الفنان أحمد الفيشاوي دائما يخرج من جدل ويدخل للآخر والمشكلة أنه من يتسبب في هذا الجدل دون ان يتدخل احد، ولكن هذه المرة قرر ان يشترك مع نجمة الجدل الأولى رانيا يوسف في قصة جديدة
أحمد الفيشاوي ورانيا يوسف احتفلوا سوا بالكريسماس.. ونشروا صور ليهم وهما في حالة انسجام تام.. ولا عصافير الحب.. وكانت قعدة كلها أنس وفرفشة وضحك وأجواء رومانسية تقول إن في قصة حب جديدة في الأفق
وطبعا بعد ما بقت قصتهم في كل مكان طلع الموضوع بسيط ايه اللي هيجمع رانيا يوسف اللي قالت مليون مرة إنها مش بتفكر في الجواز والحب تاني خلاص،مع أحمد الفيشاوي اللي لسه مخرجش من صدمة طلاقه الأخير من ندى الكامل
أحمد الفيشاوي من ساعة ما طلق ندى الكامل وكل شوية بقصة وإثارة جدل، بس مكنش بيهون عليه يظهر مع واحدة غيرها في أي مناسبة،والناس قالوا مش هيعدي ع ريد كاربت سينجل تاني،بس عملها عادي جدا، وبدل ما كان بيثير الجدل بقبلاته ليها وصورهم سوا بقى بيلعب أكروبات ويهزر مع المصورين.
لكن من كام يوم نشر فيديو من كواليس قديمة لفيلم ولاد رزق، والناس افتكرت إنه بدأ تصوير الجزء الثالث فعلا لكن المؤلف صلاح الجهيني طلع ونفى وقال مفيش الكلام ده، ودوبلير أحمد عز اللي معاه ده مش ضروري يكون موجود عشان بيصوروا حاجة
الموضوع اختفى وأحمد الفيشاوي مبقاش تريند كام يوم قال أنا هرجع تاني بالتقيلة بقى الوحش رانيا يوسف أللي مبتظهرش في أي مكان إلا لو خدت الأضواء باللبس بالحركات بالفساتين بالجرأة.. أي حاجة
رانيا يوسف في صورتها مع أحمد الفيشاوي كانوا قاعدين بس مش لوحدهم. كان معاهم ناس تاني عشان دي كانت قعدت شغل بيقروا سكريبت فيلم جديد اسمه “ورد وريحان”
طبعا ورد وريحان هيبقوا هما رانيا والفيشاوي.ويمكن قصة الحب دي تتولد في كواليس الفيلم الجديد فعلا.. وليه لأ.. هي بقالها فترة مش متجوزة وهو بيدور على جوازة جديدة لإن أحمد الفيشاوي مبيعرفش يعيش سينجل
الفيشاوي قال إن رانيا هي ممثلته المفضلة رغم إنهم مبيظهروش مع بعض كتير وتقريبا مشتغلوش مع بعض قبل كده .. ومع ذلك الصورة كانت مليانة مشاعر وواخدين بعض بالأحضان ولا كإنهم عصافير
ناس كتير متعرفش إن أحمد الفيشاوي عنده 42 سنة دلوقتي ورانيا يوسف عندها 49 سنة.. يعني الفرق بينهم مش كبير.. مبقوش خلاص الوجوه الصاعدة اللي طلعت في التسعينات وعملت شغل عالي في الألفينات
هل هتكون رانيا يوسف الجوازة رقم 6 في مشوار أحمد الفيشاوي؟.. ولا هي هتكون أذكى من إنها تدخل نفسها في حواراته ومشاكله الشخصية اللي الناس كلها سمعت عنها وشافتها وكان آخرها قصة ندى الكامل اللي بعد ما كانت حب حياته.. عملوا لبعض بلوك ملوش راجعة.هنشوف
بس قبل ما تمشوا كان في تعليق على الصور من مخرج سوداني اسمه أمجد أبو العلاء مقرب جدا من دواير الفنانين كشف كل حاجة ونشر صورتهم سوا عنده على فيسبوك وقالهم إنه كل ما يشوفهم بعملهم لاف.. وإنه بيحب الناس اللي بتعلن حبها من غير خوف من المجتمع
وقال إنه بيحبهم وهما لايقين على بعض.. وكان ناقص يقولهم هنفرح بيكم قريب .. وشكلها كده في فرح جديد في الوسط الفني السنة الجديدة.
