لبسوا المشجر والألوان مطرقعة ولم نقل شئ لكن تصل لشيفون ومخرم وإكسسورات وحلقان فهذا كثير بالنسبة للجمهور، فهل ائما الممنوع مرغوب.
الفنانين المصريين من محمد رمضان لأحمد سعد بيروحوا أى حتة لازم يثيروا الجدل!وحلوين أوى فى اللبس الحريمى! شيفونات وساتانات وحاجة أخر موضة خالص! والمفاجأة إنها بشئ وشويات.
هل هم عارفين إنهم بيتعرضوا للتريقة من الناس في الخليج فى حفلاتهم،ولا شايفين الموضوع عادى؟إيه سر حب الفنانين المصريين للبس الحريمى؟ليه الكل إتريق عليهم ؟مش هتصدق الهضبة لبس إيه.
وأنا أقول لبسى راح فين؟ دى تعليق سمية الخشاب على إطلالة أحمد سعد طليقها الساعات اللى فاتت ..لما ظهر لابس توب مخرم وبليزر حريمى فى حفلته فى السعودية!..والحقيقة كلنا أتأكدنا لبس استاذة سمية كان بيروح فين! سمية طيرت الجبهة بتعليقها ده والمستور أتكتشف!
وعلشان يكمل اللوك ..كان لابس حلق..ولإن الحلق دايما بيعمل قلق! فقرر إنه ياخد الباكيدج كاملة وفيها لاخفيها ..الغريب إن أحمد سعد عارف إنه مش أول الفنانين اللى يعملوا كده ..وشكله مش أخرهم!
أحمد كان صارف ومكلف جدا الحقيقة ..إطلالته دى اللى معجبتش حد كلفته 75 ألف جنيه! سعر الجاكيت بـ 1680 دولار، يعني حوالي 52 ألف جنيه، و التوب 750 دولار، يعني حوالي 23 ألف جنيه.
المفاجأة بقى الناس قالت أحمد سعد وطايره منه على الأخر ليه ميبقاش زى اخوه عمرو سعد؟ هوب لاقينا عمرو هو كمان لابس شيفون وشفاف وعقد لولى ..وزى ما يكون لعنة وصابت العيلة! هو فى إيه؟
عمرو نشر صورة ليه وهو لابس قميص شفاف وزي ما يكونوا فولة وإتقسمت نصين!عليه العوض ومنه العوض! وظهروا مع بعض على المسرح ..وغنوا سوا!
الحقيقة إن عمرو سعد مجرب الموضوع ده قبل كده ..وشكله هو اللى وصى به أحمد! وقاله بيجيب مع الناس وإسمع منى ومتراجعش ورايا! أنا مجرب..
عمرو لبس قميص ساتان هو كمان قبل كده فحب يغير المرة دى ويجرب الشيفون..غريب أوى بجد !، الساتان مش عمرو سعد طبعا لأ لأ ..ما غريب إلا الشيطان!
وده لما كان ضيف فى برنامح جوسيبس ظهر لابس بنطلون أبيض طيب تمام فين المشكلة إستنى القميص اللى كان ساتان أزرق علشان الحسد والأكمام بيضة أهو يكسر اللون بردوا..وسعره كان 20 ألف جنيه من تصميم جوتشى.
نيجى بقى لملك إثارة الجدل..وحش التريند الحقيقى برة وجوة !رئيس مجلس إدارة الشوشرة والقلق! رائد لبس الملابس الحريمى وأول من اللى لبسه..محمد رمضان! ده بقى العادى بتاعه لا بنتفاجئ ولا بنتريق لإنه ثقة فى الله نجاح!
ده غير بقى السلاسل الدهب وخواتم الأسد مقولكش والنضارة علشان اللوك يكمل .
فاكرين حفلته اللى كان لابس فيها قميص شيفون شفاف و جاكت جينز مليان سلاسل؟ ده أكيد السلاسل دهب طبعا اللى خلى صابونته من الدهب جت على دى؟ ولماظهر ومغطى راسه.. لا مش للدرجادى بقى هو نمبر وان عايز إيه ؟
رمضان ماشى بمبدأ لكل مقام مقال، ومش أى حاجة ينفع يلبسها فى أى حتة ،وفى لقاه مع منى الشاذلى قال : أنا مش بلبس الحاجات دى فى الحقيقة ..مش بمشى فى شارع جامعة الدول لابس فرو ..الحفلات تتطلب منى شو وبهرجة ..لكن أنا فى الحقيقة هدومى بسيطة جدا.
قال كمان إن الموضوع مش هيصة كده لا لا ..كل شئ مدروس وبحساب ،و أنه بيختار هدومه بعناية وفقًا للحدث والجمهور المستهدف، وده بمساعدة فريق من خبراء الموضة والأزياء.اللى هو دول أدرى منى ومنكوا يعنى!
عمرو دياب طول عمره بيلبس المشجر والملون ..والصيف يعنى عمرو دياب وأغانيه..مؤخرا ظهر بملابس ستات خالص ولابس حلق..وهنا كان لازم نقول أدوا الحلق للى عنده ودان ..
الحقيقية المخرم عمانا ورب العرش نجانا! حتى ويجز لبس المخرم الأبيض ،وفى حفلته مع أنغام لبس الشيفون..وإن شاالله ما عن حد حوش!
الغريب بقى إن وسط كل القلق ده اللى الفنانين الرجالة عاملينه ..وخاصة بعد حلق عمرو دياب ،خرجت نجلاء بدر بتصريح زود الهجوم عليها وعلى كل اللى حواليها كمان لما قالت:ما هو لو بنقرأ محدش هيقول عليك جاهل، أول من ارتدى الأقراط أو الحلق في التاريخ كله، هم الرجال وليس النساء”.
وهنفضل نسأل نفس السؤال اللى ملهوش إجابة الحقيقة! إيه سر حب الفنانين المصريين للبس الحريمى ..رغم إن مفيش أسهل من اللبس الرجالى تضرب أى تيشيرت على أى بنطلون وخلصت!لكن تقول إيه ؟هل إنتوا مع المثل اللى بيقول كل اللى يعجيك وإلبس اللى يعجب الناس ؟ ولا شايفين إنهم أحرار يلبسوا اللى يلبسوه؟ شاركونا فى التعليقات .
