واضح كدا ان هشام عاشور بدأ يعاني من بعض المشاكل بعد زواجه من نيللي كريم بعدما بدأ يظهر على الشاشة وهو اصلا لاعب سكواش و لا عمره فكر يمثل تحدث أخيرا عن هذهه القصة وقال تصريحات توحي بالندم.
ظهر عاشور في مسلسلين مع مراته وهما عملة نادرة بتاع رمضان اللي فات وكمان مسلسل روز وليلى اللي اتعرض من اسابيع قليلة و ظهر فيه هشام مع مراته
وبعد ما بدأنا نشوفه بيظهر في اعمال نيللي بدأ يتعرض لهجوم كبير من الجمهور واعتبروا انه بيمثل على حسها وهي اللي دخلته الفن والكلام اللي احنا عارفينه ده وعشان كدا طلع هشام رد على اللي بيتتقدوه
هشام قال الجوازة دي ضرتني.. أنا راجل بطل يعني فضلت 27 سنة بتمرن 8 ساعات في اليوم ومبفكرش في حاجة تانية، علشان كدة بقت طريقة تفكيري دلوقتي بركز على التدريب في الحاجة اللي عاوزها، ومش برد ولا بسمع لأي كلام لحد ما أحقق طموحي.
هشام طموح جدا و بيحب يعمل الحاجات الصعبة ويخوض تجارب متخلفة ، وقال عن نفسه : بزحف على التراب عشان اوصل لحتة معينة والناس كلها قاعدة الى السوشيال ميديا ينتقدوا بعض و محدش بيستثمر في نفسه
بعد تجاربه قدام الكاميرا ، واضح كدا ان هشام عاشور خلاص حب التمثيل و حابب يكمل فيه سواء مع نيللي او لا ، وقال انه عنده طموح في الجزئية دي ومبسوط جدا بدوره اللي عمله في مسلسل عملة نادرة وكان تجربة صعبة عليه لانه عمل فيها دور الصعيدي.
كمان قال انه سافر برا كتير جدا ولف العالم و اتعلم لغات كتير فمكنش صعب عليه يتعلم اللهجة الصعيدية عشان يقدر يعمل دوره في المسلسل ، لدرجة انه كان بيتكلم صعيدي مع مراته نيللي و كل الناس اللي حوليه خلال فترة التصوير وحتى بعدها بشوية ،، وده بسبب انه اتعود على اللهجة وتقمص الدور و فضلت ملازماه شويتين.
مسلسل عملة نادرة اللي اتعرض في رمضان اللي فات كان بطولة نيللي و ده اول عمل يجمع نيللي كريم و جوزها هشام عاشور مع بعض و ممثلوش الا مشهد واحد بس سوا في المسلسل كله ، ورغم انها ممثلة كبيرة ومحترفة الا انها قالت في لقاء انها كانت متوترة جدا في المشهد اللي صورته قدام جوزها واول مرة يحصلها كدا
نيللي لما اتسألت بعد عرض المسلسل عن رأيها في اداء جوزها مرضتش تجاوب وحاولت تهرب لكن في الاخر قالت انه اجتهد و عمل الدور كويس لدرجة انه بقى يكلمها صعيدي في البيت
هشام بقى قال عن مراته نيللي ، انها لحد قبل التصوير بيوم بالظبط مكانتش بتتكلم صعيدي، وأول يوم تصوير أنا كنت مرعوب، وبعتولي لقطة لنيللي وهي بتتكلم صعيدي جالي حالة ذهول، بتتكلم صعيدي كأنها مولودة في الصعيد وكله اتكهرب”.
طبعا قبل ما يتجوز هشام و نيللي كانوا هما الاتنين متوقعين انهم هيتعرضوا للهجوم ده لو هو دخل المجال ، وفعلا قال في تصريحات زمان : قبل ما أتجوز نيللي قالتلي خلي بالك أنت ممثل تقيل بس فكرة إننا مع بعض هتحط عليك ضغط كبير، لأن الناس هتقارنك بيا وإحنا عارفين القصة دي من الأول، ولكن لما الناس تشوف فيا ممثل بجد وبأثر بطريقة معينة هيبتدوا يفصلوني عن نيللي ويبصولي بطريقة تانية.
ومن حوالي شهر ظهر هشام عاشور للمرة التانية في مسلسل روز وليلى بتاع مراته برضه ، و اتعرض لانتقادات كتيرة خلته قرر انه ميمثلش معاها تاني خالص و كل واحد يعمل اعماله لوحده عشان الجمهور ميربطهمش ببعض.
وفعلا هشام ظهر في ٣ اعمال تانية بعيدة عن نيللي كريم ، وهي احلام سعيدة بتاع يسرا ، ويوتيرن بتاع ريهام حجاج ، وكمان شارك في فيلم الملحد
وعلى الاغلب مش هنشوف هشام في اي عمل يخص نيللي كريم تاني عشان يريح دماغه من القصة دي، لانه بيحاول يثبت نفسه بعيد عنها خاصة وانه درس التمثيل في امريكا ، يعني هو مش داخل بالواسطة ولا حاجة ، ده بيجتهد وبيحاول بعيد عن مراته خالص.
ومن حوالي سنتين كدا اتجوزت نيللي كريم فجأة لاعب الاسكواش المشهور هشام عاشور و محدش كان يعرف قصة ارتباطهم والموضوع حصل بسرعة جدا و عملوا فرح جميل في الساحل الشمالي.
ودي كانت الجرادة التالتة لنيللي ، وهي اصلا اكبر منه بكام سنة ، لكنهم متهموش اوي لقصة السن دي وحبوا بعض وقادرين يتفاهموا ويندمجوا سوا.
