محمد رمضان من بداية هذا العام نجمه عالي، وهذا من خلال النجاح الذي حققه بمسلسل جعفر العمدة، أو نجاح فيلم هارلي وتصدره شباك التذاكر، أو حتى أغنيته الأخيرة TMO وهذا ما يسعى إليه دائما محمد رمضان وهو أن يكون نمبر وان.
محمد رمضان من النجوم اللي بيحبوا المنافسة بشكل كبير، وطول الوقت بيحاول يكون هو نمبر وان، وبيشتغل على ده بلك طاقته، ولما بيلاقي حاجة معينة بتعلق مع الجمهور، بيعمل زيها تاني عشان يقدر إنه يقرب للجمهور أكتر، يمكن مشكلته بعض الأزمات اللي بيورط نفسه فيها، أو أزمة هجوم الجمهور عليه بداعي إنه بيصدر البلطجة وبيعلم الشباب حاجات مش مظبوطة.
محمد رمضان لما جرب يغني ولقى الجمهور عاجبه اللي بيقدمه، قرر إنه يعمل منه تاني، ولما بدأ مشواره الفني وكان بيعمل أفلام زي الألماني وعبده ومته ونجحت عمل منها تاني، لما لعب مسلسلات وقدم فيها شخصية المعلم اللي عنده حكمة وذكاء ومسطير وبيحارب الأعداء ونجح عمل منها تاني.
وبرغم خفة دمه وقدرته على تقديم الكوميديا، إلا إن أفلامه من النوع ده زي آخر ديك في مصر وواحد صعيدي محققتش نفس الصدى اللي حققته أعمال تاني ليه.
ولما قرر في الدراما إنه يبعد عن منطقة المعلم والشخص القوي اللي بيرجع ينتقم باردو الموضوع قلش منه ومحققش النجاح المطلوب زي البرنس مثلا، فدايما هنلاقيه بيرجع لمنطقته الآمنة اللي بينجح فيها.
موسم رمضان ده هو قدم مسلسل جعفر العمدة، وكان بيعمل فيه دور عمدة السيدة زينب المسيطر الذكي، وقدر ينجح بشكل كبير جدا، نجاح وصفه البعض بالأسطوري، وخصوصا مع خلطة محمد سامي اللي بتقدر تقدم النوع ده من الأعمال.
وفي العيد قدم فيلم هارلي، من تأليف محمد سامي، وبعض ممثلين مسلسل جعفر العمدة، ومعاه شوية أكشن وباردو معلم بس بشكل مختلف، راجل ذكي وحكيم وشاطر وناجح بس في مجال البايكرز.
وباردو بيستعد لتقديم أغنيات جديدة، عشان الجمهور بيحب يشوف ويستمتع بده منه، وإن كان هو نفسه مش عارف نوع الأغاني اللي بيقدمها ايه، ولكن هي خلطة بيحبها الجمهور.
ومحمد رمضان من خلال فيلم هارلي الأخير، قدر إنه يتفوق على نفسه، وده لأنه في خلال 7 أيام قدر غنه يحصد أكتر من 28 مليون جنيه، طبعا ده مش أكبر رقم ولا حاجة، ولكن لو هنقارنه بأكبر رقم لمحمد رمضان نفسه، واللي كان في فيلم الديزل لما حقق 24 مليون جنيه، فهو هنا تفوق على نفسه، ولكن متفوقش على أعمال تاني كتير حققت أرقام أكبر.
ناس كتير بتقول إن محمد رمضان ممثل كبير ومن أهم المواهب ولكن في منطقة معينة، زي السمكة في المايه لو خرجت منها مش هتعيش، ويمكن هو برغم قدرته على تقديم انواع مختلفة، إلا إنه في النهاية نجاحاته الكبيرة مرتبطة بنوعية معينة من الأعمال، ومقدرش يثبت غير ده.
