانت خطة الرئيس الليبي نجحت كان إيه اللي ممكن يحصل؟.
