تركت محمد رمضان من أجل عمرو سعد…مالا تعرفه عن درة

هي عنوان الشياكة، ولها طلة مختلفة في أي مكان تظهر به، لديها كاريزما خاطفة أمام الكاميرا،ولا تسعى للتريند..إنها النجمة درة .

الفنانة درة هي تونسية .. و درست في لبنان الحقوق و بعد كده الماجستير في العلوم السياسية.. بس الفن بيجري في دمها .. بدأت في المسرح واشتركت في مسلسلات برة. .. بس تاريخها الفني نقدر نقول زاد أكتر في مصر .. وبدأت من ٢٠٠٧ .. أما ظهرت مع يوسف شاهين في فيلم هي فوضى ..

دور مساحته كويسة و علشان عرفت تقدمه بشكل مختلف.. قدمت في نفس السنة فيلمين ( الأولى في الغرام ) مع هاني سلامة و منة شلبي .. و فيلم ( الحب كده) ..

يعني نقدر نقول بدأت بشكل صح .. أدوار مهمة مع نجوم في السينما .. بس درة حبت تشق طريقها في الدراما بردو .. و واحدة واحدة عرفت تدخلها .. واشتركت في مسلسلات كتير دور تاني .. بس عرفت تلفت نظر الناس ليها.. ويمكن اللي عملها نقله دورها في سجن النسا ( دلال) .. حاجة كده بعيد عن دور البنت الكيوت الشيك ..

و علشان ركزت في المسلسلات .. وجودها في الأفلام مبقاش بنفس قوة وجودها في المسلسلات .. و يمكن في أفلام عملتها مع نجوم كبار و محققتش النجاح اللي المفروض تحققه.. فقالت أكمل تركيز في المسلسلات أحسن ..

بس مش دائما اختيارات درة صح .. وفي ساعات حاجات ترفعها فوق و حاجات تحسها مش موجودة أصلا في المسلسل.. يعني بعد ما قدمت مسلسل المتهمة .. و اللي خلى الناس تقول ان درة وصلت لمرحلة من النضج الفني كبيرة .. هوب رجعت كذا خطوة لورا .. ومحتاجة انها تركز أكتر في اختيارتها

وده لانها السنة ديه شاركت في موسم رمضان في مسلسل الأجهر .. واللي مفيش كلام عنها .. أو عن دورها .. و اللي هي بتفضل تنزل عنهم عندها على السوشيال ميديا .. هي فكرت ان حجم الدور كبير و بطولة مشتركة مع عمرو سعد فأكيد هياكل الجو

بس حسبتها غلط .. و غلطة الشاطر بألف … لان علشان تبقى في الأجهر رفضت دورها في مسلسل جعفر العمدة .. و اللي عملت دورها ” ايمان العاصي” .. و اللي كل الناس دلوقتي بتتكلم عنها .. واللي أكيد انها ندمانة انها رفضت علشان حجم الدور مش بطولة .. مع ان كل ممثل في المسلسل يعتبر بطل .. ومحمد سامي بيفرش ليهم في مساحتهم براحتهم .. بس واضح ان درة بتختار فساتينها بتركيز أكتر ما بتختار أدوارها ..

درة بردو من الفنانات اللي قليل أوي لو عملت مشكلة أو تريند .. يمكن المرة الوحيدة اللي اتعرضت فيها للهجوم وقت جوازها .. لكن غير كده هي في حالها .. حتى مش كتير تشارك في دعم فنانة .. أو تقول رأيها في حاجة .. بس الواضح انها محتاجة تعيد حسابتها تاني و ترجع لنفس الخط اللي كانت ماشية عليه.