يقولوا الشباب شباب القلب .. لكن ما يفعله الهضبة عمرو دياب ورجل الأعمال أحمد أبو هشيمة ليس شباب قلب وفقط بل جسم وملامح وشكل وكل شئ.
تشوفهم السن بيكبر لكن كل حاجة في حياتهم زي ما هي.. يعني على حاطة إيدك يا بيه.. رياضة ودايت ودايت ورياضة .. مبيزهقوش! بس الغريبة بقى إن مش الشكل بس هو اللي جمعهم ده كمان عندهم فلوس متتعدش واتجوزوا فنانات وصفات تانية كتير هقولكم حكايتها في الفيديو ده.
عمرو دياب وأحمد أبو هشيمة ظهروا مع بعض من كام ساعة في الساحل الشمالي عشان يشارك الهضبة الاحتفال بمشروع جديد بيفتحه.. وقتها الاتنين ظهروا في صورة سوا ونشرها أبو هشيمة على حسابه في إنستجرام وكتب إنه بيهني عمرو دياب على مشروعه.
غير الإطلالة الشبابية بقى وكده هنلاقي الاتنين لابسين نفس الساعة وده كان واضح من الصورة بتاعتهم واتردد كلام إن الساعة دي سعرها واصل 321 ألف دولار يعني كل واحدة سعرها بالجنيه المصري 20 مليون جنيه.. وهي من مجموعة Patek Philippe والغلاف بتصميم Calatrava مع عروات مشغولة وأرقام بريجيو مركبة. والألوان عاجية مطلية والميناء من الدهب الأبيض وفيه نقش بزوغ الشمس باللون الأزرق وغلاف الساعة شفاف من كريستال الياقوت قابل للتبديل مع ظهر مصمت من الذهب.
الأصول مش من هنا
عمرو دياب وأحمد أبو هشيمة مش من القاهرة في الأصل يعني أصول أبو هشيمة راجعة لمحافظة بني سويف.. بس هو اتولد في القاهرة في حي الوايلي، يوم 11 يناير سنة 1975 يعني عنده 48 سنة.
اتخرج من كلية التجارة جامعة قناة السويس سنة 1996 وكان طول سنين الدراسة في الجامعة بيشتغل موظف تحت التمرين في بنك وبعد ما اتخرج بدأ في التجارة لحد ما كبر في المجال واحدة واحدة يعني بدأها من تحت ووقف على رجله..
الهضبة بقى من مواليد مدينة بورسعيد يوم 11 أكتوبر سنة 1961 يعني أصوله مش قاهرية بردوا والهضبة طبعاً بدأها من الصفر لحد ما صعد للنجومية وبقى واحد من أهم المطربين في الوطن العربي كله.. واللي بيميز عمرو دياب عن غيره إنه دخل آلات موسيقية جديدة في الأغاني بتاعته وابتكار أنواع مختلفة من الأغاني طول تاريخه.
شباب علطول
دايماً بنسمع إن عمرو دياب مبيكبرش عدى الستين وتحس كده إنه لسه صالب طوله وشغال وبيعمل حفلات والحياة جميلة وده راجع لممارسة الرياضة .
أبو هشيمة بردوا شباب علطول وجسمه طول بعرض ورياضي والاتنين بيشتركوا في ممارسة الرياضة وكل واحد من الاتنين عنده أجهزة رياضية خاصة في فيلته اللي ساكن فيها وأهو بدل ما يروح الچيم معظم الوقت لأ بيمارس رياضته في البيت.
ده غير الالتزام بنظام غذائي معين وكل واحد منهم ميعرفش حتة الهيصة في الأكل دي لأ في مواعيد وأكل مخصوص عشان كل حاجة تمشي صح.. والنوم كمان مهم جداً بالنسبة ليهم وفي مواعيد معينة للنوم والصحيان إلا لو في شغل طارئ أو سهرة خاصة بقى.. يعني كل حاجة بالشوكة والسكينة.
جوزاتهم
مش بس تفاصيل الحياة الخاصة لكل واحد فيهم عمرو دياب وأبو هشيمة هي اللي مترتبة ومنظمة وفيها صفات مشتركة بينهم.
لأ ده كمان في الجواز كمان وكل واحد من الاتنين اتجوزوا فنانات وعمرو دياب كانت أول جوازة ليه من الفنانة شيرين رضا سنة 1989 وخلف منها بنته الكبيرة وحصل الانفصال سنة 1992 وبعدين اتجوز السعودية زينة محمد عاشور، وخلف مِنها التوأم عبدالله وكنزي وبته جنى.
وكان ليه فترة ارتباط بالفنانة دينا الشربيني قعدوا حوالي 4 سنين مع بعض ومحدش من الاتنين أعلن الجواز بس فترة الارتباط دي كلها كان الجمهور والإعلام شاهدين عليها وصورهم وظهورهم مع بعض في المناسبات كان أكبر دليل.
وأحمد أبو هشيمة ليه جوازتين من فنانتين الأولى كانت اللبنانية هيفاء وهبي وقعد معاها 4 سنين وبعدين حصل انفصال.. والجوازة التانية كانت من الفنانة ياسمين صبري وقعد معاها سنتين.
