نجوميته قد تكون جاءت متأخرة، لكن بالنسبة له هو جاءت في وقتها، الجمهور عرفه وحبه، والآن هو حديث السوشيال ميديا، الشخصيات مثله في السينما والدراما لا تكون كثيرة.
ودول الكريزة اللي بتزين كل عمل بيشاركوا فيه، شوفنا من الفئة دي من الممثلين عظام كتير، وأهو انضم للقايمة واحد وتقيل كمان وخفيف الظل وهو الفنان محمد محمود.
الفنان محمد محمود مواليد 1951، وهو صغير قضى طفولته بين شاعر العز والجمالية، وفي المدرسة بدأ إن هو يمثل مسرح، ومن حبه في المسرح احترف تمثيل الهواة لما جابوا مخرج من برة عشان يخرج لفريق مدرسته، وبقى بياخده معاه يمثل مع فرق مدارس تاني، للدرجة اللي كانت بتخليه يتنكر عشان لجان التحكيم متعرفش إن هو نفس الطفل اللي بيمثل في معظم العروض.
محمد محمود كبر شوية، ولكن لأن تركيزه كله كان في التمثيل، أثر على دراسته وبالتالي على مجموعه، فدخل معهد خدمة اجتماعية، ولكن دراسته هناك لعلم النفس وعلم الاجتماع فادوه في إنه يقدر يتعرف على طبيعة الشخصيات اللي بيقدمها، ومن هنا بقى قرر إنه يقدم في معهد الفنون المسرحية، وراح بالفعل وقدم، وكان فاكر إنه كدة كدة هترفض، لما بعت أخوه يسحب ورقه بعد ما عمل تجارب الأداء، اكتشف إن هو نجح ومن المقبولين.
اشتغل في وزارة الثقافة، وكان مدير لعدد من مسارح الدولة، ولكن قرر إن هو ميكملش لأنه حاسس إن الموظفين بقى سلوكهم وحش وهو مش مرتاح، قبل 2009 حاجة وبعدها حاجة تاني، قبلها كان لعب شوية أدوار كلها صغيرة ومحققش النجاح المطلوب، ولكن في التاريخ ده عمل فيلم «أمير البحار» مع الفنان محمد هنيدي، وعمل شخصية ممس الشهيرة، عشان نبدأ نشوف محمد محمود بينطلق في أعمال كتير.
الجمهور اتعلق بيه مع يحيى الفخراني في دوره في مسلسل «نجيب زاهي زركش»، وكمان شخصية الحناوي في مسلسل رمضان كريم، واللي كانت قنبلة كوميديا، هو أصلا تعبيراته وحركاته كلها تموت من الضحك، لحد ما ظهر مؤخرا في مسلسل «بالطو» لما كان عامل دور عبدالبديع الطرشوخي، وكان عامل تناغم وكوميديا حلوة أوي مع عصام عمر بطل المسلسل.
الفنان محمد محمود بيظهر في موسم رمضان الحالي من خلال عملين وهما «الهرشة السابعة» و«1000 حمدالله على السلامة»، ولكن بقى حديث السوشيال ميديا، بعد ما ظهر في مسلسل «الكبير أوي» لما العترة شرب الدوا اللي عملهوله الدكتور ربيع، فاتحول لراجل كبير في السن وهو محمد محمود.
من أول ظهور ليه والجمهور فطسان من الضحك مع حركاته وإيفيهاته، وقد ايه هو ممثل كبير.
الفنان محمد محمود بيحصد نجاح تعب سنين، هو فنان كبير ويستحق كل اللي وصله، وفوق كل ده هو سعيد باللي وصله في الوقت اللي وصل فيه، ومش حاسس بأي تأخر، مبسوط في حياته ومع عيلته ولاده التلاتة وزوجته، يمكن في 2020 حصل موقف أثر عليه شوية، لما اتوفى زوج بنته في حادث، ونعاه وزعل عليه جدا، ولكن هي دي الحياة.
