يقولون أن الذي يزيد عن حده ينقلب ضده.. نعم! فهل ياسمين عبدالعزيز ليس لديها الخبرة الكافية لتفرق بين الجد والهزار، فهل ترى نفسها وتحب الهزار بسبب الطاقة الكبيرة بداخلها.
حيث أن علاقتها مع جوزها الفنان أحمد العوضي فيها تفاهم وهو عارف يستوعب الوضع ومحتويها، لكن إيه اللي حصل عشان ياسمين تطلب الانفصال عن جوزها قدام الناس كلها كده ومش هاممها حاجة.. وممكن هزارها ده يتحول لجد في يوم من الأيام؟ ده اللي هقولكم عليه في التقرير التالي:
جوازة عليها مشاكل
جوازة الفنانة ياسمين عبدالعزيز والفنان أحمد العوضي كانت مليانة حكايات ومشاكل وأخوها اتدخل في الموضوع وهو اللي فضح سرها وعمل مشكلة مع أحمد وقال كلام مش حلو على أخته ومن وقتها وبينهم مصانع الحداد زي ما بيقولوا حتى وهي تعبانة معرفش يصالحها وفضلت ياسمين على موقفها.. المهم الجوازة دي اتعرفت في مايو 2020 والجمهور فرحان بعلاقتهم وقصة حبهم وإصرار أحمد عليها.. وكمان ياسمين حابة وجودها وحياتها معاه واشتركوا في أكتر من عمل فني والحياة الشخصية ماشية والفنية كمان، لكن إيه السر اللي كانت مخبياه ياسمين؟.
سرها اتكشف
اللي محدش يعرفه كتير إن ياسمين عبدالعزيز كان وراها سر مخبياه على الجمهور وهو موضوع انفصالها عن جوزها السابق وأبو عيالها ياسمين وسيف الدين رجل الأعمال محمد حلاوة.. ولما بدأت علاقة أحمد العوضي مع ياسمين عبدالعزيز في كواليس تصوير مسلسل “لآخر نفس” كشفت المستور وأعلنت انفصالها عن جوزها وهي أصلا كانت مخبية الانفصال ده سنة كاملة عن الجمهور وقالت إنها مش بتحب الشوشرة حوالين حياتها الشخصية وكمان أبو ولادها كان كويس ومحترم معاها ومع ولادهم.
حكاية الانفصال
ياسمين عبدالعزيز قالت لجوزها أحمد العوضي طلقني وده كان قدام الجمهور ومحدش عارف الموضوع ممكن يتحول لجد ولا إيه؟.. بس اللي كلنا عارفينه إنهم بيهزروا وفي قصة ورا الموضوع ده هي الكبدة النية اللي بياكلها أحمد العوضي، ووقتها كان نشر فيديو على حسابها في فيسبوك وهو ضيف في برنامج تلفزيوني وكان بياكل الكبدة نية ودي حاجة معروفة عنه، بس ياسمين عبدالعزيز علقت وقالت إيه ده؟ طلقني! والجمهور تتفاعل معاهم وعارف إنهم بيهزروا بس في ناس بيحبوهم طلبوا منهم يبطلوا هزار في الموضوع ده عشان ممكن يتقلب لحد وهما خايفين على علاقتهم وعاوزينها تستمر.
طبعاً دي مش أول مرة تحصل لأن ياسمين كانت قالت قبل كده في برنامج تلفزيوني إنها شافته في البيت مرة بياكل كبدة نية واتفاجئت بالحوار ده وقالتله في البيت طلقني.. والجمهور عارف إنها هزراية عادية بس الله أعلم يمكن الأمور تتحول، وهنا بقى اكتبولنا في الكومنتات آرائكم بخصوص هزار ياسمين عبدالعزيز وأحمد العوضي وهل حاجة زي كده مرغوبة ولا بلاش منها ولو في نصيحة حابين توجهوها ليهم اكتبوها بردوا.
