خلال الفترة الأخيرة اعتادنا من بعض الفنانيين استخدام طريقة الكلام غير المباشر على خلافتهم من النجوم الآخرين،و هذا ما حدث مؤخرا بين وفاء عامر ومنه فضالي فما سبب الزمة بينهما وهل محمد رمضان له علاقة بالمر؟ تابعونا لمعرفة التفاصيل من خلال التقرير التالي:
إشادة مسبقة
من حوالي 4 سنين كده ظهرت منة فضالي في برنامج تلفزيوني وقالت على دور وفاء عامر في مسلسل نسر الصعيد مع الفنان محمد رمضان شابوه دي عملت دور هائل وربنا يكرمها ويوفقها عملت شغلها بإتقان ويارب تفضل كده وأحسن .
قوم وفاء عامر ترد الجميل لمنة فضالي وتسقفلها جامد على دور نرجس اللي عملته في مسلسل جعفر العمدة اللي هيفضل علامة في تاريخها بعد ما المسلسل حقق نجاح كبير جداً ومكانش ليه منافس مباشر على مستوى نسبة المشاهدة والمتابعة.
لكن اللي بين الاتنين في الخفا بعيد خالص عن الشو والتسقيف اللي بنشوفه ده لكن يلا أهو كله أكل عيش.. طيب إيه اللي بينهم وشغل المخابرات والضرب من تحت الحزام ده؟.
حالة دهشة
واضح كده إن منة فضالي شايلة جواها حاجات كتير جداً مش من الفنانة اللي اتكلمت عنها بس ده من فنانات كتير بيحاربوها في لقمة عيشها ومش عاوزينها تشتغل رغم إن منة ظهورها في أعمال فنية ماشي حاله ولا هي مختفية خالص ولا هي مرطرطة بس قالت من فترة كده لما ظهرت في برنامج إن الحرب شغالة عليها كتير لدرجة إن في فنانة رفضت تشغلها معاها في مسلسل عربي كانت منة فضالي هي البطلة بتاعته لكن الفنانة دي قالت للمخرج لأ متجيبهاش معانا ومنة بتقول إن المخرج قعد معاها وكلمها عن الفنانة دي ومنة شكرا فيها وده اللي خلى المخرج يستغرب ويقولها إن كلام الفنانة دي عليها عكس كده وجابها على التليفون وسمعتها اللي عمرها ما تتوقعه..
طبعاً منة مقالتش مين الفنانة دي لكنها نجمة كبيرة وشغالة وليها تقلها في الوسط الفني والغريبة إنها لما بتطلع تتكلم عنها بتقول كلام حلو في العلن لكن ما خفي كان أعظم.. ومن وقتها منة عملت عليها إكس وبقت تستنى أي فرصة عشان تاخد حقها منها.
وبتقول إنها فعلاً كانت مطلوبة في إعلان تعمله ومنة مرضيتش تجيبها في شغل معاها وقالت جالي فرصة آخد حقي واضرب ضربتي.. أنا مش هيهمني إني أحارب حد بس لما الفرصة تيجي لحد عندي لازم استغلها.. الجمهور توقع إن الفنانة اللي تقصدها هي وفاء عامر لكن منة مذكرتش اسم صريح والموضوع خد وقته شوية لحد ما رجع تاني اليومين دول.
حالة استغراب
لو منة فضالي اندهشت فوفاء عامر استغربت لما اتقالها إن هي المقصودة بكلام منة لكن وفاء ذكية بردوا وقالت إنها أشادت بمنة في مسلسل جعفر العمدة وهتفضل عند رأيها مش هتغيره.. وشوية كلام رنان بقى أنا محدش يقدر يستبعدني من عمل ده مش من الشرف ولا الأمانة..
الشغل أصلا رزق بتاع ربنا ولما وقته ييجي هيوصلك لو انت فين.. وبعدين قالت : “إيه ده هي منة كانت تقصدني أنا في الكلام اللي قالته عن الفنانة اللي بتحاربها؟”.. لأ معتقدش هي مقالتش الاسم صريح ولازم تتكلم عني بالظبط عشان أعرف اطلع وأرد عليها.. لحد هنا ولسه وفاء عامر مستغربة وبتتكلم بوش بريء جداً وكإن فعلاً معملتش حاجة.. لكن إيه علاقة محمد رمضان بالقصة؟.
علاقة محمد رمضان
الفنان محمد رمضان اشتغل مع وفاء عامر واشتغل مع منة فضالي والجمهور ذكي وبيعرف يتوقع مين اللي مقصود بالكلام ومين المستبعد ولما توقعوا كلام منة عن إنه موجه لوفاء عامر دخل محمد رمضان طرف في الموضوع وإنه دعم منة فضالي في موضوع استبعادها فنانة معينة من مسلسل جعفر العمدة وإنها مينفعش تشارك وغالباً منة قدمت الدليل على إنهم مينفعش يشتغلوا مع بعض طبعاً رأي رمضان مجاب ومحمد سامي بيحبه وغالباً خدوا صف منة في موقفها.
تفتكروا منة فضالي تقصد وفاء عامر بكلامها فعلاً؟ وليه في حرب بينهم أصلا وإزاي وفاء بتظهر كده بالشكل البريء ده وإنها معملتش حاجة ولا هي فعلاً ملهاش في الحوارات دي ؟.. اكتبولنا آرائكم في الكومنتات.
