جميعنا كنا متابعين أخبار الحكم على المغني سعد لمجرد 6 سنين في فرنسا، ودخوله السجن فور نطق الحكم، رغم إنه كان متأكد من براءته، وأسرته كلها كانت معاه وتدعمه، وعلى رأسهم زوجته غيتة، إلا إنه المحكمة صدمتهم كلهم، وقررت حبسه فورا، لكن المحامين عندهم ثغرة قانونية، تابعونا لمعرفة التفاصيل:
محامي الفنان سعد لمجرد كشف كل أوراقه في تصريحات صحفية ليه.. وقال إنه ضامن خروج موكله خلال ساعات بسبب ثغرة قانونية محدش كان عارفها.. بس مكنش ليها مكان أوي في المحاكمة الأولى.. بسبب الأجواء العاطفية للحكم والجلسات ودموع الضحية.
محامي سعد لمجرد اللي اتحول من متهم لمذنب في قضية الاعتداء الجنسي على فتاة.. قال إن المحكمة مكانتة عادلة في حكمها.. خصوصا إن الفحوصات الطبية أكدت عدم وجود أي حمض نووي بالأعضاء التناسلية للفتاة الفرنسية لورا بريول
لورا اتهمت سعد لمجرد باغتصابها.. وبالتالي لازم يكون في حمض نووي يؤكد وقوع الجريمة دي.. وده دليل قاطع جدا محكمة الاستئناف هتاخد بيه وهتلغي على أساسه حكم الحبس 6 سنوات.. اللي محدش عارف لغاية دلوقتي طلع على أساس ايه رغم عدم وجود أي دليل مادي أو معنوي أو طبي بيأكد الاغتصاب.
محامي سعد لمجرد شايف إن المحكمة اتأثرت عاطفية بكلام طرف واحد من الرواية.. وشهادة موظفين الفندق اللي قالوا إن البنت راحت لهم بتستنجد بيهم وكان باين عليها الاعتداء.. رغم إنه ولا حد كان معاهم في الغرفة.. ولا حد يقدر يأكد أو ينفي غير الطرفين.. والطرفين روايتهم لليوم مختلفة خالص.
تصديق المحكمة للضحية المزعومة.. وتجاهل شهادة سعد لمجرد اللي اعترف فعلا بإنهم كانوا على وشك إقامة علاقة بس حصل تراجع.. أمر مثير للانتقاد جدا.. ده حتى الصحف الفرنسية اتكلمت عنه.. وحطت تساؤلا إنه ياترى الحقيقة مين فيهم ضحك على التاني ومين فيهم الضحية الحقيقية.
محامي سعد لمجرد شايف إنه التحاليل بتأكد إنه محصلش اغتصاب.. وإن الضحية لورا كانت قاصدة القضية تاخد وقت طويل لغاية ما يعدي وقت على إجراء تحاليل طبية تانية تأكد رواية سعد.. وقدمت الدعوى قدام محكمة جنائية المفروض تاخد وقت طويل في المداولات.. بس اللي حصل غريب ومش منطقي
طبعا جان مارك فيديدا محامي سعد لمجرد..شايف إن البنت اللي اتهمته باغتصابها كان عندها النية من البداية لتوريطه في شيء أكبر من مجرد ليلة عابرة.. وراحت له غرفته في وقت متأخر من الليل عشان تجذبه ليها.. ولما الأمور ممشيتش في السكة اللي هي عوزاها قررت تكبر القصة
وأكد محامي سعد إنه شخص يحترم النساء جدا.. وطول الوقت بيثبت إنه شخص مش عنيف.. وإن فريق الدفاع عنه مش هيبطل لغاية ما يثبت براءته ويرجعه لأهله وعروسته قريب جدا.
