فاروق الفيشاوي النجم الوحيد اللي قدر يضرب الزعيم عادل إمام في مسيرته الفنية كلها وهذا كان أمر ممنوع تماما لا أحد يقدر أن يقوم بها مع عادل إمام مهما كان هو من ، لكن فاروق الوحيد الذي كسر القاعدة وقدر يضربه والزعيم لم يستطيع فعل شئ. تعالى احكيلك قصة ضرب الزعيم وليه مقدرش ياخد موقف مع الفيشاوي.
عادل إمام من أول ما بدأ ياخد وضعه ويبقى نجم مصر الأول ، كان ليه طقوس معينة كدا في التمثيل والكواليس وكمان الأدوار اللي بتجيله ، وكان يقدر يشيل اي مشهد مش عاجبه ، وكان في حاجات كتير بيرفضها تماما لو اتعرضت عليه في فيلم مثلا ومنها موضوع الضرب.
عادل إمام كان مستحيل يوافق يعمل مشهد ينضرب فيه ، ومع انه تمثيل الا انه كان بيرفض ده تماما ، ولو ركزت وراجعت كل أفلام الزعيم من بعد الأبيض والأسود ، مش هتلاقي اي فيلم بيتعرض فيه الزعيم للضرب، ودي بالنسباله كانت مسألة حياة أو موت ، مع ان الفنان يقدر يعمل اي حاجة قدام الكاميرا لكن الزعيم استحاااااااالة يتضرب ، لكن هو يضرب بس.
وفي يوم جه يصورفيلم المشبوه مع النجم فاروق الفيشاوي ، وكان في مشهد المفروض فاروق يضرب فيه الزعيم ، وطبعا لان المخرج عارف ان عادل إمام مستحيل يوافق فكان مش عارف هيتصرف ازاي في المشهد ده ، ومينفعش يتغير ولا يتلغي، هو الفيلم مكتوب كدا والمشهد لازم يطلع زي ماهو ، بس المشكلة في الزعيم اللي محدش بيقدر يضربه قدام الكاميرا.
وفي كواليس فيلم المشبوه ، قعد فاروق الفيشاوي مع عادل إمام عشان يشوفوا هيعملوا ايه في المشهد ده لان كل الممثلين عارفين ان عادل إمام مش هيعمل كدا ، لكنه اتفاجئ برد فعل الزعيم اللي وافق لأول مرة في مسيرته الفنية انه يتعرض للضرب في فيلم.
وقال عادل إمام لـ فاروق : “دورك اعمله زي ما هو.. عيش يا فيشاوي” ،، طبعا الرد كان مفاجئ وفراق لما صدق بقى خد موافقة الزعيم وتقمص الشخصية جدا وفعلا ضرب عادل إمام في المشهد ضرب حقيقي مش تمثيل ، وبكدا كان فاروق الفيشاوي هو اول ممثل قدر يكسر قواعد عادل إمام ويضربه في فيلم من أفلامه.
فاروق الفيشاوي اتكلم عن كواليس الفيلم ده قبل وفاته ، وحكى هو عمل ايه مع الزعيم لدرجة انه مكنش هيمثل الفيلم ، وقال : “أنا اعتذرت عن الفيلم، كنت لسه طالع من بابا عبده وبعمل أدوار جافة في التلفزيون وبعدين آجي أشتغل سينما قدام عادل إمام وهمسكه وأديله قلم يسمّع فخوفت على روحي قولت لأ ده بطل شعبي ونجم اسمه عادل إمام آجي أنا وأبهدله الناس مش هتتقبل فروحت واعتذرت للمنتج ، و استدعاني المخرج سمير سيف وقالي شوف أنا راجل بفهم في الشغلانة دي .. فيه مشهد – وأنا أضمنلك ده – الناس هتسقفلك في السينما ودي مبتحصلش غير في المسرح”، وكان يقصد المشهد الأخير اللي بضرب فيه الرصاصة وبنقذ الولد الصغير .. أقنعني من حيث لا أعلم، وفعلًا السينما كانت بتسقف”.
الزعيم عمل كدا عشان حاجتين ، اول حاجة لان المشهد فعلا مكنش ينفع يتغير وكان لازم يطلع الفيلم بالشكل ده ، وهو كان بيخاف جدا على شغله وبيحب يعمل كل فيلم بتفاصيله اللي بتخيله ينجح ، فاتنازل المرة دي وقبل يتضرب مرة واحدة بس في فيلم المشبوه.
الحاجة التانية هي ان عادل إمام كان بيحب فاروق الفيشاوي جدا ونجحوا مع بعض ومثلوا كذا فيلم سوا ، وأول تعاون بينهم كان فيلم غاوي مشاكل سنة 1980 ، والسنة اللي بعدها عملوا المشبوه اللي كان فيه مشهد الضرب ، وبعد 9 سنين عملوا فيلم حنفي الأبهة اللي نجح نجاح رهيب ، وكانوا عاملين دويتو تحفة مع بعض هما الاتنين ولحد دلوقتي الفيلم لما بيتعرض الناس بتحب تتفرج عليه ، ويعتبر من احلى أفلام عادل إمام.
ومرت السنين وكل واحد فيهم كمل مسيرته الفنية لوحده ومجمعهمش أفلام تانية ، لكن سنة 2018 عمل الزعيم مسلسل عوالم خفية ، وظهر فيه فاروق الفيشاوي ضيف شرف.
