صدمتين في حياة الراحل أحمد زكي دفعوه لإنهاء حياته..إحداهما بسبب سعاد حسني

عاش ومات يتيم .. سنين طويلة يبحث عن الاحتواء والحب والسند، مهما وصل لنجاح كان دائما حزين ومكسور ، الدنيا كانت قاسية معه لكن مقابل هذا ربنا زرع حبه في قلوب الملايين من اول مرة شاهدناه فيها على الشاشة ، كان يخطف قلبك بهدوءه وخجله وطلته على الشاشة لكنه أخذ نصيبه الاكبر ورزقه في مسيرته الفنية وحب الناس، لا يوجد اثنين يختلفوا عليه ..إنه النمر السود احمد زكي

النجم أحمد زكي حياته مليانة محطات كتير قاسية وحزينة ، وشئ الهي كدا يخليك عايز تحضنه وتطبطب عليه لما تشوفه خاصة في بداياته الفنية اللي كانت صعبة ، ورغم انه وصل لمكانة كبيرة بتاعته لوحده في الوسط الفني إلا أنه كان في حياته الشخصية حد تااااني خالص ، وفضل الحزن ملازمه سنين كتييير لدرجة انه حاول ينتحر حوالي 3 مرات
تعالوا نعرف تفاصيل اكتر عن حياة أحمد زكي وليه حاول يموت نفسه وازاي كل مرة كان في حد بيلحقه وينقذه ..

أول مرة كانت في بداية مشواره الفني ، وكان عمل مسرحية مدرسة المشاغبين ، وبعدها اتعرض عليه يقدم دور البطولة في فيلم الكرنك مع النجمة سعاد حسني ،، طبعا أحمد زكي مصدقش نفسه انه هيمثل قدام السندريلا وحس ان الدنيا بتفتحله ايديها ، لكن على طول خد القلم ، لما رفضه المخرج رفضه وقال :” ازاي ده يحب سعاد حسني؟”

الجملة كانت تقيلة على قلب احمد زكي وحس بإهانة وفشل وجاتله حاجة عصبية شديدة خلته كسر كوباية ازاز كانت قدامه ، واستخدمها عشان يحاول يحاول يقطع شرايينه ، وكمان حاول يرمي نفسه من البلكونة لكن المنتج إيهاب الليثي و النجم عادل أدهم لحقوه وأنقذوه ، وبعدها ربنا عوضه بدور كبير مع سعاد حسني برضه في فيلم شفيقة ومتولي

اعتبرها احمد زكي لحظة شيطان و فاق منها وكمل حياته وربنا عوضه بنجاحات كتير وبدأ يلمع ويكبر ويبقى فنان مختلف عن كــــل الموجودين ، لحد ما حب هالة فؤاد واتجوزها وخلفوا ابنهم الوحيد هيثم وعاشوا حياة هادية جميلة كذا سنة

وعشان هالة فؤاد كانت ممثلة برضه وكان عندها رغبة انها تكمل مشوارها الفني ومش عايزة تقعد تتفرغ لبيتها وابنها وزوجها ، زادت خلافاتها مع احمد زكي و انفصلوا في هدووء وبدأ كل واحد يعيش حياته من جديد ،

حتى بعد طلاقهم فضل احمد زكي يحب هالة فؤاد زي الأول ، لكن قدرها انها دخلت في رحلة مع المرض وجالها سرطان وحاولت تتعالج منه وسافرت فرنسا ورجعت ، لكن مخفتش بشكل نهائي ، والمرض زاد عليها واتوفت وهي في شبابها سنة 93.

احمد زكي مكنش متوقع ان ده اللي هيحصل ، وكان بيصور فيلم جديد ، ولقى بنت داخلة عليه وبتعيط وبتعزيه في وفاة هالة فؤاد .. الصدمة خلته يفقد وعيه واغمى عليه ، ولما فاق دخل في حالة صعبة وجري على السور عشان يرمي نفسه من كتر صدمته في وفاة حبيبته ، وفضل يعيط ويقول ” انا اللي موتها انا اللي قتلتها”