خلال الساعات الماضيةتم تداول أنباء عن عرض فيلا الموسيقار محمد عبدالوهاب للبيع، من خلال موقع المزادات العالمي الشهير «سوثبي» والفيلا كانت معروضة بـ7 مليون دولار، والإعلان كان فيه مجموعة من الصور عن الفيلا، إلا إنه مبقاش موجود على الموقع تاني، والناس بتسأل مين عرضها وهل هي موجودة فعلا وهل عنده أملاك بالحجم ده؟ تعالوا نشوف
فيلا بمواصفات مميزة جدة، وحواليها جناين من كل اتجاه، وحمام سباحة في الفناء الخلفي وغرف نوم وغرف للخدم، ومن طراز مميز جدا، وطبعا معروضة في حي الزمالك الشهير، والمعروف إنه من أرقى المناطق في القاهرة وأغلاها سعرا.
لكن هل فعلا الفيلا دي ملك الموسيقار محمد عبدالوهاب؟ طيب مين أعلن عنها؟
تم الإعلان عن الفيلم على موقع «سوثبي» للمزادات من سيدة اسمها ليلى الجيوسي، ولكن الإعلان نفسه مبقاش موجود على موقع «سوثبي» الشهير الخاص بالمزادات، ولكن اسم ليلى موجود على الموقع بإن ليها حساب بتبيع من خلاله.
ولكن الإعلان نفسه تم نقله على مواقع تاني اسمه «Mansion Global» وهو موقع متخصص في العقارات الراقية مرتفعة التكلفة المادية، والموقع ذكر إن أول من أعلن عن البيع كان السيدة ليلى الجيوسي.
وبالبحث عنها تبين إنها بالفعل بتشتغل في مجال العقارات، وهي خريجة الجامعة الأمريكية، ودي مهنتها الأساسية، وبالفعل بتعرض عقارات غالية للبيع في أماكن مختلفة في القاهرة.
لكن هل عبدالوهاب بالفعل كان بيملك فيلا في حي الزمالك؟ ده السؤال اللي رد عليه ابن وابنة الموسيقار الراحل، واللي أكدوا إنه مكنش عنده أي فيلا في الزمالك، ولكن كان في شقة فقط، واتباعت بعد وفاته، واللي باعها زوجته نهلة القدسي.
ومحمد محمد عبدالوهاب، ابن الموسيقار الراحل، كان كشف في تصريحات قديمة، مع الكاتبة لوتس عبدالكريم، إن الموسيقار الراحل مسابش أي ثروة تذكر، وبالتالي هو مكنش عنده شيء بالحجم ده.
ابن الموسيقار الراحل كمان كشف إنه كان عنده فيلا في الهرم بالفعل ولكن اتباعت، وكمان فيلا في إسكندرية وتم بيعها في حياته، وقال إنه مجرد ما هيتوفر ليه معلومات كمافية، هيسلم الأوراق للمستشار القانوني، عشان ياخد الإجراءات المناسبة.
ومن ناحية تانية كشفت عفت عبدالوهاب، ابنة الموسيقار الراحل، إنه مكنش بيملك في الزمالك غير شقة، وتم بيعها بعد ما قررت زوجته نهلة القدسي السفر للأردن بعد وفاته وتم بيع الشقة دي، واعتبرت إن الموضوع ده ونسب الفيلا لوالدها هو محاولة لرفع سعرها.
السيدة عفت عبدالوهاب، طالبت المعلن عن الفيلا دي بالظهور والكشف عن نفسه، ولو عنده ما يفيد إن الفيلا دي فعلا كانت مملوكة لعبدالوهاب يطلع ويعلن عن ده، واعتبرت إن اللي عمل كدة شخص عاوز يعمل بيزنس على حساب اسم والدها، وإنهم هياخدوا الإجراءات القانونية ضده.
