الفنانة والمطربة ماريتا الحلاني حديث الجمهور في مواقع التواصل الاجتماعي بسبب وقتها اللي كانت في مزرعة الحلانية وعملها لها باباها الفنان عاصي الحلاني.. عشان يفرح بيها على عريسها كميل أبي خليل.. طبعاً يوم زي ده أي عروسة بتستناه عشان تعزم كل حبايبها وصحابها عشان يفرحوا معاها.
طبعاً بما إنها نجمة وعاصي مشهور جداً قولنا هنشوف نجوم كتير جداً في الزفة بس اللي حصل عكس كده خالص ومفيش ولا نجم ونجمة حضروا.. يا ترى ده مقصود ولا هما معزموش حد ولو محدش حضر كده إيه السبب الحقيقي وراء كده.. طيب تعرفوا أصلا ماريتا الحلاني عرفت عريسها كميل أبي خليل امتى وإزاي أعجبوا ببعض كل ده وأكتر عقولكم على تفاصيله.
مفاجأة حلانية
العروسة ماريتا الحلاني ظهرت بأكتر من فستان وعملت كذا سيشن عشان تفرح من قلبها أصلها بتحب الفساتين واللي عرفناه بقى إنها قعدت شهور تجمع صور لتصاميم فساتين عشان يكون عندها مجموعة مميزة تقدر تعمل بيهم السيشن بتاعها وكمان فستان الفرح اللي صممه اللبناني إيلي صعب كان فيه تفاصيل كتير هي اللي اختارتها .
يعني كل حاجة جهزت ليها تمام التمام عشان ميكونش في ولا غلطة وطبعاً شوفنا أكتر من مناسبة ظهرت فيها ماريتا الحلاني يعني الحنة مرة وحفلة عملها باباها عاصي الحلاني مرة وظهرت بصور على حسابها في إنستجرام وكمان كان في فستان مخصوص وهي بتتجوز كميل أبي خليل في أبو ظبي لحد يوم الفستان الأبيض.
فستان أميري
تعرفوا إن إيلي صعب المصمم اللبناني المعروف جداً هو اللي صمم فستان رجوة آل سيف اللي اتزفت على ولي العهد الأمير الحسين بن عبدالله .. طيب هي ماريتا اختارته بردوا يصمم فستانها عشان هو ابن بلدها ومشهور جداً وكمان هي عاوزة تبقى أميرة في ليليتها الكبيرة وده اللي حصل عملها فستان أميري محصلش وعاصي الحلاني عمل الزفة في مسقط رأسه بلدة الحلانية في البقاع شمال لبنان.
واحتفلت ماريتا بعرسها مع جوزها كميل أبي خليل والكل شبه إطلالة ماريتا الحلاني بإطلالة الأميرات والفستان فيه تفاصيل رومانسية وأوراق مشغولة بدقة كبيرة بينت قوام ماريتا مع طرحة مطرزة بأوراق بيضاء كريستالية.
وبالنسبة للماكياج كان بتوقيع بسام فتوح واللي عنده مبدأ إن العروس تكون على طبيعتها، وده اللي عمله عشان يبرز جاذبية ماريتا، وكان الماكياج لايق على وش وبشرة ماريتا.. وبسام اتجه للألوان النيود الناعمة والبسيطة زي الوردي الخفيف وده من مجموعته الجديدة لعرايس 2023.. ومصفف الشعر طوني المندلق كان هو صاحب البصمة في تصفيف شعر العروسة عشان يومها الكبير يطبع أحسن حاجة.
تأثر عاصي الحلاني
بالفستان الأبيض اللون، دخلت ماريتا الحلاني على حفل الزفاف وهي ماسكة إيد ياباها وعلامات الفرح والسعادة على وشها وكانت بترقص بين صحباتها على أنغام أغنية شهيرة مطرب المهرجانات حسن شاكوش “انت بونبوناية”.. وكمان وغنت ماريتا مع باباها عاصي الحلاني، اللي غلبته دموعه أكتر من مرة، وقدمت ماريتا بردوا أغنية رومانسية لعريسها كميل.. وكمان تفاعل مع الحدث السعيد ده، أخوها الوليد الحلاني، وغنى أكثر من أغنية عشان يعبر عن فرحته بأخته ورقص الحضور على الدبكة اللبنانية والطبول.
لم يحضر أحد
اتفاجئنا كلنا إن زفة ماريتا الحلاني محضرهاش حد من الفنانين معقول واحد زي عاصي الحلاني رجب أعمال كبير ومطرب مشهور وعلاقاته بالفنانين والمشاهير قوية جداً يعمل فرح بنته من غير ما يعظم حد من الفنانين .. الناس استغربت بس ماريتا كانت كشفت السبب الرئيسي ورا اللي رتبوا ليه ده وقالت في مقابلة ليها ظهرت فيها مع عريسها قبل فترة من جوائزهم وقالت إنهم هيعملوا فرح تفرح فيه العيلتين مع بعض والصحابة القريبين منهم عشان تعمل ماريتا ألبوم ذكريات حلو مع العيلة شكلها كده ناوية تعمر زي باباها ومامتها .. طيب هي إزاي ماريتا عرفت عريسها أصلا وإزاي اتفقوا على الجواز؟.
طريق التعارف
حتى دي بردوا وراها قصة تخيلوا ماريتا قعدت تكلم كميل أبي خليل سنة كاملة من ورا شاشة يعني على النت وده مش تعارف عشان جواز لأ كان فيه بينهم شغل هي مطربة وهو ليه في إنتاج الأغاني والصلة متقاربة في الموضوع ده .. التعارف كان في 2020 وقت الأزمة العالمية وطبعاً في حالة إغلاق كامل ومتقابلوش غير بعد سنة كاملة وكان عشان شغل بردوا لكن القلب دق وقتها هي عجبته وهو عجبها.
وقالت أكتر حاجة عجبتني فيه عيونه وبدأ الكلام والتعارف في التليفون والمقابلات وكلها كانت صداقة اتطورت لإعجاب وبعدها اتفتح موضوع الجواز.. وبالنسبة الغيرة والمعجبات والمعجبين والكلام ده قالوا إنهم بيغيروا على بعض جداً لكنها الغيرة المحبوبة مش اللي فيها قفش وخناق وعقبل ضيق.. ربنا يسعدهم ويعشوا متهنيين في حياتهم وألف مبروك لماريتا وكميل.
