هي مصرية وزوجها فلسطيني وبعمل في دبي وبقابلوا بعض في الاجازات، مفاجأة كبيرة كشفتها الفنانة عبير صبري عن علاقتها بزوجها المحامي أيمن البياع وهذا في آخر لقاء إعلامي لها رغم انها دائما تحب نشر صورها مع جوزها علي حسابها علي أنستجرام الا أنها لا تعيش معه في بلد واحدة.
معروف عن عبير صبري أنها بتخاف من الحسد موت وكل صورة بتنشرها سواء ليها او مع جوزها لازم تكتب تحتها جملة ماشاءالله وتحط ايموچي الخرزة الزرقا لدرجة ان الجمهور هاجمها كذا مره وقالها طالما خايفه من الحسد متنشريش صورك
في سنة ٢٠١٨ اتجوزت الفنانة عبير صبري المحامي الفلسطيني ايمن البياع واللي بيشتغل استاذ في القانون الدولي في القنصلية المصرية في دولة الامارات واتعرفت عليه صدفة واتجوزته ونشرت صورتها معاه علي انستجرام وفاجئت جمهورها بجوازتها التانية وكتبت عليها آية من آيات القرءان الخاصة بالزواج ومن وقتها لحد دلوقتي وعبير صبري بتخمس في وش كل المتابعين عشان بتخاف من العين والحسد
لكن المفاجاة اللي محدش كان يعرفها انهم مش عايشين مع بعض في بيت واحد مستقر ورغم قصة الحب الكبيرة اللي عيشاها عبير صبري بقالها خمس سنين مع المحامي ايمن الا ان كل واحد فيهم عايش في بلد بعيدة عن التاني لكن عبير معندهاش مانع وقبلت انها تعيش بعيد عن جوزها لو كان ده في مصلحة شغله
وقالت عبير صبري ان هي مصرية وعايشة في بلدها عشان شغلها هنا لكن جوزها فلسطيني الجنسية ومكتب المحاماة بتاعه في دبي عشان كده بنتقابل في الاجازات ، ويمكن ده سر من اسرار نجاح جوازة عبير صبري وانها مش بتشوف جوزها كتير فبالتالي المشاكل بينهم قلت والغربة خلتهم متفاهمين اكتر واتعودو علي انهم يقضو مع بعض كام يوم في الاجازات وكل واحد يرجع مكان ما هو عايش
المعروف عن عبير صبري كمان انها ست جريئة شويتين وكل ما بتظهر معاه في اي ايڤنت او مهرجان بتتعمد انها تحضنه وتبوسه قدام الكاميرات من غير ما تتكسف والموضوع بقي ملفت للنظر جدا
ولما طلعت عبير في لقاء تلفزيوني والمذيعة سالتها عن التصرفات ده قالت انها مبتعملش كده عشان التريند لكن بكون مبسوطة وانا بحب جوزي قدام الناس وفي كل مناسبة وفي اي حتة سواء قدام الكاميرات او في البيت
وعشان هو دايما مسافر ومش موجود معاها فا عبير صبري بتكون في قمة سعادتها لما جوزها ايمن البياع بيجي مصر ويروح معاها سهرة او حفلة او مهرجان ويظهرو مع بعض في اي مناسبه علي الريد كاربيت لانها مفتقدة وجوده معاها بشكل مستمر وردت وقالت علي الموضوع ده انا ببوسه من فرحتي ودي حاجة متزعلش
وفي تصريحات تانيه قديمة اتكلمت عبير صبري عن علاقتها بجوزها ايمن البياع وقالت ان التفاهم بينهم زاد اكتر من الاول وده بسبب مرور السنين علي جوازهم وبقو فاهمين بعض اكتر وبيعدو الاخطاء لبعض
ووصفت عبير صبري جوزها بان هو بقي ناضج بشكل اكبر لكن قالت هو اشقي مني بكتير وانا هادية لكنه بقي يعرف يستوعبني اكتر من الاول وبيعاملني بشكل لطيف وبيطبطب اكتر من الاول غير كل الرجالة ونسبة التفاهم بينا تقريبا ٨٠٪ اما الباقي خلافات بنقدر نعديها
ورغم انه عايش في دبي بعيد عنها الا ان عبير صبري دايما بتحكيله عن كل الاعمال اللي بتتعرض عليها ومبتدخلش اي مسلسل الا لما تاخد رايه وهو دايما متحمس لشغلها ومش بيعارضها ولا بيقف في طريق مشوارها الفني بالعكس بيشجعها وكمان فخور بيها
ناس كتير متعرفش قصة جواز عبير صبري وايمن حصلت ازاي لكن هو حكاها قبل كدة في لقاء اعلامي وقال ان هو قابلها بالصدفة في مطار بيروت واتعرفو علي بعض وبقو اصحاب وبعد ٣ ايام بس من التعارف اعترفلها بحبه وقالها انا هتجوزك غصب عنك
طبعا فالاول عبير صبري اتفاجئت ومكانتش مصدقة اللي بيقوله ومركزتش اوي فالقصة لكن اتفاجئت باهتمامه بيها واصراره علي انه يتجوزها فعلا وعرض عليها الجواز من غير لف ودوران وهي وقعت في غرامه وقررت تخوض التجربة ومن وقتها وهي عايشة معاه حياة هادية ومستقرة وحريصه علي علاقتها بيه جدا ومش بتحاول تعمل اي حاجه تخلق بينهم مشكله لكن بالعكس قالت انها بتعامله بهدوء وحنية وعشان كده علاقتهم اتطورت وبقت احسن من الاول بكتير
