دائما أي خبر يأتي فيه اسم رجل الأعمال أحمد أبو هشيمة يكون محل اهتمام من ناس كثيرة خاصة حياته الشخصيه وجوازاته وعلاقته بنجوم كتير من الوسط الفني وده طبعا بعد ما اتجوز هيفاء وهبي وكمان ياسمين صبري وسابهم هما الاتنين لكن دايما بتكون في شائعات كتير بتطلع علي أبو هشيمة وعن علاقاته والستات في حياته وكان معظمها بردو من الوسط الفني.
أول جوازة في حياة أحمد ابو هشيمة كان وهو عنده سنة٢٢ يعني قبل ما يتشهر خالص واتجوز زميلته في الكلية وخلف منها ولدين هما عمر ويوسف وبعد فترة اتطلقو لكن محدش يعرف خالص أي أسباب عن انفصالهم وفضلت زوجة ابو هشيمه الأولي وولاده سر كبير في حياته حتي الآن ومحدش يعني عنهم أي حاجة.
وفي ٢٠٠٩ اتجوز ابو هشيمة هيفاء وهبي وديه كانت بداية شهرته في مصر والوطن العربي كرجل اعمال والناس كلها كانت بتحسده عليها وبيسألوا مين الراجل ده اللي خطف قلب هيفاء وهبي نجمة لبنان الأولي
ابو هشيمة وهيفاء اتعرفو علي بعض في حفل زفاف وهو مكانش يعرفها اوي لانه مكانش ليه في الفن ومش متابع ، كان مركز في شغله بس لكن بعد ما اتعرف عليها قالها بكل جرأة انا خطيبك وبعد قصة حب تلات سنين أتجوز ابو هشيمة وهيفاء والجوازة ديه قلبت مصر كلها ومن هنا بدأ يتشهر ابو هشيمة بسبب مراته النجمة اللي كل الرجالة والستات بيحبوها
المفاجاة كمان ان هيفاء وهبي طلعت واعلنت عن الشبكة اللي جبهالها ابو هشيمة وهي خاتم واسورة وحلق الماظ اشترتهم في نص ساعه بس مع خطيبها وطلع اشاعه انها خدت منه مهر ١٠ مليون جنيه لكن هيفاء طلعت نفت المعلومه دي وقالت ان مهرها كان القرآن الكري
واتجوز ابو هشيمة وهيفاء وعملو شهر عسل في جزيرة كابري الايطاليه وقعدو ١٠ ايام وبعد كده رجعو لحياتهم الطبيعيه
لكن الجوازة ديه مستمرتش غير اربع سنين وبعدها اعلنو انفصالهم لان ابو هشيمة كانو غيور جدا عليها وهو راجل شرقي ومش عايز مراته تبقى في شهرة وجراة هيفاء وهبي
وحصل بينهم خلافات كتير بسبب لبسها وكليباتها وانتهت القصة بانفصالهم بكل هدوء وهيفاء قالت في بيان رسمي خدنا قرار الانفصال بقناعة وعلاقتنا مستمرة كصداقة وفي بينا احترام متبادل عشان سنين العشرة الطيبة اللي جمعتنا
بعد فترة من انفصال ابو هشيمة وهيفاء طلع اشاعه عليه انه مرتبط بالفنانه العراقية شذي حسون اللي وقتها كانت بدات تتشهر وجات عاشت في مصر وبدا يرتبط اسمها باسم ابو هشيمه وطلع اشاعه بتقول انهم علي علاقه ببعض
لكن شذي مسكتتش وطلعت نفت الخبر تماما وقالت ان ديه مجرد اشاعه ليس لها اساس من الصحه ويمكن الناس افتكرت اننا علي علاقه ببعض بسبب سفري لمصر في الفتره الاخيرة لكن انا جايه اشتغل ومفيش بيني وبينه اي حاجه
ومن كام سنه كلنا سمعنا اشاعة ارتباط احمد ابو هشيمة والفنانه مي عز الدين ويمكن دي تكون من اكتر الاخبار اللي الجمهور اتمني انها تكون حقيقيه فعلا مش مجرد اشاعه
وفي سنه ٢٠١٥ بدانا نشوف مي و ابو هشيمة في مناسبات كتير مع بعض وبدات صورهم تنتشر بشكل غريب لحد ما اتسرب خبر ارتباطهم وانهم بيجهزو لجوازهم لكن بعد فترة ابو هشيمه طلع ونفي الخبر وطلع وقال انا مش بفكر في الارتباط حاليا وكل اللي بيني وبين مي عز الدين علاقه صداقة قوية
لكن الجمهور مكانش مصدق واتسربت اخبار كتير علي انهم فعلا كانو هيرتبطو ويتجوزو وان في علاقه حب بينهم لكن مشروع جوازهم فشل عشان مكانش في بينهم اتفاق في حاجات كتير والجوازة باظت من قبل ما تبدأ
وبعد قصة مي اتفاجئ ابو هشيمة ان جاتله تعليقات كتير والناس بيباركوله فالكومنتات علي جوازه من الفنانه المغربيه رجاء قصابني واول لما شاف الكومنتات ووصلتله الاخبار اتصدم وطلع قال اكيد الكلام ده غلط انا اصلا معرفش مين ديه ولا بتعمل ايه ولا عمري شوفتها في حياتي
وبعديها طلعت رجاء كتبت علي الفيسبوك انها فعلا مخطوبه لرجل اعمال لكن مقالتش اسمه ايه وان الناس هما اللي ربطو بينها وبين اسم ابو هشيمة وقالت انا اسفه علي اي سوء فهم ومتهمنيش الشهرة وبعتذر للاستاذ احمد ابو هشيمة عن اقحام اسمه في الموضوع.
وفي ٢٠١٧ كانت المفاجأة الكبيره اللي قلبت الدنيا لما طلعت اخبار عن ارتباط ابو هشيمة وشقيقة اللاعب كريستيانو رونالدو بعد لما جت عيلته كلها مصر وقضو اجازه طويله وطبعا لان ابو هشيمة صاحبه جدا فا اتصور معاهم وزارهم اكتر من مره والصور انتشرت علي السوشيال ميديا.
وفي نفس الوقت نشرت كاتيا اخت كريستيانو صورة لخاتم زفاف في نفس توقيت وجودها في مصر ومن هنا طلع خبر ان ابو هشيمة اتقدملها وخطبها خاصة ان هو وكريستيانو صحاب وانتشرت الاخبار في وسائل الاعلام لكن اخت كريستيانو نفت وقالت انها مش مرتبطة باي حد ولما يحصل هتعلن لكل الناس.
طبعا كلكو عارفين ايه اللي حصل بعد كده، وقع ابو هشيمة في حب ياسمين صبري، واتجوزها في سنه ٢٠٢٠ ومعملوش فرح لكن اكتفوا بحفلة بسيطة في البيت وكتبو الكتاب وده كان خبر الموسم خاصة ان كل علاقات ابو هشيمة مرتبطة بالوسط الفني.
وطلع ابو هشيمة بنفسه واعلن ارتباطه بياسمين صبري وقال ان انا بعلن اهو ودي حاجه تشرفني ومش هتكسف عشان اخبي الخبر لكن مبحبش اتكلم عن حياتي الخاصه ومفيش حاجه اقولها اكتر من الخطوبة.
وبعد سنتين من جوازهم ومن الصور الكتير اللي كانو بينشروها مع بعض وخلتهم تحت الاضواء دايما انفصل ابو هشيمة عن ياسمين صبري بكل هدوء لكن كل واحد فيهم عاش حياته وطلعت اخبار كتير عن رجوعهم لبعض خلال الفتره اللي فاتت لكن حتي الان مفيش اي خبر مؤكد عن عودتهم.
ويبدو ان هما فعلا انفصلو انفصال نهائي وياسمين صبري رجعت لشغلها وللوسط الفني من جديد بعد ما كانت مختفيه عنه خلال فترة جوازها من ابو هشيمة.
ياتري هيرجع ابو هشيمة لياسمين خلال الفترة الجاية ولا هيفاجأنا بجوازة جديدة؟
