داخلين على 9 سنين جواز. تركت الغناء واعتزلت من اجله وقلنا دي هتربي العيال بس المفاجأة إن مفيش عيال وممكن ميبقاش في عيال خالص كمان.. دي ببساطة حياة المطرب رامي جمال مع مراته المطربة ناريمان.
يا ترى إيه المشكلة اللي بسببها رامي مخلفش لحد دلوقتي؟ وإيه موقف مرات رامي من الموضوع كله وليه أهله متضررين من الحكاية دي؟.. ويا ترى إيه حكاية انفصال مراته عنه وإيه اللي قالهولها رامي؟.. كل دي كواليس وأسرار ومفاجآت نارية هتعرفوها لما تتابعوا معايا التقرير التالي:
كل سنة في شهر 10 بنشوف المطربة المعتزلة ناريمان بتحتفل بعيد جوازها من المطرب رامي جمال والسنة اللي فاتت كانت تامن سنة ليهم.. كل ده بيحصل وهما الاتنين عايشين راضيين باللي اختاره ربنا ليهم.. بس الغريبة شوية والمفاجأة بقى إن رامي يطلع ملوش في الخلفة وناريمان لسه مكملة معاه ورامي استغرب موقفها وكان ليه تعليق على الموضوع ده.. بس هي مكملة لعل وعسى ربنا يكون مخبي حاجة حلوة في السكة ولا حاجة.
أمرك غريب
الخيرة في اللي يختاره ربنا أهو ده بقى إيمان بالقضاء والقدر.. ورامي جمال ومراته ناريمان راضيين بالعيشة اللي هما فيها لحد دلوقتي نمسك الخشب كده وندعيلهم عشان ربنا يكرمهم قصاد صبرهم ده.. لكن في ناس لما سمعت رامي جمال بيقول إنه مش بيخلف قالت ده أمره غريب وطالع يتكلم كده عادي.
أصلًا رامي كل فترة كده ليه مفاجأة في حياته الشخصية بيطلع يتكلم عنها وشكل المفاجآت كتير فاكرين لما قال إنه عنده داء البُهاق وقعد يتعالج منه واتعرض لتنمر وحكايات كتير أوي.. أهو طلع من كام ساعة كده وقال إنه عنده عيب ومش بيخلف ومراته ناريمان يتعملها تمثال والله عشان اللي زيها قليلين أوي عشان هي مضحية بأمومة ودي حاجة كل واحدة بتتمناها.
تفاصيل الحكاية
رامي جمال قال يارب أنا راضي وعشان الرضا ده هتلاقوه شخص ناجح في حياته عنده جمهور كبير بيسمع أغانيه وبيحب وجوده على الساحة وحفلاته اللي بيعملها.. تفاصيل الموضوع إن المشكلة عند رامي وهو عنده عيب يمنعه غنه يخلف عارفين لما يكون حلمك تجيب حتة عيل يملا عليك الدنيا أهو ده كان الحلم الكبير بالنسبة لرامي بس مع الوقت لقى إن مفيش فايدة راح للدكاترة واكتشف المفاجأة إن العيب من عنده هو مش من مراته خالص.
والجديد بقى إنه حاول كتير جدًا يكون عنده طفل واحد بس مفيش داعي للعناد بقى ولازم يكون راضي باللي مكتوب والعيب اللي عنده يمنع خالص الخلفة وتقريبًا عاوز معجزة.
رامي قال لمراته امشي وعيشي حياتك ومتقلقيش لو سيبتيني ومشيتي مش هقول عليكي قليلة الأصل ومفيش وقت تعملي جدعة أصل هي نفسها تبقى أم بردوا ومش هيرضى ليها أذى بسببه بس هي طلعت أصيلة ومكملة الحياة معاه لحد دلوقتي وقالتله الخلفة دي رزق مربوطة بالاتنين ويمكس أسيبك واتجوز غيرك ومخلفش منه يبقى خسرت الإنسان اللي بحبه.
ومرات رامي بقت هي عوضه من ربنا مش محسساه إن عنده عيب لدرجة إن التفكير في موضوع الخلفة ده بقى بسيط جدًا عكس الأول وكمان بيعتبر ولاد اخواته هما ولاده والأحلى من كده بقى إنه بيقول مش يمكن ربنا منع عندي الحاجة دي عشان أقول الحمد لله ما الحمد مش في العطاء بس.
قصة الانفصال
في يوم من الأيام كان فاضل شهر على عيد جواز رامي جمال ومراته ناريمان والكلام ده كان السنة اللي فاتت وهنا بقى قامت مشكلة بينهم وبسببها ناريمان اتسرعت وقالت إنها انفصلت عن رامي وبتتمناله الخير ويكون سعيد في حياته الجديدة.. وقتها كتبت الاستوري على حسابها في إنستجرام ولغت متابعته بس سابت الصور.. والواضح بقى إن رامي احتوى الأزمة دي علطول واتحذف الاستوري ورجعت المية لمجاريها والاتنين مكملين وربنا يديم حياتهم في سعادة.
لكن مشكلة الخلفة دي عاملة أزمة عند أهل رامي وقال إنهم نفسهم يشوفوله حتة عيل يعوضه عن سنين الحرمان دي.. ويا عالم ده ممكن يحصل ولا لأ وأهو الطب اتقدم ويمكن الفترة الجاية نشوف رامي جمال بيحقق حلمه في الخلفة والمعجزات اللي حصلت في المواضيع دي متعدش.
شاكونا بتعليقاتكم هل رامي جمال ومراته هيفضلوا مكملين حياتهم مع بعض حتى لو مخلفش ولا ممكن نسمع خبر انفصالهم بسبب الموضوع ده؟.
