شيرين عبد الوهاب بتقوم من حفرة تقع فى دحديرة،ومعها حسام طبعا ،قلنا أمورهم هديت وحياتهم إستقرت،بين الحفلات والسهرات، ولكن شيرين أعجبت بالحياة في لبنان وقررت أن تستقر هناك
شيرين عجبتها العيشة فى لبنان،ولاقت نفسها وإكتشفت جوانب فى شخصيتها جديدة مع الحيلة الدلوعة حسام حبيب من أخر سفرية لها فى لبنان،وقالت بحبك يا لبنان.
شيرين وحسام قرووا يبدأوا حياتهم من جديد ويفتحوا صفحة جديدة وهتبدأ من لبنان،وهيريحوا دماغهم خالص من القيل والقال والشائعات اللى عاملة عقد إحتكار معاهم وقالوا بينا على لبنان..
بس للأسف التريند وراهم وراهم بردوا فين ما يروحوا.. ياترى ليه شيرين مش هترجع مصر تانى؟ وهل فعلا هتعيش فى لبنان؟ طيب ومصر اللى شربتى من نيلها وغنتيلها يا شيرين؟ جمهورك المصرى اللى وقف فى ضهرك فى عز ازماتك؟ ده كله كوم ورضى سنسن كوم تانى خالص .
شيرين طبعا خسرت ولو نسبة بسيطة من جمهورها بسبب الازمات الكتير اللى مرت بها الفترة اللى فاتت،وكل جمهور مصر ولوطن العربى عاشها معاها لحظة بلحظة.
هو طبعا الجمهور بينسى وكله بيعدى بس شيرين مواقفها غير أى فنانة تانية من أزمتها مع حسام وأسرتها لأخر حاجة لما إنتشر لها فيديو وهى بتتمايل يمين وشمال وبترقص على الترابيزة فى لبنان.
وبسبب الهجوم اللى حصلها من الجمهور ،شيرين قررت إنها تستقر فى لبنان وسط الشلة اللى لاقتهم شبها فى حاجات كتير وشكلها إرتاحت معاهم،حتى لما قررت ترفه عن نفسها وتسافر لبنان كانت السفرية شؤم من وصولها للمطار لحد سافرها لحفلتها فى الكويت مشافتش يوم كويس بجد.
حتى لما حسام بهدلها قدام الناس وإعتدى عليها فى الفندق،ووقعوا فى خناقة لرب السما ،وبقيت سيرتهم ساعتها على كل لسان .
مش بس كده لا لما زارت فضل شاكر ومعاها حسام،فضل شاكر اللي مستخبي في مخيم عين الحلوة عشان مطلوب من الجهات الأمنية اللبنانية، وطبعا صور القاعدة دى أكتست السوشيال ميديا واللدنيا قامت عليهم تانى، والجهات الأمنية استدعتهم.
لكن ياسر قنطوش، محامي شيرين قال ساعتها إنهم كانوا في زيارة عادية جدا للبنان، وقرروا يزورا صديقهم فضل شاكر، وإنهم هيرجعوا مصر كمان كام يوم ومكنش فيه لا تحقيق ولا استدعاءات ليهم.
وكمان رد بطريقة غريبة عن معاد رجعوهم لمصر وقال «لا دي نسأل فيها مصلحة الجوازات هي رجعت إمتى!
وده لإن شيرين طلعت من لبنان على حفلتها فى الكويت اللى بردوا تصدرت التريند لما طلعت المسرح وسألت الجمهور بتحبوا حسام، قالولها بأعلى صوت “لا مبنحبوش”
ومن الكويت على لبنان تانى وسط الحبايب، مش منه شلبى بتصور فى لبنان مسلسلها الرمضانى الجديد؟ ومقولوكوش بقى لما شيرين تتلم على منة .
نضال الأحمدية بقى كعادتها معاها سيديهات شيرين وحسام وكشفت المستور وقالت إن شيرين عندها بيت في لبنان من زمان، بس هي كانت بتيجي له زيارات، قعدت في الأول في فندق علشان بتجهزه وتجدده .. إنما هي راجعة مصر.
واهو بردوا يقفلوا على نفسهم وتبقى خناقتهم منهم فيهم مش فى الفنادق وسط الناس وياللى مشوفتش شوف.
لكن الخبير القانوني لشيرين نفى الكلام ده ،وقال إن شيرين رجعت مصر خلال الساعات اللي فاتت..
شيرين المفروض هتقدم حفلة عيد الحب يوم 10 فبراير اللي جاي في بيروت،ولكان فى أخبار عن إلغائها لحفلة وخلاف بينها وبين منظمي الحفل،لإنهم إتسرعوا فى الإعلان عن المعاد قبل الاتفاق على التفاصيل النهائية معاها.
ياترى هتعمل الحفلة وترجع مصر تانى ولا هتستقر خلاص فى لبنان و إيه اللى ممكن يحصل قبل الحفلة وبعدها وفى الحفلة نفسها هل هتغنى وتتكل على الله ولا بردوا عفويتها هتقوى قلبها على الجمهور كعادتها؟كلها كام يوم ونعرف اللى فيها تابعونا .
