بناتي خط أحمر…قصف جبهة متبادل بين رانيا يوسف وطليق نادية الجندي

حرب كلامية اشتعلت بين الفنانة رانية يوسف وطليقها المنتج محمد مختار، بعد ظهورهما في نفس البرنامج والحديث عن مشكلاتهم الخاصة فمذا حدث وكيف دارت الحرب الكلامية بينهما؟

بتكذب و بتصدق نفسك .. و اللي بعتاك تقول الكلام ده ممثلة أفشل منك .. رانيا يوسف جابت أخرها .. و مش هتسكت عن أي كلمة قالها طليقها المنتج محمد مختار .. و اللي كان باين جدا انه جاي في نفس البرنامج اللي طلعت فيه رانيا علشان يحط عليها.

من بداية رمضان و رانيا يوسف عارفة تثير الجدل .. أو بمعنى أصح عارفة تكون تريند .. مطلعتش في مسلسل قالت بردو هكون موجودة طول رمضان .. و ده ذكاء منها .. بس حسبتها طلعت غلط المرة ديه ..

رانيا يوسف أول رمضان خرجت وقالت تصريحات كتيرة عن حياتها الشخصية .. و عن تربيتها لبناتها .. وانها المسئولة عنهم و بتصرف عليهم .. بعد ما تعبت من القواضي الخاصة بالانفصال … وان والدهم المنتج محمد مختار مش مهتم بيهم .. و مش بيصرف عليهم.

اللعبة هنا من محمد مختار انه عدا كذا يوم ولقيناه طلع في نفس البرنامج اللي طلعت فيه رانيا .. و كل كلمة قالتها رانيا هو مجهز ليها رد .. ده كمان بيعلي عليها في التريند ..

محمد مختار كذب كلام رانيا يوسف وقال بصرف على بناتي و ببعت ١٥ الف جنية كل شهر .. غير مصاريف الدراسة .. وكل حاجة بالمستندات.. و ان هو اللي عمل رانيا يوسف .. و لولا انه اتجوزها مكنش حد عرفها ..

وانه كان بيحب ينتج ل نادية الجندي و مينتجش ل رانيا يوسف.. لان نادية الجندي هي الحصان الكسبان بالنسبة ليه .. واشتغلوا مع بعض ٢٠ سنة نجحوا فيها سوا .. فهيروح لحد تاني ليه ؟!

تفتكروا محمد مختار يسكت لحد هنا … أبدًا .. لازم يجيب سيرة تريند حياة رانيا .. فستان البطانة .. واللي طبعا مش هيقول حاجة بخصوص رانيا .. لكن قال ان فستان البطانة أما لبسته بنته في المهرجان .. زعل جدا من الموقف .. بس معرفش ياخد رد فعل .. ( ده انتو مستحلفين ليها جامد أوي ) ..

طبعا الكلام ده مش هيعدي بالساهل على رانيا يوسف .. اللي شافت انه جاي البرنامج ومتحرض من نادية الجندي .. و انهم اتفقوا عليها خلاص

رانيا نزلت بوست بترد على كل كلمة قالها .. واللي هو تقريبا وصلة ردح على السوشيال ميديا .. وقالت ان مقامها أكبر من انها ترد عليه .. و انه ممثل فاشل .. واللي بعتاك أفشل منك .. و انه ميحاولش ياخد دور مش دوره .. و كنت فين طول ال ١٣ سنة اللي فاتوا مع بناتك كنت بردو زعلان .. لا ونعم الأب ..

وبخصوص فستان البطانة رد رانيا يعتبر قصف جبهة .. و قالتله كلام يضايق أي حد .. وانه بتاع مصلحته .. وكتبت كومنت قالت فيه ( ولما المدام مراتك كانت على طول بالبيبي دول في الأفلام مكنتش بتزعل .. ولا علشان كنت مستفيد ) ..

الحقيقي ان كلنا عارفين ان رانيا يوسف مبتخافش من المواجهة .. واللي بيقول عليها كلمة بتردهم عشرة … بس واضح ان محمد مختار كان عاوز يضايقها .. لكن مفيش حاجة واضحة و اقول ان نادية الجندي هي السبب .. اسمعوا مننا الحوار مش هيتقفل على كدة و الرد هيفضل مستمر