انتشر خلال الايام الماضية خبر طلاق الفنان تامر حسني وبسمة بوسيل، وانقسم الجمهور بعدها بين الصلح والعودة وبين الطلاق النهائي ولكن كثير منكم لا يعلم المفاجأة الكبرى بشأن هذا الطلاق والتي سنكشفها من خلال التقرير التالي:
طلاق بسمة بوسيل وتامر حسني
طبعًا مفيش حد في مصر والعالم العربي ميعرفش بموضوع طلاق تامر حسني وسمة بوسيل واللي أعلنته الفنانة المغربية بشكل رسمي على حسابها في “إنستجرام” وعشان الموضوع يبقى أكيد طلع تامر حسني ورد إن كل شيء قسمة ونصيب خلاص وهو هيفضل أب وأخ وصديق وسند عشان في بينهم عشرة 12 سنة وأولاد، المهم الموضوع خلص لحد هنا والجمهور بردوا لسه عنده أمل إنهم يرجعا البعض تاني وإن الطلاق اللي بينهم ده يكون حلم وميقعش بجد.
مفاجأة في طلاق تامر حسني وبسمة بوسيل
وجمهور تامر حسني دايمًا بيتمناله الخير وكل كلامهم مبني على إن هيكون في مفاجأة الكام يوم الجايين وغن الاتنين هيرجعوا لبعض تاني ويتلم الشمل ما بينهم، وده بقى مش مبني على أوهام ده ممكن يكون معاهم حق لأن الاتنين حصل بينهم انفصال غير رسمي مرتين قبل كده ورجعوا تاني والمرة الأولى كانت سنة 2014 واتقال إن في أزمة بتهدد استقرار حياة الاتنين وده بسبب غيرة بسمة من معجبات جوزها، وتامر أكد إن في خلافات لكنه مش هيقبل الإساءة ليها بأي شكل من الأشكال، وتقريبًا الموضوع انتهى وقتها بالصلح لكن تامر حب يأكد اللي حصل أكتر ويعتذر ليها في مقابلة تلفزيونية وقال إن مهنة الفن صعبة للغاية.
وفي 2020 أعلنت بسمة بوسيل إنها هتنفصل عن تامر حسني وإنها بتجهز أوراق الطلاق عشان يخلصوا الأمور رسمي وده بعد تداول مقطع فيديو لتامر مع معجباته في مواقع التواصل الاجتماعي، وقالت: “لكل الناس اللي بتبعتلي صور وفيديوهات لتامر وشايفة إنه مش بيعملي احترام سواء في صور أو فيديوهات، ياريت تبطلوا تبعتولي أي حاجة عشان مش فارقلي أي صور وكمان أحب أعرفكوا إني إحنا بقالنا فترة منفصلين وبنحضر أوراق الطلاق”، بس بسرعة الاتنين رجعوا في كلامهم.
ومن شهور قليلة حذفت بسمة بوسيل كل صورها الشخصية من على إنستجرام، وقالت في منشورات ليها إنها مش هتقبل إهانة أي طرف من عيليتها وهوب ألغت متابعة جوزها واتقال إن في خناقة حصلت بين تامر وشقيق زوجته بسمة وده خلاها تطلب الطلاق بس الميه رجعت لمجاريها ورجعت الصور والمتابعة من تاني، ودي كلها أحداث الجمهور بيبني عليها إنها مستني مفاجأة جديدة.
فنانين اتطلقوا ومرجعوش لبعض
وزي ما في فنانين حياتهم مكانش فيها استقرار بس قدروا يظبطوا الموجة ويعدلوا الميزان ويكملوا في فنانين لا يمكن يفكروا يرجعوا لبعض بعد ما اتطلقوا زي رانيا يوسف اللي لما اتطلقت من المنتج محمد مختار اشترطت عليه ميكونش في بينهم رجوع تاني، وكمان أسما شريف منير لما اتطلقت من الفنان محمود حجازي مفكرتش ترجعله، وياسمين رئيس لما اتطلقت من هادي الباجوري قالت توبة ومش راجعة تاني ودلوقتي عايشة حياتها مع حبيب جديد وزيها الفنانة اللفنانية نادين نجيم اللي اتطلقت من هادي الأسمر ومعاها منه أولاد ومرجعتش تاني ليه، ده غير الفنان السوري عبدالمنعم عمايري وسولاف فواخرجي وكمان الفنان اللبناني وائل كفوري وبنت بلده نوال الزغبي وغيرهم كتير.
كريستالة حسين فهمي
ويعتبر الفنان حسين فهمي من أكتر الفنانين اللي شايفين إن الطلاق لو وقع بين زوجين مينفعش يرجعوا لبعض تاني، ده حتى لما اتجوز 5 مرات مفكرش يرجع ولا واحدة تاني بعد الطلاق رغم إنه عاش مع أم ولاده 14 سنة ومع ميرفت أمين 12 سنة بس خلاص ده قرار نهائي، وكمان المرة الوحيدة اللي خطب فيها وفسخ مفكرش يرجعلها ويتجوزوا وأهو يجرب حظه، وده لأنه شايف الطلاق زي كريستالة لو اتكسرت مبتتصلحش تاني، وكمان طالما اتذكر الطلاق يبقى في سبب مهم عمل استحالة للعشرة تاني.
