كشفت الفنانة الصاعدة منة عرفة عن بعض الجوانب الشخصية في حياتها، حيث تحدثت عن فترة طفولتها وموقف تعرضت له في الطفولة.
وقالت الفنانة منة عرفة خلال لقائها في إحدى حلقات برنامج «أنتي الأقوى»، المذاع عبر فضائية «المحور» إنها تعرضت للتحرش في الشارع لكنها لم تسكت على ما حدث.
وروت الفنانة منة عرفة الموقف الذي لا تزال تتذكره: «كنا في رمضان وماشيين أنا وأختي في شارع بيتنا، وكنت لابسة بنطلون وتي شيرت، وعليه عباية مفتوحة مفيش في شكلي أي حاجة تثير المعاكسة، كان في 2 رجالة واحد منهم بص لأختي ورمى كلمة سافلة أنا اضايقت، وأختي مشيت بس أنا وقفتله وقلتله أنت بتقول إيه، واتخانقت معاه ولأني مكنتش حاطة مكياج فمعرفنيش».
وأضافت أن هذا الموقف جعل عدد كبير من المارة في الشارع يتوقفون لمعرفة ما يحدث، متابعة: «كنت هتضرب من الراجل، لأن الناس كلهم لازم بيجيبوا الغلط على البنت، حتى أختي هزأتني وقالتلي إحنا هنا مش أوروبا ومحدش هياخدلك حقك».
وتحدثت عن انزعاجها من تلك المواقف، موضحة أنها لا تستطع سماع ما يقوله المتحرش لها وتسكت، «أخويا جالنا وبهدله، وطلعنا على القسم، وللأسف رد فعل الناس مش في صالح البنت، ولو حصل كدة تاني مش هزعق بس هجيب أخويا ونطلع على القسم على طول».
وأوضحت عرفة أنها عانت من التحرش اللفظي، لكن لم تتعرض للتحرش الجسدي، كما كشفت عن أول مرة تعرضت فيها للتحرش، «كان عمري 10 أو 11 سنة، كنت صغيرة جدا، وكنت مع واحدة صاحبتي، خارجة من المدرسة، ولقيت حد من ورايا قعد يقول حاجات أول مرة في حياتي اسمعها، ومقولتش لحد خالص بس قعدت أعيط، وحسيت بحاجة مش كويسة».
وتابعت: «حتى لو أنا مشهورة، بس بردو كوني بنت أو ست بيحسسني إني مينفعش أرد أو اتكلم أو أبصله وامشي في حالي وانزل جري علشان أجيب أي حاجة، دايمًا في ضغط علينا كبنات».
