مثيرة للجدل دائماً، تتفنن كيف كون تريند رقم واحد على حساب كل الرجال، قدرت في فترة قصيرة جدا تعمل لنفسها اسم و تنصب نفسها محامية الرجال وتعطي السيدات دروس على الهواء في كيفية التعامل مع الزوج أو كما سمته الفرعون ، وفجأة اصبح اسم ياسمين عز اشهر من النار على العلم، والكل الآن يسأل .. من هو زوج ياسمين عز ؟؟
ياسمين عز المفروض انها مذيعة قديمة يعني مش اول مرة نشوفها على الشاشة ، قدمت برنامج زمان في بداياتها اسمه عز الشباب على قناة روتانا وقعدت 3 سنين في القناة ، طبعا مكنش شكلها كدا خاااالص وكلنا شوفنا صورة زمان ، واحدة تانية غير اللي بتقعد تدينا نصايح ليل ونهار
المهم ان ياسمين عز بدأت رحلتها الإعلامية من زمان بس محققتش النجاح والشهرة دي ، وكمان دخلت عالم التمثيل وشاركت في كام عمل كدا منهم مسلسل برةالدنيا سنة 2010 ، ومسلسل الصفعة سنة 2012.
واختفت ياسمين عز من وقتها ومحدش كان يسمع ولا يعرف عنها حاجة ، وهوووب فجأة وبدون اااااي مقدمات رجعت على شاشة mbc مصر ، وقدمت برنامج كلام الناس ، وقدرت تبقى المذيعة الأكثر شهرة في مصر والوطن العربي فجأة وفي وقت قصير ، لكن ازاي وليه وامتى وفين ؟؟ منعرفـــــش ..
الاستاذة ياسمين عز خدت منهج ومشيت عليه وبدأت تدافع دفاع مستميت عن الرجالة و تهاجم الستات بشكل جنوني ، ومن هنا بدأ كل الرجالة يحبوا ياسمين عز ، اللي شايفين انها ست بتعرف تتعامل مع الراجل اللي هي مسمياه الفرعون ” ومش عارفين ليه” ، واتحول برنامجها لقعدة ست بتصلح بين المتجوزين ونازلة سلخ في الستات
زوج ياسمين عز
كان طبيعي بعد كل ده ان الناس تسأل هو مين بقى جوز ياسمين عز؟ وهي بقى بتعمل بالنصايح اللي بتقولها في برنامجها ولا مجرد كلمتين عشان التريند ؟
مين الفرعون اللي متجوز ياسمين عز وسايبها طايحة في الناس كدا ؟
الحقيقة الموضوع فيه لغز كبير .. كل المعلومات المتداولة عن ياسمين عز مش مفهاش سيرة جوازها نهائي ، هي محتفظة بحياتها الشخصية لنفسه بعيد بقى عن التريند ، ومحدش يعرف هي متجوزة ولا مخطوبة ولا حتى مطلقة ، ومفيش اي معلومة بتؤكد حالها الإجتماعية ايه وكأنه سر
ده في حد ذاته شئ غريب وعليه علامة استفهام .. ولو هي متجوزة فمفيش مانع يخليها تقول ده حتى بدون ذكر اسم جوزها ، لكن الموضوع سري للغاية
وبسبب كل النجومية اللي وصلت لها ياسمين عز فجأة ، كان في معلومات متداولة بتقول ان ياسمين متجوزة حد تقيل في السر أو عرفي ، كمان اتقال انها زوجة تانية لشخصية كبيرة ، لكن مفيش خبر مؤكد ، وربا تكون دي تكهنات الناس نتيجة الحالة اللي عملاها ياسمين .
كمان الغريب في الموضوع ان ياسمين عز لما ظهرت في برنامج رامز جلال في رمضان ، واتسألت ” هل لما تتجوزي هتطبقي نصايحك للستات دي مع جوزك؟” مجاوبتش ياسمين عز وتم قطع الجزئية دي ومعرفناش هي قالت ايه .. واضح كدا ان في حاجة كبيرة هتكون مفاجأة لينا كلنا عن ياسمين عز.
