كل تفصيلة من مسلسل جعفر العمدة تنتشر على السوشيال ميديا، وأيضا الجمهور عاش مع أبطال العمل وحبهم، وأصبح يتابع كل واحد منهم، وفوق كل هذا فإن الجمهور يكون متعاطف معه، ومن أهم الشخصيات التي أثرت مع الجمهور هو سيد العمدة، أخو جعفر العمدة، والذي يقدمها الفنان أحمد فهيم..
الفنان أحمد فيهم عامل حالة قلق في مسلسل جعفر العمدة، مش لأهله وأخوه الصغير بس، ولكن لينا إحنا كمان كاجمهور، الناس من كتر التفاعل مع العمل بقت تروح تتخانقله مع وداد اللي خلعته، وعمالة تشتم في عيلة فتح الله بعد ما هانوه، بس باردو الناس مضايقة من تصرفاته وحركاته اللي كل شوية تورطه في مشكلة، وتخليه يورط جعفر كمان معاه.
المهم يعني إن الفنان أحمد فهيم مقدم الشخصية كما ينبغي، ومن كتر ما الناس مصدقاه بتقول مش ممكن حد تاني كان يعمل الدور الشطارة دي، ولكن اللي ناس كتير متعرفوش إن كان في مرشحين تاني للدور ده، وكلهم على قدر عالي من الكفاءة إنهم يقدروا يقدموا الشخصية دي.
الفنان أحمد فهيم بيقول إن جاله تليفون قبل التصوير بيومين بيعرض عليه الدور المخرج محمد سامي، وهو وافق وكان مبسوط جدا وبدأ في تحضيرات الشخصية.
وده منطقي لأنه بالفعل كان تم الاتفاق مع الفنان أحمد فتحي إنه يقدم الشخصية دي، وكان أحمد فتحي سعيد بالدور لإنه هيظهر بشكل مختلف للجمهور مع المخرج محمد سامي، وبيقول إنه كان هيقدم واحد من أهم أدوار مسيرته الفنية، ولكن في الآخر مقدرش يوفق بين شغله والأعمال اللي كان بيصورها وبين تصوير مسلسل العمدة، وده طبعا بيكون مرتبط بموسم رمضان، وبالتالي بيكون في سرعة للانتهاء من التصوير عشان يلحقوا الموسم المرضاني ولتجنب الخروج من خريطة الموسم.
مش بس الفنان أحمد فتحي اللي كان مرشح للدور، ولكن كمان بالفعل كان تم التعاقد مع فنان تاني على الدور ده، وكان فنان مميز وهيقدر يلعب الدور ويقدم بصمة كويسة، ولكن الظروف باردو منعته من إنه يقدم الشخصية دي، وهو الفنان تامر عبدالمنعم.
الفنان تامر عبدالمنعم كان على أتم الجاهزية عشان يقدم الدور ولكن اللي حصل إنه كان مشغول وأعلن اعتذاره وقال «كنت أتمنى العمل مع النجم الكبير محمد رمضان والمخرج الكبير محمد سامي بمسلسل العمدة، إلا أن ظروف سفري للخارج في مأمورية عمل حالت بيني وبين الاستمرار، أكيد هتتكرر وأتمنى أن تتكرر الفرصة».
في كلام اتقال إن الفنان أحمد فتحي والفنانة هيدي كرم واللي كان المفروض هيشاركوا في العمل مكملوش بسبب خلافات مع المخرج محمد سامي، ولكن كل الأطراف نفت الكلام ده وقالت غنه مش حقيقي، كل ما في الامل هو عدم القدرة على تنسيق المواعيد بين الأعمال اللي بيصوروها برة وبين شغلهم في مسلسل جعفر العمدة.
