كتير نسمع توقعات علماء الفلك والعرافين من باب التسليةليس أكثر، وتجدهم يتحدثون عن توقعاتهم للأبراج المختلفة وعلاقات الأبراج ببعضها البعض، ولكن يجب ان تعلم أنه كذب المنجمون ولو صدقوا، فإنه حتى لو صدقت نبؤة بعضهم فإنه يجب عدم التصديق في هذا الأمر.
وبعد تحقق نبوءة ليلى عبد اللطيف برحيل الفنان جورج الراسى،الفنانين كلهم حطوا إيديهم على قلبهم لو جابت سيرتهم فى أى توقع ومفاجأت كشفتها منتظراهم السنة الجديدة ياترى محمد رمضان تحديدا مستنيه إيه؟
الحقيقة الساعات اللى فاتت ظهرت أخبار عن توقعات ليلى عبد اللطيف،وكلنا عارفين إن تنبوأتها بتجيب الأرض خاصة توقعاتها لسنة 2022 لما تنبأت برحيل مفجع لفنان من لبنان،ولكن هى محددتش مين بالظبط لحد ما توقعها إترجم على أرض الواقع ورحل جورج الراسى بطريقة صعبة وحادثة أليمة أحزنت كل الوطن العربي.
وكمان رحلت مها أبو عوف وسمير صبرى ورجاء حسين وأحمد حلاوة.. اللى بيصدق فى عالم التنبوءات هيبدأ يخاف من توقعاتها ،واللى مش مقتنع بكلامها هيقول ده عمرهم وقضاء وقدر سواء كانت توقعت ولا لا كان هيحصل هيحصل .
أما الساعات اللى فاتت ليلى عبد اللطيف أثارت حالة من القلق بين جمهور السوشيال ميديا خاصة بتوقعاتها عن الوسط الفنى وحياة الفنانين وأعمالهم.
ليلى عبد اللطيف او زى ما بيقولوا عليها سيدة التوقعات فى حوارها مع الإعلامى نيشان توقعت المفاجأة بالنسبة لمحمد رمضان،وإنه لازم ياخد باله جدا ويحذر من موقف أوحادثة هيوقع فيها وهتأثر عليه وعلى نجاحاته ياترى ممكن تكون إيه؟،كمان توقعت إن مع الأزمة اللى هتحصله دى هيحقق نجاجات كبيرة هتوصله للعالمية وهووليود وهياخد جوايز كتير لا وكمان هيغنى مع مطرب أمريكى.
قالت كمان إن المطربة نجوى كرم ستُضيء سماء الخليج بحفلات استعراضية وغنائية ملهاش مثيل ، وهتحقق رقم قياسي للحضور.
كمان نانسى عجرم هتدخل عالم التمثيل وهتمثل فيلم إستعراضى ضخم من خلاله هتبقى زى السندريلا سعاد حسنى فى خلى بالك من زوزو.
إليسا كمان هتعوض كل خلافتها وكل الأزمات اللى مرت بها فى 2022 وهتمسك منصب قيادى سياسى،وجمهورها هيدعمها وهيقف فى ضهرها ،وشعبيتها هتزيد أكتر وأكتر
وعلى المستوى الفنى هتعمل أغنية قديمة لفنانة من الزمن الجميل تحى من خلالها ذكراها.
كمان هيفاء وهبى هتتجاوز كل الظروف الطارئة اللى عانت منها الفترة الأخيرة وباستخدام ذكائها هتقدر ترجع حقوقها بالكامل وشخصيات مصرية هتساندها أمام القضاء المصري،خاصة بعد أزمتها مع مدير أعمالها محمد الوزيرى
أما عن المطرب وائل كفوري، فتوقعت ليلى إنه هيدخل فى طريق الأعمال الخيرية وهيعمل جمعية بإسمه هدفها مساعدة اللبنانين فى الظروف الصعبة دى،وهيعمل حفلات كتير وأرباحها هتكون للجمعية دى .
توقعت كمان ليسرا إنها هتقدم عمل فنى تاريخى عن قصة تاريخية محدش عملها قبل كده.
التوقعات بقى اللى تقبض القلب، ليلى قالت إن فنان لبنانى أخباره هتبقى فى العلن وهيتهم بقضية مخله،ولكن رفضت تصرح عن هويته أو أى تفاصيل عنه
كمان توقعت برحيل فنان أو إتنين بنفس طريقة رحيل الفنان طلال مداح وفريال كريم على خشبة المسرح أثناء شغله أما بيمثل أو بيغنى.
مثلا طلال مداح، مات وهو بيغني على خشبة المسرح، وكان ماسك العود بتاعه وفي قمة اندماجه وانسجامه مع جمهوره من كتر الطرب اللى كان بيغنيه ، وفجأة وقع من على الكرسى ومات وأغلقوا الستارة وكانت وفاته صدمة لكل محبيه.
وكمان الفنانة اللبنانية فريال كريم اللى إشتهرت بأغانيها الخفيفة المفرحة وليها أعمال كتير فى السينما والتليفزيون ،وقعت على المسرح وهى بترقص وبتغنى وبردوا وسط الجمهور وبعدها إتوفيت.
ياترى ممكن التوقعات دى تتحقق؟هل ممكن الفنانين ياخدوا بالهم خاصة بعد رحيل جورج الراسى؟ هل ممكن يحصل اللى مش على البال ولا الخاطر؟ولا بردوا كذب المنجمون ولو صدقوا؟
