كل يومين يظهر تريند شبيه نجم او نجمة ، لكن في واحدة نسخة طبق الأصل من غادة عبد الرازق لدرجة ان الناس عندما رأت صورتها تخيلت انها غادة عبد الرازق وليست شبيهة لها.
نيهال العليمي ميكب أرتست معروفة لكنها فيها شبه كبير جدا من النجمة غادة عبد الرازق ، وكل ماتنشر صورة ليها على أنستجرام ، الناس بتدخل تعلقلها نفس الكومنت بأنها نسخة غادة.
بس نيهال معملتش زي باقي الناس اللي بتستغل وجه الشبه بينهم وبين النجوم ويطلعوا بيه تريند ، لكن هي سابت الناس هما اللي يعملوا ده وفعلا انتشرت صورها كتير على السوشيال ميديا مع صور غادة خاصة في هوجة أشباه النجوم اللي ظهرت مؤخرا دي.
المفاجآة بقى اللي ناس كتير متعرفهاش ان نيهال العليمي شاركت غادة عبد الرازق في مسلسل تلت التلاتة اللي كان بيتعرض في رمضان اللي فات.
وكانت طالعة غادة عبد الرازق ب 3 شخصيات ، وفي مشاهد كتير كانت بتبقى المفروض ظاهرة هي واختها التوأم ، واختها دي بقى عملت دورها نيهال العليمي لانها شبه غادة جداً، فاستغلوها وجابوها تشارك في المسلسل وتظهر في بعض المشاه.
وفعلاً نيهال نشرت كذا فيديو عندها على انستجرام من كواليس تصوير مسلسل تلت التلاتة ، وقالت للجمهور هي كانت انهي واحدة فيهم ، وفعلا محدش خد باله ان دي مش غادة وكنا فاكرينهم مستخدمين اي برنامج ، لكن طلعت واحدة شبهها
ونشرت نيهال العليمي صورة ليها مع غادة عبد الرازق وهما عاملين نفس التسريحة ولابسين نفس اللبس ، في كواليس تصوير تلت التلاتة.
وكتبت نيهال : شفتو بقا المفاچأة الحلوة دي الفنانة الرائعة غادة عبد الرازق شخصيا بجد الطيبة والذوق والتواضع والشياكة في التعامل كله فيها وحياة ولادي مش مجرد كلام من أجمل الشخصيات المشهورة اللي تعاملت معاهم وأحلى حاجة حصلت لي إني اتعرفت عليها قبل ما أموت.
وكانت المفاجآة رد فعل الناس اللي اتصدموا من الشبه الكبير بينهم وازاي قدرت تعمل نفس اللوك بالظبط وتطلع شبهها بالملي كدا ، والناس وصفتهم بالتوينز ، وناس تانية هزرت وقالت طلعوا الاختلافات ، وواحدة تانية كتبت “صعبتوها علينا أنا مش عارفة مين فيكو غادة ومين نيهال أنتوا توأم”.
ومن كتر ما غادة نفسها كانت متفاجئة ان في واحدة شبهها اوي كدا ، نشرت الصورة عندها على انستجرام مع نيهال والناس كلها عرفت انها عملت دور دوبليرة غادة في تلت التلاتة.
وبدأت نهال العلمي تتشهر ودخلت مجال التمثيل ، وعملت مشاهد في مسلسل غادة ، وكمان عملت كام مشهد في مسلسل الصفارة مع احمد أمين اللي اتعرض رمضان الي فات برضه
وزي المثل ما بيقول يخلق من الشبه أربعين ، وهو ده اللي حاصل في الوسط الفني مؤخراً ،وكل شوية نتفاجئ بواحد شبيه النجم الفلاني والموضوع زاد اوي يا جماعة ، لكن الغريبة انهم فعلا شبههم جدا وده بيكون سبب كبير في شهرة ناس بتستغل الموضوع ده على السوشيال ميديا وكل يومين يطلع تريند شبيه فلان
ومن كام اسبوع ظهر واحد شبه محمد رمضان جدا وعمل قلق كبير على السوشيال ميديا واستغل الشكل بينهم وطلع تريند فعلا لكن بعد كام يوم حقيقته اتعرفت وكان مستخدم فلتر كدا وبرنامج يقدر يخليك نسخة من اي حد
كمان ظهرت على التيك توك بنت نسخة من دلال عبد العزيز الله يرحمها ونفس ملامحها بالظبط ، وكل ما تعمل فيديو الناس هي اللي بتعلقلها وتكتبلها دلال الصغيرة
غدير مقالتش على نفسها شبيهة دلال عبد العزيز ، هي نفسها اتفاجئت من رد فعلا الناس و بقت مبسوطة بده لكن هي محاولتش تسعى ولا تشتهر بجملة شبيهة دلال زي ما ناس تانيين بيعملوا وشوفناهم كتير الفترة الاخيرة
و كل فترة كدا بيطلع واحد شبه نجم مشهور ،، مرة محمد رمضان ومرة محمد صلاح و غيره وغيره ، والقصة دي بقت منتشرة اوي خاصة أن الناس دي بتستغل قوة السوشيال ميديا وبيقدروا يتشهروا بسهولة من خلال شوية صور و فيديوهات على تيك توك او انستجرام و الجمهور بيتفاعل معاهم سواء كانوا فعلا شبه النجوم الاصليين او لأ و بيحاولوا ياخدوا اللقطة و خلاص.
