أمير عيد.. مطرب عاش معاناة كبيرة جدًا فكيف جرب كل أنواع الممنوعات و خسر 50 كيلو من وزنه؟وهل تلك الممنوعات هي السبب في الداء الذي عانى منه واضطر بسببه يذهب لدكتور نفسي من أجل العلاج.
ورغم كل المعاناة اللي عاشها أمير عيد قدر يوصل للعالمية وكمان مكانش ليه في التعليم ولا بيروح المدرسة؟.. إيه اللي حصله وحكايته إيه مع كل المشاكل اللي حصلتله وواجها إزاي وليه بيقول على نفسه صوته وحش؟ كل ده هتعرفوه معايا لما تتابعوا التقرير ده.
ناس كتير بتقول إن صوت أمير عيد مبيجيش معاهم سكة ومش حافظين أغانيه ولا عارفينه بيقول إيه لكنه قدر يكون ليه جمهور ويعمل شعبية كبيرة بأغانيه اللي فعلًا محبوبة عند فئة من الناس.. وتقدروا تقولوا كده إن ثورة يناير وشها وش الخير عليه وهي اللي فتحتله باب إنه ينتشر ويكون معروف بعد ما أسس فرقة كايروكي وعملوا أغاني زي يا لميدان وصوت الحرية وبقت الفرقة هي صت الثورة.. لكن بردوا حياته الشخصية كانت صعبة للغاية.. لدرجة إن شهر العسل بتاعه بعد ما اتجوز حبيبته حصله فيه مفاجأة كبيرة جدًا مكانش حد يتوقعها.
ملهوش في التعليم
أمير عيد مكانش ليه في التعليم ووصل لحد تانية إعدادي وقال لمامته المدرسة مش جاية معايا سكة ومش عاوز أروح قالتله ولا يهمك متنزلش من البيت ولا تروح وعشان هي شغالة مُدرسة قدرت تظبطله موضوع الغياب عشان يروح على الامتحانات.
طبعًا هو مش عاوز يسيب المدرسة ويصيع هو عاوز يعمل حاجة بيحبها نزل الشارع واتعرف على 4 روشين زيه وعملوا فرقة مع بعض بعد ما اتعلموا الموسيقى ويوم في التاني قدروا يعملوا أغاني وحفلات بس مكانش بيحضر حد لحد ما اتعرفوا على مهندس الصوت علاء الكاشف اللي نقلهم نقلة تانية بعد ما فتحلهم الاستوديو بتاعه لحد ما جت ثورة يناير وأغانيهم لفت السوشال ميديا وبقت الثورة وش الخير عليه.
قصة حب أمير عيد
قصة حب أمير عيد كانت في الأصل قصة حب الطفولة لبنوتة اسمها ليلى ودي رجع ليها لما بنا فتحها عليه ووصل للشهرة والنجومية أصله وصل للعالمية وعمل حفلات في دول أجنبية كتير وكمان الفرقة بقى ليها 7 ألبومات.
وحبيبته ودي اتعرف عليها في النادي.. وقتها كان واحد صاحبها جاي النادي ومعاه سلحفاه وبيفرج صحابه عليها لحد ما ليلى اتضايقت وشخطت فيه وهزأته وقالتله دي روح يا أخي هو انت معندكش دم حرام عليك دي مش للفرجة وأمير كان بيراقب اللي بيحصل ولما بطلت زعيق راح عليها قالتله عاوز إيه انت كمان قالها هششش أنا بحبك ومن وقتها الموضوع قلب جد واتقدملها واتجوزوا.
معاناة أمير عيد
أمير عيد عاش معاناة وهو صغير كان عنده داء فرط الحركة وده أثر على دراسته.. والمعاناة دي استمرت حتى لما بقى كبير.. وقتها كان في الاستوديو وأبوه فضل يرن على تليفونه كتير جدًا وهو مردش ولما شاف العدد قلبه اتقبض ولما روح البيت لقى باباها روحه صعدت للي خالقها سنة 2017 ومقدرش يسامح نفسه وعاش في دوامة ما يعلم بيها إلا ربنا وراح لدكتور نفسي حكى اللي حصل وقعدت تعيط معاه وبعدها بدأت تعالجه على جلسات عشان يعدي المحنة دي ولحد دلوقتي لسه بيتعالج.
متخيلين بقى إن أمير عيد جرب كل أنواع الممنوعات.. أيوه زي ما بقولكم كده بس مش عشان هو عاوز يشرب لأ ده من باب الفضول ومش هي السبب في إنه فقد وزنه ده موضوع باباه وإحساسه بالذنب ناحيته هو اللي خلاه دخل في مود اكتئاب وعزف عن الطعام ونزل من 115 كيلو لـ50 كيلو.
الأزمة بقى إنه قبلها مامته لما فرحت بيه لقاها في يوم فرحه مش متزنة ودايخة وقال يمكن تعب الفرح.. بس أمير عيد كمل حياته عادي وراح شهر العسل ولما رجع لمامته اتصدم لما لقاها مش عارفاه وبتقوله انت مين يا بني وعرف بعدها إنها مصابة بالخف الوعائي وبقى عندها زهايمر وعايشة لحد دلوقتي مش عارفاه وأهو بيزق الأيام.
