مي نور الشريف اتخطبت مرة للفنان عمرو يوسف وبعد قصة حب واتفاقات بينهم كل الأمور تغيرت وفسخوا الخطوبة قبل الفرح بأيام. لكن هل مي بنت الفنان نور الشريف والفنانة بوسي رافضة تتزوج من الأساس رغم أن سنها تخطى الأربعين.
بس يا ترى هل كده بقت عانس؟ وليه هي مختفية عن الوسط الفني ومش بتشارك في أعمال فنية وإيه حقيقة اعتزالها؟.. وإيه قصة حبها مع ابن المطرب هاني شاكر؟.. يلا بينا في الفيديو ده أقولكم الحكاية وكواليسها.
من فترة للتانية بنشوف مي نور الشريف بتنشر صور ليها على إنستجرام.. بتقول للجمهور إنها موجودة بتشاركهم مناسبات وبعض تفاصيل من روتين حياتها اليومية وأهو ماشي الحال.. بعدها تحضر مناسبة مع صحابها وبردوا أهو بتقول للجمهور إنها موجودة مش مختفية ولا حاجة.. لكن الحياة الشخصية للفنانة مي نور الشريف غريبة يعني لا خطوبة ولا جوازة ولا أي حاجة جديدة في حياتها الشخصية من بعد ما فسخت الخطوبة إياها مع عمرو يوسف.. طيب ليه كل ده بيحصلها وإيه اللي جرالها؟.
لعل المانع خير
مي نور الشريف من يوم ما أبوها رحل من الدنيا سنة 2015 وهي مش بتظهر في أعمال فنية؟ إزاي دي وهي طفلة أعمالها الفنية أكتر من وهي كبيرة كده إيه اللي جرا هي اتحسدت ولا إيه؟.. المهم في ناس تقول دي مش بتحب التمثيل وناس تقول دي اعتزلت وناس تانية تقول وإحنا مالنا خلينا في حالنا.. لكن مي من فترة للتانية بتبقى تريند كده وبتظهر تعمل قلبان.. لكن إيه اللي خليها بقالها 7 سنين بره الدايرة لعل المانع خير.
قصة الاعتزال
سنة 2016 ظهرت مي نور الشريف في مسلسل اللهم إني صايم وده كان بعد سنة واحدة من رحيل باباها.. وبطل المسلسل ده كان الفنان مصطفى شعبان وشكله كده كان بيرد جمايل نور الشريف عليه عشان هو اللي اكتشف موهبته أصلًا.. ومي من بعد المسلسل ده مش بتمثل.. وخلوا بالكوا دي معتزلتش ولا حاجة دي طلعت واحدة مش نشيطة يعني الكسل مسيطر عليها آه والله هي اللي قالت كده بنفسها مجبناش حاجة من عندنا.. طبعًا اللي عاوز يمثل بيشتغل على نفسه كورس من هنا على حبة علاقات من هناك وأهو الدنيا تمشي شوية لكن مي مبتعملش أي حاجة من دي وقالت أنا معتزلتش بس أنا مش نشيطة وافهموها انتوا بقى لوحدكوا.
خطوبة مكملتش
في يوم من الأيام بقى كان عمرو يوسف اكتشاف نور الشريف بردوا طلب إيد مي من أبوها نور.. راح قاله طيب أشوف البت عاوزة إيه وأرد عليك.. أبوها راح البيت قالها عمرو طالب إيدك مني بصت في الأرض ووشها جاب 100 لون وقالتله اللي تشوفه يا بابا.. قالها انتوا متفقين على كل حاجة بقى وشكلي آخر من يعلم يا ست هانم.. خلاص بقى يا بابا متكسفنيش المهم اتخطبوا وبعد فترة كل شيء اتغير وسابوا بعض.
أصلًا مي كانت هي اللي اتوسطت لعمرو عند باباها لما طلب وجوه جديدة تشارك معاه في مسلسل سعد الدالي وكان في دور من نصيب عمرو زي ما مي كان ليها مشاركة في الأجزاء التلاتة بردوا وده كان سنة 2007.. لكن ليه مكملوش خطوبة؟ محدش قال السبب وكل واحد محتفظ لنفسه بكل حاجة حتى بوسي مامة مي قالت والله ما اعرف اللي حصل وعمرو قال كل شيء قسمة نصيب وأنا هفضل أقدرها واحترمها ووقف يستقبل عزا نور الشريف اللي كان ليه فضل عليه ونور أصلًا كان بيعتبره ابنه اللي مخلفهوش.
قصة حب
وعشان مي نور الشريف من أسرة فنية كان طبيعي تكون الأضواء متسلطة عليها والناس حابة تعرف هي اتجوزت ولا ارتبطت ولا بتعيش قصة حب ولا إيه.. أصل من يوم الفركشة بتاعة عمرو يوسف دي وهي ولا حس ولا خبر.. لحد ما في يوم لقينا أخبار بتقول إن مي خلاص هتدخل القفص الذهبي وهتتجوز خلاص والعقدة هتتفك.. مين سعيد الحظ بقى ابن الفنان هاني شاكر وطبعًا الكلام كان كله تأكيد إنها عايشة الغرام والموضوع حقيقي لحد ما مي زهقت بقى وقالت هو في إيه يا جماعة الكلام ده مش حقيقي هو أنا مش هخلص من الشائعات ولا إيه؟.. وإيه الكلام الفارغ ده طبعًا اللي بيتقال ده مش حقيقي وكفاية بقى اللي بيحصل ده.
