من مواليد 6 ديسمبر سنة 1937 وهو موسيقار وملحن مصري مشهور جداً وتاريخه الذي قدمه في مجال الأغنية ضخم فهو لحّن حوالي 1500 لحن لكبار المطربين العرب مثل ليلى مراد ووردة الجزائرية ونجاة الصغيرة ومحمد الحلو وعلي الحجار ومدحت صالح، وقدم حوالي 48 مسرحية غنائية أشهرها: سيدتي الجميلة وحواديت وموسيقى في الحي الشرقي، كلامنا عن كبير الأغنية ومكتشف المواهب حلمي بكر.
اللي فاجئنا كلنا من ساعات وعمل حركة ميعملهاش إلا هو عشان في سنة ده محصلتش تقريباً.. اتجوز أيوه زي ما بقولكم كده طيب عارفين حلمي بكر اتجوز كام مرة قبل كده في حياته طيب عارفين عنده أولاد أد إيه.. طيب هو مين اللي اتجوزها دي.. كل ده وأكتر هتعرفوه معايا في التقرير التالي:
النشأة والبدايات
حلمي بكر اسمه الحقيقي حلمي عيد محمد بكر، اتولد في حي حدائق القبة بمدينة القاهرة، أبوه عاشق للفن.. طبعاً هو بيعرف يعزف كويس جداً على آلة الناي وبسبب كده جده الكبير اللي كان عمدة طرده من القرية قام لمْ نفسه وجه على القاهرة اشتغل بعض الأعمال الحرة لحد ما بدأ حياته المهنية بعد ما اتخرج من المعهد العالي للموسيقى العربية مدرس للموسيقى العربية في مدرسة حكومية بس بعد كده قدم استقالته عشان الروتين ودخل القوات المسلحة عشان يقصي المدة العسكرية بتاعته.
بس وهو في الجيش جت الفنانة وردة الجزائرية عشان تعمل حفل غنائي للقوات المسلحة.. وكان حلمي بكر مشهور في كتيبته إنه بيعشق الموسيقى وأول ما وردة سمعت ألحانه عجبتها وقررت تقدمه للأستاذ محمد حسن الشجاعي مدير الإذاعة المصرية وقتها.. ومن هنا بدأت حكاية حلمي بكر مع الأغنية لحد ما اكتشف مواهب كتير جداً واشتغل ما الكبار.
زيجة مفاجأة
من فترة كده حلمي بكر عانى من أزمة صحية صعبة مين اللي وقفت جنبه وقتها سماح القرشي ودي بقى تبقى مراته الجديدة عندها 40 سنة.. طيب حكايتها إيه؟ بصوا سماح دي مش جديدة أوي تقدروا تقولوا كده جديدة قديمة لأنها كانت مراته في فترة من فترات حياته وهي من بين الزوجات الـ13 اللي اتجوزهم في حياته. ومخلف منها بنت اسمها رهام وعندها دلوقتي 7 سنين.
وبتقول سماح إن حلمي بكر هو اللي طلب منها يرجعوا لبعض بعد موقفها معاه في أزمته الصحية الأخيرة وهي وافقت علطول عشان بنتهم تتربى بيننا هما الاثنين، طبعاً كتب الكتاب تم في بيت حلمي بكر في المهندسين بعد صلاة الجمعة وحضره المقربين من الأسرتين.. وبكده يكون حلمي بكر اللي عنده 85 سنة وأكبر من النجم الكبير عادل إمام اتجوز في سنْ محدش يتوقع فيه إنه يتجوز أو ياخد الخطوة دي لكن بسبب إنه عايش لوحده دلوقتي قرر يعمل كده ومفيش أحسن من أم بنته.
أشهر زيجاته
حلمى بكر اتجوز فث بداية حياته الفنية من الفنانة سهير رمزي ودي هي السيدة الأولى في حياته وهي أشهر جوزاته اتخطبوا لبعض وهي عندها 16 سنة والجوازة تمت وهي عندها 21 سنة وانفصلوا عن بعض بعد 3 سنين جواز.
اتعددت جوازات حلمي بكر بعد ما انفصل عن سهير رمزي ومن الجوازات الـ13 منهم اللي بره الوسط الفني ومش معلنين ومنهم اللي من جوه الوسط وغالباً بيكونوا قرايب فنانات معروفين زي الجوازة التانية من شاهيناز ودي أخت الفنانة شويكار.. ودي تعتبر أم ابنه الوحيد هشام اللي عنده دلوقتي 43 سنة.. الزوجة السادسة كانت سورية وتبقى ابنة خالة المطربة أصالة واسمها راندا وانفصلوا بسبب خلافات حلمي بكر مع أصالة، وطبعاً مراته وقتها خدت صف بنت خالتها..
الجوازة التامنة كانت من المطربة الراحلة عليا التونسية ودي كانت جوازة سرية واتعرفت بعد ما انفصلوا عن بعض.. آخر جوازة بقى كانت من فتيات أصغر منه بأكتر من 30 سنة واحدة منهم اتجوزها 10 شهور بس والجوازة الأخيرة كانت من سماح القرشي، ودي خلف بنتهم سنة 2016 ودي اللي رجع ليها دلوقتي وكمان كده حلمي بكر يبقى عنده ولد وبنت بس من 13 جوازة والفرق بينهم 36 سنة.
