لا أحد يعلم ماذا يحدث للنجوم المصريين اول ما يروحوا يقفوا على اي مسرح في السعودية في حفلة، المفروض يغنوا فقط بدون أي كلام قد يمسكه الجمهور عليهم ويحدث مشكلة بنهم وبين الجمهور، وهذا بالضبط ما حدث مع الفنان محم فؤاد فماذا فعل؟
محمد فؤاد اختاروه يغني في حفلات تقويم جدة ، مهما مش وراهم دلوقتي غير الحفلات والمواسم والسهرات ،، المهم فؤش اتبسط طبعا ان السعودية افتكرته واختاروه وهو ياعيني مختفي بقاله فترة طوووويلة ، وكان بالنسباله دي فرصة عظيمة عشان يرجع يظهر تاني ويتألق زي زمان.
وراح فؤاد وغنى وابدع وهو الحقيقة صوته مميز واغانيه جميلة وكلنا اتربينا عليها ، لكنه غلط نفس غلطة اصالة وخلى الشعب المصري كله امبارح يهاجمه وينتقده بسبب الكلمتين اللي قالهم في نص الحفلة وهو بيشكر في السعوديين.
عمنا فؤش اندمج واتبسط بالحفلة وحس انه هيرجع للاضواء من جديد، فحب يجامل السعودية اللي اختارته ورجعته للنور تاني ، فقال كلمتين للاسف اتمسكوا عليه ، وقال : حلم إننا نغني لأعظم ناس على وجه الأرض، السعودية ساكنة جوة قلب كل الوطن العربي، الشعب السعودي اللي علمنا يعني إيه أخلاق وكرم، وبحبكم من كل قلبي، والله ممكن أبطل الغُنا بعد الاستقبال ده».
ياااادي النيلة مش هنخلص بقى ، هو كل شوية حد يطلع يقول السعودية ليها الفضل وهي اللي شهرتنا ؟؟؟ كلام محمد فؤاد زعل جمهوره المصري منه واعتبروها تطبيلة كبيرة اوي ووسعت منه لاجل خاطر انهم جابوه يغني حفلة ومحدش فاكره دلوقتي.
وطبعا فؤش غلط نفس غلطة اصالة لما وقفت على المسرح في السعودية وقالت انها مدينة بالفضل في نجاحها ومشوارها للسعودية وانها كانت السبب في شهرتها ، واتقلبت عليها الدنيا هنا وجمهورها في مصر عمل هاشتاج مخصوص عشان يلغوا حفلة اصالة في مصر واعتبروها ناكرة الجميل ومفتكرتش ان سبب شهرتها كان في بلدنا.
بس للاسف اصالة في النهاية سورية مش مصرية ، لكن محمد فؤاد مصري اصيل ، وده اللى خلى الهجوم عليه كبير ،انه يمدح السعوديين بالشكل ده ويوصفهم بانهم اعظم ناس على وجه الارض ؟ لأ مش حلوة خالص يا فؤش مكنتش حفلة دي .
الحقيقة مننكرش ان فؤاد مختفي من زمان ومعرفش يكمل مسيرة نجاحه ويستمر زي باقي جيله مثلا عمرو دياب ، الا انه انه جه عليه وقت ومبقاش عنده حاجة يقدمها وبعد عن الانظار تماما ، لكنه ادرك ده من قريب وبدأ يساعد نفسه انه يرجع للساحة تاني
ومن كام شهر شوفنا فؤاد في لوك جديد تماما بعد ما خس واهتم بنفسه وشكله وشعره وظبط التظابيط وعمل اللوك الجديد وقولنا بس ده فؤش راجع وهينافس عمرو دياب بقى ماهما نفس الجيل .
ويمكن ده السبب اللي خلى القائمين على حفلة السعودية دي انهم يختاروا محمد فؤاد لانه صوت جميل ويمكن محتاج يتبروز اكتر ، ودي الحسنة الوحيدة اللي بتعملها السعوديةمؤخرا انها بتقدر النجوم المصريين اكتر من مصر نفسها ، وبتعملهم حفلات ضخمة مصروف عليها كتير وده حصل كتييير جدا مؤخرا.
فاكرين حفل روائع الموجي ؟ عملها تركي ال الشيخ تكريما للموسيقار محمد الموجي اللي هو اصلا مصري ، وغنى فيها نجوم مصريين كتير ، ودي فكرة متعملتش عندنا في مصر ، واتحسبت للسعودية.
نفس القصة بتتكرر كل شوية ، هما بيحبوا النجوم المصريين وصوتهم وفنهم ، وبيتعملهم حفلات كبيرة وبيكون اختيارهم على نجوم مصر في المقام الاول زي انغام وفؤش واحمد سعد ومي فاروق ، وكلهم طبعا بيوافقوا وبيروحوا يغنوا وبيعتروا ده تكريم ليهم واستثناء محصلش من بلدهم ، ويمكن عشان كدا لم ا بيقفوا على المسرح هناك بيحاولوا يجاملوا السعوديين على قد مايقدروا
كمان احمد سعد غنى قبل فؤاد امبارح في حفلات تقويم جدة ، لكنه ظهر بلبس غريب خلاه تريند في الكام الساعة اللي فاته ، بعد ما لبس بنطلون شبه بتاع الصيادين وكمان من فوق شبيكة وكمااااان كان لابس حلق .. كانت غلطة كبيرة وقع فيها احمد سعد هو كمان وكان المفروض يظهر بمظهر افضل من كدا بكتير يليق بيه وببلده.
