عرفنا جميعا خبر انفصال تامر حسني عن بسمة بوسيل بعد علاقة استمرت 12 سنة جواز وقبلهم سنتين ارتباط، وفي وجود 3 أطفال ما بينهم، وهو الخبر الذي حقق انتشار كبير على وسائل التواصل، بسبب الشعبية الكبيرة التي يتمتع بها نجم الجيل تامر حسني، وأيضا بعض الأزمات اللي لازمة علاقة تامر وبسمة خلال السنين الأخيرة..
يمكن إشاعات كتير طاردت تامر وبسمة من أول ما عرفوا بعض زمان واتقال إنهم متجوزين عرفي، وطول الوقت كان بيتقال إنهم مختلفين وهينفصلوا، وفعلا مرات منها بسمة أعلنت إنهم بيحضروا للانفصال فعلا، ولكن مسحت الكلام ورجعت فيه تاني، وفوق كل ده علاقة تامر بجيليله المغربية المثيرة للجدل، واللي بيتقال إن هي ورا أزمة انفصال تامر وبسمة، خصوصا إنها قالت إنه حب عمرها وإنها كانت على علاقة بيه أول جوازه.
بمجرد ما تم الإعلان عن انفصال تامر وبسمة، العيون كلها راحت ناحية جليلة، واللي ردت على الكلام ده وقالت فشل علاقة تامر وبسمة أنا ماليش دعوة بيه، أنا قافلة الموضوع ده من سنة.
ويمكن كتير من العلاقات في الوسط الفني مش بتعيش كتير، وعلاقة تامر وبسمة مثلا تعتبر من أطول العلاقات لأنها استمرت لمدة 12 سنة، ولكن قبلهم كان في علاقات بين نجوم تاني ومشاهير متكتبلهاش النجاح، منها اللي خلص بخلافات ومنها اللي خلص بالود زي بسمة وتامر.
من أشهر حالات الانفصال دي منة عرفة ومحمود المهدي، واللي كانت في 2022، وهما الاتنين خلال فترة علاقتهم وهما مخطوبين أو متجوزين سابوا بعض أكتر من مرة، وبعد ما العلاقة انتهت الاتنين هاجموا بعض واتهامات متبادلة بين الاتنين، ومنة كانت لسة خارجة من علاقة قبلها مع المدون علي غزلان.
وكمان في حالة حصلت في 2022 باردو، كان انفصال ياسمين رئيس وهادي الباجوري، واللي حصل بعد 7 سنين جواز، بسبب تصريح من الزوج قال فيه إنه معندوش مشكلة إن مراته تقدم مشاهد رومانسية فيها قبلات، وهي معلقتش على القصة دي وقتها، ولكن بعدها حصل الانفصال، بالتأكيد مكنش ده السبب ولكن ممكن يكون كان اللقطة الأخيرة، وفي تصريح ليها عن الموضوع ده قالت إن هي مكنش ينفع تعلق على الكلام ده وقتها لأنه كان زوجها وهي عارفة قناعاته.
من أشهر حالات الطلاق في الوسط الفني كان أحمد سعد وسمية الخشاب، واللي كانت علاقتهم في الأول سر وكشفتها ريم البارودي، وعاشوا في تبات ونبات، لحد مرة واحدة ما الدنيا اتقلبت وبدأت تظهر الحكايات، وسمية قالت إن هي عملت عملية عشان تشيل الطحال، وده لأن أحمد سعد ضربها جامد، وكان هينهي حياتها، وهو بقى قعد يقول عليها وهي تقول عليه، ورفعوا قضايا على بعض، وهي تكسب شوية وهو يكسب شوية، وأهو كل واحد راح لحاله، ولكن مش بالسهولة دي يعني.
عندنا كمان واحدة من الحالات اللي كسرت القلوب، وهي انفصال طارق العريان والفنانة صالة، علاقة طارق العريان وأصالة كانت من أنجح العلاقات في الوسط الفني، وخلف منها ولدين وهما آدم وعلي، واستمرت العلاقة دي لمدة 14 سنة، قبل ما يتم إعلان الانفصال في 2020، وكان سبب الانفصال إن طارق العريان بيعيش قصة حب مع عارضة الأزياء الأرمينية السورية نيكول سعفان.
عندنا كمان واحدة من أشهر علاقات الوسط الفني واللي انتهت بالانفصال كان علاقة غادة عادل ومجدي الهواري واللي حصل بينهم الانفصال في 2018، ويمكن هو كان بالنسبالها الأب والصديق والمدبر وكل حاجة، ولكن كان ده نفسه سبب الانفصال اللي حصل ما بينهم، رغم وجود 5 أولاد ليهم وهما محمد، عبد الله، مريم، حمزة، عز الدين، ولكن غادة بتقول إن الانفصال أحسنلهم وكمان ليها، لأنها حست إنها حرة، وبالرغم من كدة هما مازالوا بيحبوا بعض، وعلاقتهم محترمة.
