رد فعل مفاجئ من زوجة أحمد سعد على سخرية سمية الخشاب من زوجها

ما نعرفه في العلاقات بين الرجالة والستات إن الخناقة بتكون على واحدة بسبب جمالها، انما سيدات يكون خلافهم على رجل هذا هو الجديد.

وهو ماحدث مع الفنان أحمد سعد، اللي قعد فترة ملوش حظ في الستات لحد ما استقر الفترة اللي فاتت، لكن واحدة من سألته القديمة اللي هي الفنانة سمية الخشاب شكلها مش شايلاه من دماغها، بس مراته الجديدة بقى شكلها سايقة المركب صح ومش في بالها حد، وده اللي هقولكم على كواليسه في التقرير التالي:

لعبها صح

الفنان أحمد سعد، شكله لعبها صح وعمل حفلة في السعودية ضرب بيها عصافير كتير بحجر واحد يعني من الآخر ركب التريند وشكله مش نازل دلوقتي.. أغانيه حققت نجاح كبير.. إطلالته قالبة السوشال ميديا.. استفز طليقته السابقة سمية الخشاب.. كشف إنه نضج وحياته بقت مستقرة ودنيته تمام ومركز في شغله وبس وده واضح أوي الفترة اللي فاتت.. شكل العروسة الجديدة وبنته اللي خلفتها له من كام يوم وشها حلو عليه.

 أحمد سعد وإطلالته

أحمد سعد ظهر في حفلة جامدة في السعودية وكانت ضخمة فعلاً وعملها ضمن حفلات موسم جدة 2023، على مسرح بنش مارك والجمهور اللي حضر كان كبير جداً، وكان ظهوره بقى هو اللي صح الصح عشان إطلالته كانت مثيرة للجدل، ولبس حلق لونه فضي، أيوه ما هو ده اللي بياكل مع الناس ومش بس كده ده كمان كان لابس قميص أكمامه شفافة ولونه أسود، والأجواء لعلعت مع أغاني “عليكي عيون، إيه اليوم الحلو ده، سألت نفسي كتير”، وربنا كرم بتفاعل محصلش.

فاكراك يا ناسيني

الفنانة سمية الخشاب، فضحت نفسها وقال إيه عاوزة تقول إنها كوميديانة وكده والجمهور هيضحك وهي تركب التريند مكان طليقها أحمد سعد، المهم سمية عارفة بتعمل إيه كويس هي مش صغيرة وكل كلمة بتقول رسالة،واهو ينوبها من الحب جانب.

وفي الحقيقة هي بقتلها فترة كده مش لتظهر على الساحة حتى شغلها قليل وتفاعلها على السوشال ميديا بقى في النازل فقالت أضرب في أحمد سعد وأشوف رد الفعل، وعملت جدل بتغريدة غامضة ليها على حسابها في “تويتر”، وده اللي اعتبره كتير من المتابعين رسالة متوجهة لجوزها السابق أحمد سعد.

وكتبت: “وأنا أقول لبسي راح فين”، وده اللي شافه متابعين ليها سخرية واضحة من إطلالة أحمد سعد في حفله اللي عمله في السعودية وكمان في ناس قالت مش صح اللي بتعمله ده ولازم تسكت بقى عشان خلاص الراجل بقى متجوز وعنده أسرته وبلاش الحركات النص كم دي.

ملهوش حظ

الغريبة إن أحمد سعد كان زمان معروف عنه إنه متعدد العلاقات النسائية والمعروف عنه إنه اتجوز مرة من بره الوسط ومخلف ولد وبنت بس بعد الطلاق 3 مرات بينهم لقينا علاقة ليه مع الفنانة ريم البارودي سنة 2011 ووقتها اتخطبوا والموضوع مشي في سكة الجواز بس الموضوع حصل فيه أزمات كتير وبعدها اتقال إن الجواز تم في السر وريم البارودي أصرت إن الجواز علني مش في السر ومع إصرارها ده أحمد سعد اعترف إنه تم فعلاً وقعدوا 6 أيام بس.

بعدها سمية الخشاب دخلت في علاقة مع أحمد سعد واتجوزوا فعلاً بس الموضوع يدوب سنة ونص وكفاية عليهم كده، بس شكل سمية مش شايلة أحمد سعد من دماغها وشكلها ندمانة على الطلاق بدليل تصرفاتها، لكن ريم نسيت حكايته أصلا ومراته الأولانية مش هتعرف ترجعله تاني، ودلوقتي أحمد سعد متجوز للمرة الرابعة وحياته الحمد لله نمسك الخشب.

هادية وراسية

جوازة علياء بسيوني مصممة الأزياء من أحمد سعد غيرته خالص وبقى بني آدم تاني فعلاً.. بني آدم ناضج كده وعاقل وهو نفسه قال مش هدخل في حكايات تاني وعاوز أستقر وكفاية كل اللي حصل في حياتي من ورا الستات، ودلوقتي خلف منها بنوتة سماها على اسمها.

بس بعد اللي عملته سمية الخشاب الجمهور كان منتظر رد فعل من مرات أحمد سعد لكن واضح كده إنه فارض شخصيته وحاكم الدنيا كويس وعمل لحياته معاها خصوصية وزي ما هو مش هيدخل في حكايات تاني هي كمان هتلتزم الصمت ومش هترد على أي حاجة وكمان هي شكلها عايشة الواقع في حياتها أكتر وظهورها على السوشال ميديا مبقاش كتير زي الأول.