وصل للنجومية في سن صغير وحقق فلوس كثيرة، طيارات وعربيات، حفلات ومسلسلات، أفلام وكليبات، وكل هذا معروف للجمهور فهو لا يخفي شئ فداما ما يستعرض سيااته ويظهر بالدولارات.
لكن إزاي هو شايف نفسه المغني الأعلى أجر في الوطن العربي وليه بيركب طيارة خاصة وبيستعرض الدولارات في صوره وكليباته.. وإيه علاقته مع مراته وعياله؟.. وإزاي شايف إن هو اللي قضى على وجود الدراما التركية في مصر.. حكايات كتير وأسرار أكتر عن نمبر وان هقولكم عليها في التقرير التالي:
صعود سريع
الفنان محمد رمضان، قدر يجمع بين الموهبة والذكاء في حياته الفنية يعني بالبلدي كده بيشوف إيه اللي بيجيب فلوس ويعمله.. أي حاجة بقى مش فارقة بس كله بالحلال والحقيقة نكبر وان صعد للنجومية بسرعة الصاروخ مثل وغنى وصور فيديو كليبات وعمل حفلات كتيرجوه مصر وبره مصر .. محطات حياته مش واقفة بس تصرفاته هي اللي أوقات كتير مبتعجبش اللي حواليه لكن هو على وضعه ولا هامه فلان يقول ولا علان ينتقد وجه الوقت اللي يتكلم فيه رمضان عن تصرفاته دي والمقرر بتاعها إيه؟.
معندوش وقت
محمد رمضان بيطلع يعمل حفلات غنائية ويسافر كتير وده اللي مخلي وقته مع مراته وولاده قليل جداً لدرجة إنه بيحاول وسط شغله ياخدهم فسحة صغيرة كده ع الماشي.
ويمكن ربنا صارفله قبول وفلوس ورزق من وسع عشان بيراضي أمه اللي جابلها شقة وقعدت في الدور اللي فوق شقته علطول
. ودايماً كلامه عنها بكل خير وبيطلع ينام شوية على رجليها آه زي ما شوفنا كده وهو نايم على رجل صفصف اللي هي مامته في مسلسل جعفر العمدة اللي اتعرض في رمضان اللي فات.
روح التحدي
وقدر نمبر وان يخلق روح التحدي جواه من أول مسلسل ظهر فيه من بطولته وهو ابن حلال واللي قال عنه إن كان بيشوف الدراما التركية هي اللي مسيطرة في مصر لأ وكان في فنان تركي هو النجم بالنسبة للجمهور صوره متعلقة في كل مكان وبيطبعوها على التي شيرتات وده اللي خلاه يقول بعد كده الدراما المصرية هي اللي هتسيطر وفنانين مصريين هما اللي هتتطبع صورهم على الهدوم وفعلاً ده اللي حصل وأغلبية مسلسلات محمد رمضان بيسيطر فيها وبنلاقي صوره على الهدوم والماجات وكمان في قنوات باسم مسلسله الأخير جعفر العمدة.
ليه الاستعراض؟
محمد رمضان مبيظهرش في فيديو غير وبيعمل جدل يستعرض بقى طياراته الخاصة.. دولارات.. وده اللي بيخلي الناس تنتقده لكن هو برر كده وقال إنه لما بيركب طيارة خاصة ويسافر بيها بيكون ليه سبب إنه بيوصل بدري وبالتالي يقدر يجهز لبروفة حفله بدري يعمل حاجة تانية بدل ما ياخد وقت أطول في السفر وبيختصر وقت الوصول لطيارة عاديةيعني كأنك بتركب تاكسي.
وبخصوص هدومه اللي بيلبسها في الحفلات ولا الكليبات والدولارات اللي بيستعرضها بيشوفها شيء طبيعي عشان هو بيقول كلمات أغاني لايقة على لبسه، يعني لما يقول في أغنية فلوس زي المطر نازلة عليا، مينفعش يقعد على غية حمام ويقول كده!.
لحد هنا ومحمد رمضان عنده مبرر ورد لكل حاجة لكن جه عند حفلاته وقال إنه بيعمل حفلات استعراضية ترفيهية مش مجرد إنه يمسك الميكروفون والجمهور واقف ويقول السقفة معانا، لأ ده اللي بيعمله في حفلاته هو اللي بيميزه عن غيره وكمان إيه مخليه أغلى مغني في الوطن العربي، وقال إن المغني المصري اللي الأجر بتاعه تحت أجره بياخد 50% من أجره، يعني أغلى مغني بعده بياخد نص اللي هو بياخده! ده غير بقى الطيارة الخاصة وعدد من الراقصين، لا بجد حفلاته بتبقى عاوزة مجهود كبير.
