هل تتذكروا مسلسل نيللي وشريهان ورحلتهم لحل لغز جدهم ميكي، المسلسل حقق نجاح كبير وكان سبب في ظهور مواهب بشكل أوضح مثل محمد سلام و مصطفى خاطر.. و كوميديا سلوى خطاب و بيومي فؤاد والكثير من المشاهدين ينتظر الجزء الثاني منه.
و من فترة طلع كلام ان في نية يتعمل…قولنا نفكر معاكم الجزء التاني ده هيحصل فيه ايه .. وايه اللي حصل لكل واحد فيهم .. بعد ما عرفوا يحلوا اللغز ؟!! تخيلوا معانا مستقبل نيللي وشريهان هيكون ازاي.
من ساعة ظهور دنيا سمير غانم وهي بتعرف تتلون في أي شخصية بتقدمها، و هي أول واحدة عرفت تعمل اسم من بنات سمير غانم و دلال عبد العزيز الله يرحمهم، يعني تقدم كوميدي ماشي ترجيدي ماشي و غنا و رقص ماشي،فنانة شاملة وماعتمدتش على انها بنت فنانين كبار .
و مش بس هي ايمي كمان من اول ظهورها مع يسرا في مسلسل خاص جدا، في الاول محدش كان عارف انها بنت سمير غانم، بس هي ورثت منه خفة الدم بشكل كبير، و بدات بعدها تشترك في مسلسلات كتير، لحد ما الجمهور بقى نفسه يشوف العيلة ديه كلها في مسلسل واحد .
سنة ٢٠١٦ فجأة لقينا في اعلانات عن مسلسل اسمه نيللي و شريهان. وفضلوا فترة كده قبل رمضان ،والناس توقعت ان نيللي و شريهان الحقيقيين هيعملوا فوازير بس المرة ديه سوا،لكن مع قرب رمضان نزل بوستر المسلسل ل دنيا و ايمي سمير غانم .
ومن اول حلقة والناس حبت طريقة دنيا اللي طالعة بنت كلاس واسمها نيللي. و ايمي البنت البسيطة و اسمها شريهان واللي مع الاحداث بنكتشف انهم هما الاتنين ولاد عم .
وكان معاهم مجموعة كبيرة من النجوم اللي ينجحوا اي عمل هنا فيه زي الفنان بيومي فؤاد واللي كان قايم بدور “سي عبدالله باداء صباح ” .. و مصطفى خاطر ” شخصية سيف” .. و محمد سلام ” هاني الدبدوب” .. و سلوى خطاب ” صباح “.
نجاح المسلسل كان ليه اسباب كتيرة .. أولها ان قصة المسلسل اتعملت كحدوتة .. كل يوم بمغامرة جديدة .. و مواقف كوميدية جديدة .. وتخلص حلقة تستنى الحلقة اللي بعدها .. و لحد أخر حلقة أما خلاص حلوا اللغز و لقوا الفلوس … ناس كتير كانت عاوزة يكون منه جزء تاني .. و يشوفوا هما عملوا ايه بعد كده … و من فترة كده دنيًا سمير غانم سألوها هتعمل جزء تاني من نيللي و شريهان ولا لا .. و وقتها قالت مستنية ايمي تفضى و هنعمل اي حاجة … انا نفسي نعمل شغل تاني سوا.
بس لو اتعمل جزء تاني منه أكيد حياة الشخصيات هتتغير، يعني نيللي هتفتح شركة،و بما انها بقت حريفة في الالغاز و اللعب ديه، فهيبقى شغلها كله بقى ألغاز و ألعاب عالمية،ما هي نيللي بردو مش هتعمل حاجة للناس الغلابة . و جوزها بقى سيف اعتقد انه هيفضل زي ما هو، الشخص الطيب اللي هيساعدها و يروح معاها في اي حته و هي هتفضل تستغله.
أما شريهان بقى بعد ما سكنت ناحية الهرم. و العربية موديل ٧٨ اكيد هتوسع المجال و هيعملوا مشروع عربيات مع هاني الدبدوب جوزها و علشان هي طيبة و بتحب تساعد الكل هتشغل كل اللي ساكنين معاها في الحارة وأما يخلفوا هيسموا عيالهم على اسم ميكي و ميمي ما اللي شافوه معاهم مش شوية.
تيجي بقى للراس الكبيرة سي عبدالله و صباح. واللي دماغها استثمارية بحت. و كانت بتقول جُمل معبرة و بتعرف تظبط أي حد. عملوا مشروع لبس. و بقت بتكتب على الهدوم كلامها. أصله حكم بقى .
ضاحي بقى هيرجع من المكسيك .. و هيحاول يضحك على نيللي و شريهان زي ما ضحكوا عليه هو و عم دهب و اللي قام بدوره الفنان محمود الجندي الله يرحمه .. ف ضاحي هيرجع بقى و يحاول يوصل ليهم علشان ينتقم منهم .
