منذ زمن طويل والزعيم عادل إمام كان الإعلى أجرا مقابل ظهوره في البرامج الترفيهية وكان يضرب به المثل بسبب حصوله على مليون جنيه، ولكن في الوقت الحالي الرقام أصبحت صادمة وأصبح مبلغ مليون جنيه مقابل الظهور في البرامج أمر اعتدنا سماعه، وفيما يلي سوف نوضح مفاجآت عن تلك الأجور فتابعونا:
أجور صادمة للمشاهير في البرامج
برامج الهارد توك شو زي صاحبتنا اللذيذة ياسمين عز وراغدة شلهوب ووفاء .. والترفيهية زي منى الشاذلي وإسعاد يونس.. خلت سوق الفنانين في الطالع.. وأسعارهم بقت محدش يقدر عليها.. وعشان كده متلاقيش فنانين كتير في برامج توك شو عادية.. إلا لو عاوزين يعملوا دعاية لأعمالهم
لإن البرامج دي ببساطة بقت مصدر رزق لفنانين ومشاهير كتير، وخصوصا نجوم الصف التاني والتالت والرابع، اللي ممكن يظهروا في مشهد ولا ضيوف شرف في أعمالهم، وياخداو قصاد التواجد ده أجر بسيط جدا، بس التريند والنميمة قادرين يجيبوا لهم فلوس أكتر بكتير، في حلقة واحدة ممكن يطلع الفنانين منهم بربع مليون ولا نص مليون جنيه، قصاد شوية كلام هيقوله ويروح بينهم مرضي
نجوم الصف الثاني والثالث الأكثر طلبا في البرامج
عشان كده لو مسكت ريموت التلفزيون وقلبت من قناة للتانية.. هتلاقي نفس الوشوش هي هي .. من علاء مرسي لـ ميسرة لـ وفاء مكي وغيرهم من الناس اللي نادرا لما نشوفها في أعمال دلوقتي.. بيجوا البرامج دي يقولوا كلام يطلع تريند وياخدوا القرشين يكملوا بيهم حياتهم.. لغاية ما حد يحن عليهم بدور في مسلسل ولا مشهد في فيلم
حد فيكوا لاحظ قبل كده إن الفنانين المصريين والعرب بيحبوا أوي يظهروا في برامج مش مصرية، ويسافروا مخصوص عشان يسجلوا حلقة مع صدى الملاعب في دبي ولا أي برنامج تاني على قناة عربية.
الإجابة ببساطة إن البرامج دي بتدفع كتير جدا. وبالعملة الصعبة الدولار، اللي كل يوم دلوقتي في الطالع، والحلقة اللي كانت بتعمل من كام شهر مليون ولا اتنين، دلوقتي ممكن تدخل في الضعف، ومعروف عن جمهور الخليج إنه بيحب الجوسيبس وبيتفرج والحلقات دي بتجيب ملايين المشاهدات
أجور المشاهير في البرامج ليلة رأس السنة
في مواسم كمان بيزيد فيها الطلب على النجوم، زي راس السنة، اللي كل برنامج بيطلع فيها أقصى بادجت عنده عشان يخطف نجم يلم بيه المشاهدات ويخلي الجمهور قاعد قدام التلفزيون ميتحركش عشان يتابعه.
وده اللي يخلي صاحبة السعادة تدفع مليون وأكتر لمحمد حماقي عشان يبقى نجم حلقة رأس السنة، ومنى الشاذلي اللي رفعت السقف جامد جدا لما جبت محمد رمضان في حلقة راس السنة ويقال إنه واخد 2 مليون جنيه.
وعندك مثلا برنامج سهرانين، اللي بيلعبها بذكاء، يعمل ميزانية للحلقة حوالي نص مليون جنيه، تزيد شوية ممكن لو النجم يستاهل، ويجيب 3 فنانين من درجات مختلفة، النجم فيهم ياخدلها 300 ألف جنيه مثلا، والباقيين 100 ألف ولا 50 ألف ويبقى الكل مروح متراضي
خناقات الفنانين على أجورهم في البرامج الترفيهية
طبعا انتوا كجمهور فاكرين إن ظهور النجم في التلفزيون ده بيحصل عادي، لكن دي مش حقيقة، ده في ناس بتفضل تفاصل في أرقام غريبة، وبيغيروا من بعض، ولو برنامج بيظهر فيه أكتر من فنان يسألوا، طب فلان ده واخد كام عشان أنا مش أقل منه.
يعني مثلا شباب مسرح مصر دلوقتي مبيظهروش في البرامج بأقل من ربع مليون جنيه، علي ربيع ولا محمد عبد الرحمن توتا بيتشرطوا، وبيقارنوا نفسهم بالنجوم الأكبر منهم سنا ومقاما، يعني لو هياخد 200 ألف جنيه وعرف إن السقا ولا حلمي هياخدوا أكتر، بيقولوا ليه احنا مش زيهم.
