“الصحفيين فلوسهم حرام”، هذه كانت أحدث فتوى للفنان حسن شاكوش، والذي اعتاد دائما يثير الجدل بخلافاته وتصريحاته.. ومثلالعادة الجمهور تكفل بالرد بدلا عن الصحفيين وسألوه “طب وفلوس بنت الجيران”.. لكن الكل شكك وسأل لماذا الآن يتحدث شاكوش عن الصحفيين.
حسن شاكوش يثير الجدل
اتعود الفنان حسن شاكوش، المطرب الشعبي إنه يثير الجدل والخلافات دايما وده اللي ظهر من طريقة كلامه في البث المباشر الأخير اللي طلع فيه.. وقال شاكوش في البث ” فلوس الصحفيين اللى بيعتمدوا بيها على المشاهدات والتريندات كلها حرام.. إنت بتأكل ولادك مال حرام”.. الموضوع عرضه لانتقادات كتير جدا من الجمهور، واللي كان أغلبها أثناء متابعتهم للبث وسألوه..فلوس الصحفيين حرام طيب وفلوس بنت الجيران.
تعليقات الجمهور
ولكن كان أقوى تعليق من أحد متابعيه “هو أطلق النار على الصحفيين فقط، والسؤال هنا لماذا فى الوقت الحالى؟ ولصالح من يعمل شاكوش؟، وهل تصريحاته كانت بالصدفة.. أم أن الفنان أطلق مساميره على الصحفيين فى هذا الوقت”.. ليمتنع الفنان حسن شاكوش عن الرد وقفل البث ولحد دلوقتي محدش عارف سبب انتقاده للصحفيين على الرغم من أن كل المشاهير واللي منهم شاكوش بيعتمدوا فى شغلهم على المشاهدات والتريند.
خلافات مع رضا البحراوي
دي مكانتش أول مرة يثير فيها شاكوش الجدل ويكون ليه خلافات مع حد، البداية كانت مع الفنان رضا البحراوي وفرقته لما طلع على المسرح وكانت فرقة رضا البحراوي موجودة، شاكوش صمم وقتها إنه مش هيكمل فقرته إلا لما فرقة البحراوي تنزل من على المسرح، وبالفعل طلبه اتنفذ وسط استياء من أعضاء الفرقة، لكن الفرقة قررت قبل ما حسن شاكوش ينزل ويخلص فقرته تطلع على المسرح مرة تانية..
شاكوش اتعصب جدا ونزل وقتها بس قبل ماينزل بص لرئيس الفرقة وقال “اللي بنته أبوها طبال هتبقى رقاصة”.. ومن هنا بدأت الخناقة، واللي حاول الفنان حمو بيكا إنه يحلها لكن مقدرش.. ولما وصل الفنان رضا البحراوي الساحل الشمالي وعرف اللي حصل، اعتذر لفرقته، وبدأ يغني لكن فجأة وقف الغنى ونده على شاكوش في المايك، لكن شاكوش مردش عليه.. قال وقتها رضا البحراوي بصوت عالي “كنت عاوزه يدعي لحمو بيكا إنه نجده قبل ما اجي”.
خناقة شاكوش وبيكا
ومش كده بس ده شاكوش كمان اتخانق مع حمو بيكا وعمرو كمال لما ظهرت أغنية “بهوايا” ولما اتسأل شاكوش عن سبب خلافاته معاهم.. قال بأسلوب غير مباشر إنها غيرة فنية.. لكن حمو بيكا مسكتش وقال في بوست على الفيس بوك “أنا اللى عملت حسن شاكوش والكل يشهد بده، فمينفعش أغير منه”.
شاكوش وعمرو كمال
لكن عمرو كمال كان متعصب جدا في رده وقال إن شاكوش بيحاول يهمشه، وكتب على الفيس بوك «مهما حاولت تبعد عمر كمال عن الصورة.. الناس عارفة كويس جدا مين بيغنى إيه وعارفة أن (سكر محلى محطوط على كريمة).. ( بنت الجيران شغلالى أنا عنيا).. كوبليهات عمر كمال”، ومش بس كده عمرو كمال اتهم حسن شاكوش إنه رفض إنه يديه أجره من الأغنية.
شاكوش وهاني شاكر
وبسبب أغنية “بهوايا” قرر الفنان هاني شاكر واللي كان نقيب الموسيقيين وقتها إنه يوقف حسن شاكوش عن الغناء، لكن بعد محايلات كتير وواسطة من باقي أعضاء النقابة واللي كلمهم حسن شاكوش كلهم وافق هاني شاكر إنه يغني وبعدها أخد الكارنيه.
