عامل نظافة كشري التحرير مازال حديث السوشيال ميديا، رغم اناا لا نعرف عنه ماذا يعمل ، ولكنه فجأة قرر أن يدخل عالم الفن ويقدم أو أغنيه له بالتعاون مع نجل شعبان عبد الرحيم لمعرفة المزيد من التفاصيل تابعونا من خلال التقرير التالي:
تريند عامل النظافة كل يوم يطلع بحاجة جديدة، وباين كدا خطته مشيت في منتهى الذكاء، بعد ما انتشر امبارح صورته مع مذيعة ماسك ايديها وقالوا انهم اتخطبوا.. تخيلوا انه هيعمل اغنية مع عصام شعبان عبد الرحيم!
وده اللي قاله عصام في الفيديو اللي نزله على صفحته على الفيس بوك، مع محمد عامل النظافة وهما بيغنوا مع بعض جزأ من الاغنية الجديدة واسمها ” أزأز واجري”
وقال: انتظروني عصام شعبان عبد الرحيم ومحمد عامل النظافة واسم شهرته الجديد “محمد الجدع” في غنوة جديدة.
والاغنية من ألحان عصام، وكلمات إسلام خليل.. الصراحة احنا مشوفناش اي كلمات مفهومة.
فينك يامصطفى ياكامل تشوف اللي بيحصل..الغريب ان الصحافة والاعلام اكتشفوا إنه مش عامل نظافة أصلا ورغم كدا برضو الاضواء كلها مركزة معاه.
والقنوات بتتسابق يظهر معاهم.. واكتشفوا إن محمد عامل النظافة عنده مدير أعمال، وبيحددله اسعار ظهوره في القنوات وده كمان اللي قاله المخرج ومدير شركة التسويق مؤمن نور، لما اتطلب منه في شغله يتواصل معاه عشان يطلع معاهم في حلقة، وقاله: أنا عندي مدير أعمال وبأخد فلوس عشان أطلع في أي لقاء.
سبحان مغير الاحوال..وقال مؤمن نور: كل اللي كان بيعمله تمثيل وعرفت إنه مش عامل نظافة، الصراحة هو مش السوشيال ميديا بس كمان اللي متفاعله معاه، هو دلوقتي أي حد عايز يتشهر أو يركب التريند، يروح يعمل لقطة كدا معاه عشان الناس تتكلم عنه.
وكلهم مشيوا على خطى الممثل أحمد العوضي لما عزمه في محل اكل سمك وجمبري وجاب المواقع الاخبارية والجرايد تصورهم، وقال انه جابله وظيفة سواق نقل.
زي محلات اللبس اللي استضافته عندهم في المحل وقدموله هدوم الشتا هدية، وبنرجع نشتكي في الاخر الناس دي بتطلع تريند ليه!
أما عن الكلام اللي اتقال امبارح بخصوص صورته مع المذيعة في الاستوديو وإعلان خطوبتهم، بعد ما الصورة طلعت تريند، نكتشف إن المذيعة اصلا متجوزة وعندها ولد، يعني مذيعة عايزة تركب التريند، فبتعلي على التريند، لا وبتقول كمان إن عامل النظافة رفض يحضر مؤتمر المناخ.. ليه وهو كان المفروض يحضر؟
زي ما حضر عزا المحامي فريد الديب.. إلا صحيح هو كان بيعمل إيه هناك، ايه اللي بيربطهم ببعض، اللي يضحك بقى إن كل الناس اللي كانت متعاطفة معاه، وقعدت تشتم في عامل محل كشري التحرير اللي طرده من المحل بسبب لبسه رغم إنه كان معاه فلوس الاكل، بقوا عايزين يروحوا يتأسفوا للراجل بسبب انهم زهقوا من التريند ده.. ما مكنوش يعرفوا إن كل ده هيحصل.
