عم ربيع يجعل الحظ يبتسم للفنان رشدي الشامي بعد أدوار الشر

درس المسرح وله 120 مسرحية، واشتهر بأدوار الشر في المسلسلات، وكان ببات مع الصيادين لكي يرف أسرارهم، لكن كيف تعرض للنصب وكيف أضاف تحت الوصاية لمسيرته؟

مبدع والحظ ابتسم ليه بعد سنين طويلة من التعب، وعمره ما فكر ييأس، بالعكس ده فضل يكافح سنين طويلة لحد ماوصل للجمهور، وفي لحظة من اللحظات ظهر على شاشة التلفزيون بصورة كبيرة، بعد ما كان بيظهر بأدوار ثانوية، وكل ده بسبب شطارته اللي ملهاش زي.

كان موظف حكومة

الفنان رشدي الشامي مواليد 28 مارس 1958، ومن محافظة الشرقية، عاش عمره كله في حي السكاكيني، بدأ شغله في المسرح القومي من عمر 9 سنين، كان متعلق بالمسرح جدا لدرجة إنه اتخرج من معهد الفنون المسرحية، اتعلم التمثيل في المسرح وكان موظف حكومة مسرحي لسنين طويلة، وخلال المدة دي قدم 120 شخصية مختلفة على خشبة المسرح، لكنه وبرغم كل ده مقدرش يعمل شهرة واسعة من خلال المسرح، لحد ماجاله دور ثانوي في مسلسل بوابة المتولي من 30 سنة، وهنا كانت نقطة انطلاقه، واللي بعدها حقق شهرته في مسلسل واحة الغروب.

الفنان رشدي الشامي قال إنه اتعرض للنصب مرتين خلال مسيرته الفنية، لأنه في العملين أدى الدور بتاعه وخلص المسلسل واتعرض، وهو طالب بحقه لكن المنتج فضل يماطل معاه، ولحد النهارده مخدش حقه.

قدر يلفت الأنظار

الفنان رشدي قدر يلفت كل الأنظار ناحيته من خلال شخصية ربيع، واللي كان بيساند حنان طول الوقت، وقدر يثبت إن مش هو عزت الشخصية الشريرة اللي ظهرت في مسلسل أزمة منتصف العمر، مش بس كده ده كمان قدر يثبت لينا من الدور ده إن الدنيا لسه بخير، وإن ممكن أي حد يساعدك من غير مقابل.

 كان بيبات مع الصيادين

لكن الفنان رشدي الشامي قال إنه تعب جدا في التصوير، وخصوصا إنه كان بينزل يقعد مع الصيادين وأحيانا بيبات معاهم عشان يعرف ردود أفعالهم ناحية تصرفات معينة بتحصل في البحر، وإزاي بيتكلموا، وفضل يذاكر طريقة كلام الدمايطة زي التلاميذ، وبالرغم من إن التصوير في البحر كان صعب جدا، ومش معاه لوحده لكن مع كل فريق التصوير، لكن رشدي الشامي قال إنها بالنسبة ليه تجربة جديدة وصعبة عليه، وكانت بالنسبة ليه تحدي كبير.

فرحان بشخصية عم ربيع

لكن بعد ما المسلسل اتعرض وردود أفعال الناس ظهرت، بدأ الفنان رشدي الشامي يعبر عن سعادته عن نجاح المسلسل، وخصوصا بعد ما الناس ارتبطت بشخصية عم ربيع، واتغيرت الفكرة اللي كانت متثبته بدوره في شخصية عزت بإنه شخص شرير، وقال الفنان رشدي الشامي ” إنه بيكون مبسوط جدا، ومن حق الجمهور يقول اللي هو عايزه، سواء بيشتموه أو بيمدحوا فيه”.