خناقة كبيرة قامت بين الإعلامية رضوى الشربيني والإعلامية ياسمين عز على السوشال ميديا وياسمين قدمت وصلة ردح الكل بعدها شبهها بمرتضى منصور يقصدوا إن لسانها فالت منها، فماذا حدث وما كواليس هذه الخناقة ومن المقصود بكلمة “مظلوم” التي كتبتها ياسمين، كل هذا ستعرفوه من خلال التقرير التالي:
كلام منسوب لرضوى وهي مقالتهوش
فجأة بقى اسم رضوى الشربيني بقى تريند بسبب كلام منسوب ليها هي مقالتهوش أصلًا، بس زي ما شوفنا صفحة على مواقع التواصل كتبت تقول: “البيت بفلوس الراجل وتيجي مراته تقوله اقلع الجزمة علشان السجادة، ده أنا أحط فساتيني الماركات تحت رجله يمشي عليها”، وهوب مين اللي قال الكلام ده رضوى الشربيني، رغم إن الكل عارف إنه مش كلامها وإن اللي قالته كانت ياسمين عز في حلقة من حلقات برنامجها “كلام الناس”، وهنا رضوى مسكتتش ودافعت عن نفسها بتقول: “أنا ست عندي كرامة كلام العبيد ده مش بتاعي”، وده اللي استفز صاحبة الكلام الأصلية ياسمين.
ياسمين عز داخلة خناقة
وزي ما يكون ياسمين عز مستنية اللي ينكشها وطلعت بكلم محدش كان يتوقعه ورغم إنها مجابتش سيرة رضوى الشربيني في جملة مفيدة بس كل حاجة مفهومة والجمهور أذكى منه مفيش، فقالت: ويحك يا دعسوقة.. كرامة إيه يا أم كرامة بلاستيك أطرافها مطاط، تمط وتنكمش حسب المصلحة والظروف المحيطة.. مدام بليز كرامتك وقعت منك آخر مرة هناك.. ابعتي عبد (مظلوم) من عندك يجيبها قبل ما تسيح فالشمس، واحكيلنا بالمرة قواعد بيات المرأة الأربعون بره بيت الزوج من غير إذنه سلينا كده في الإجازة لانك بقيتي مملة وشطبتي محتوى حتى تلقيحك ممل زيرو محتوى زيرو أنوثة بس للأمانة استرجال ليفل الوحش”.
وكملت ياسمين عز بتقول: “ده أنا مش بس أدوس على الفساتين الماركات ده أنا أدوس على أي حد علشان خاطر الفرعون الصغير الكبير بعمل ده في الحياة العادية وبقوله في العلن إنما بقى لما يكون في خرابة بيوت بتبوس الجزم وتعمل فيلم (مظلوم) وتطلع في العلن تحكيلنا مأساة المرأة الإغريقية.. كده إنتي محتاجة علاج يا مدام.. روحي اتعالجي يا مدام في تشوهات نفسية وشياط وغيرة ويأس بدأ يتجلى ويتفشى ويترعرع في الأنحاء وبلاش نشغل أسطوانة المرأة الحديدية علشان المرأة نفسها لو عرفت إنتي إيه هيجيلها صدمة دماغية حضارية”.
تسكت بقى لحد كده لأ دي حذرتها وقالت: “بقولك يا خرابة البيوت العمرانة.. جربي حطي اسمي تاني في تلميحات أو تلقيحات علشان هنتفرج كلنا وقتها أنا هدوس على إيه تاني غير الماركات، وأهو بالمرة نحكي الحكايات، ونسلي الناس في الإجازات”، وطبعًا ياسمين عز معروف عنها دفاعها المستميت عن الرجالة عكس رضوى الشربيني اللي دايمًا بتناصر الزوجات أمام الأزواج”.
مين مظلوم اللي تقصده ياسمين عز؟
وواضح إن كلام ياسمين عز اللي اعتبره الجمهور موجه لرضوى الشربيني خلق تساؤلات كتير بين الجمهور زي إن هل رضوى الشربيني باتت بره بيتها من غير ما تستأذن جوزها؟، طيب هي رضوى بتبوس الجزم وقاصدة تبقى خرابة بيوت؟، بس كله كوم وكلمة “مظلوم” اللي قالتها ياسمين عز دي كوم تاني ودي بقى اللي سأل عنها الجمهور وهنا البعض قال إنه مكان قديم كانت بتشتغل فيه رضوى قبل ما تتشهر بس وماله الشغل مش عيب طالما بشرف وبالحلال، والبعض قال إنها تقصد جوز رضوى الشربيني السابق.
تفتكروا الصدام بين ياسمين عز ورضوى الشربيني اللي اتورطت في القصة دي كلها هيتطور ولا الموضوع هيقف لحد هنا، مستنيين تقولولنا في التعليقات.
