هو أول ما بدأ كان بيعمل أدوار الولد الروش،الذي بيظهر يقول إفيه و يضحك و يهزر، عمل دويتو مع أحمد مكي وكان يظهر في كل اجزاء الكبير الماضية.
و في أفلامه.. لكن حب يغير فكرة تقديم الدور التاني .. و بقاله كام سنة بيعمل حاجات راسية و تقيلة .. محمد شاهين عرف ينجح في أدوار الكوميدي و أدوار الدراما .. وقال ان حياته هتكون للفن و بس و مش هيتجوز تعالوا نعرف قصته ايه
الفنان محمد شاهين بدايته كانت من مسرح جامعة كلية التجارة.. و اللي نجح عليه و أخد جوايز كتير .. و حب يطور من نفسه و اشترك في ورشة المخرج خالد جلال … و قعد يقدم معاه كذا مسرحية .. لحد ما الحظ بدأ يلعب معاه .. و اشترك في أول مسلسل ليه ..
كان ست كوم ” تامر و شوقية ” .. و فعلا كان الحظ حلو معاهم كلهم .. لان أول جزء و تاني جزء نجحوا جدا .. و اللي منها خرج كمان أحمد مكي .
مكي و شاهين اتفقوا سواء بشكل مباشر أو غير مباشر إنهم هيكونوا سوا .. من أول ريسك عمله مكي و قدم الكبير أوي أول جزء .. و كان معاه شاهين .
و فضلوا مع بعض في المسلسل و الأفلام .. زي ما تقولوا كده مكي كان بيشوفوا تميمة الحظ بالنسبة ليه .. لكن فجأة مكي وشاهين مبقتش يقدموا حاجة مع بعض .
وكل واحد راح في حتة لواحده.. بس شاهين حب يغير فكرة الدور التاني اللايت اللي طالع يهزر .. أول يقول إفيه .. و بدأ يركز انه يقدم أنواع تانية مختلفة .. من ٢٠١٢ قرر يبقى شخصية تانية .. و قدم مسلسلات زي ” شربات لوز .. سيدنا السيد.. نيران صديقة .. السبع وصايا ” ومسلسلات تانية كتير .. عرف ينجح فيها ..
وفي رمضان السنة ديه نجح في تقديم دوره في مسلسل الهرشة السابعة.. المسلسل بطولة جماعية .. بس شاهين كان باين .. ومشاكل الزوج و الزوجة اللي بتحصل بعد الخلفة و الضغوطات الكتير اللي بيتحطوا فيها ..
و الجمهور فعلا انقسم فريقين بينهم .. واللي شايف انه مجني عليه .. و ناس تانية شايفة انه هو السبب .. حالة الجدل ديه تقول انه نجح في دوره …واللي يشوف شاهين في المسلسل يقول انه مر بمشاكل الجواز ديه
لكن المفاجأة انه مش متجوز .. و مش عاوز يتجوز .. وشايف ان الوقت عدا .. و محدش يقدر يستحمله بعيوبه و اللي بيحبه ايه واللي مش بيحبه ايه .. علشان كده قرر انه مش هيتجوز و هيفضل يشتغل و بس .
حظه في السينما مش قد كده .. أو مش زي نجاحه في المسلسلات .. قدم كذا فيلم .. بس لسه مفيش فيلم نقدر نقول عليه ان ده النقلة في حياة شاهين .. وهو من الفنانين اللي لا بيشاركوا في تريندات ولا عنده خناقات .. مركز في شغله .. و ده اللي مميزه بين جيله .
