لو اتكلمنا على عدد الملحنين و الفنانين الذين عمل معهم مشاكل، فهذه ستحتاج ورقة و قلم وذلك لأن له العديد من الخلافات الاتهامات للعديد من الملحنين بسرقة الألحان.
عمرو مصطفى لو قال تاني انه خلاص مالوش دعوة بحد .. ولا هيجيب سيرة حد .. و هيركز في شغله و بس .. متصدقوش .. لازم هينكش حد أو يتكلم عن شغل حد بطريقته المعروفة .. و عمرو مش بيضرب في أي حد ..
لا دائما بيختار اللي هيعمل من كلامه تريند .. و المرة ديه مع ويجز .. فتعالوا كده واحدة واحدة نفهم هو في ايه ..
زمان أما كانت تيجي سيرة عمرو مصطفى، كنا بنبقى عارفين إننا هنسمع أغنية حلوة … ولا حتى هيكون بيشتغل على أغنية جديدة .. دلوقتي أما بتيجي سيرته .. بنبقى عارفين ان في تريند مشكلة جديدة ليه.
والمرة ديه مطلع ويجز بيشتري ألحان أغانية، وليلة كده داخلة في سكة إن ويجز بيضحك على الناس، و ده بعد ما اتكلم في الراديو في برنامج أجمل سابعة، و قعد يقول إن الموزع الموسيقي دوره انتهى.
و إن أغاني عمرو مصطفى الجديدة تعب فيها جدا، لانها مكتوبة و متلحنة و متوزعة صح، مش زي أغاني اليومين دول ( من الأخر يعني بيقول إن مفيش حد بيعمل أغاني حلوة زيه) المهم بقى انه مسكتش لحد هنا، لا ده جيه يضرب مثلا، فاختار غلط
عمرو مصطفى قال ان ويجز و كل الشباب اللي زيه مش بيعملوا ألحان، دول بيشتروها جاهزة من على النت، وإن اللحن ب ١٠٠ دولار ، و بيشتغلوا عليها بقى و بتضرب.
طبعًا انتو عارفين ويجز ابننا مش بيرد على أي كلام بيتقال عليه، بس اللي رد مولوتوف و كتب على صفحته على الانستجرام ، وده بصفته انه وزع أغاني ل ويجز ..
و قال انه هيرد لانه وزع ل ويجز أغاني كتير . و موسيقى الأغاني بتاعة ويجز، بتاخد وقت و مجهود كبير في توزيعها، وده لان شغلهم عالمي، و مش بياخد فلوس لان في اتفاقات تانية بينهم ، و ياريت ابقى متأكد من كلامك يا استاذ عمرو .
وبصراحة ديه مش أول مرة عمرو مصطفى يعمل مشكلة، ولا يقلل من شغل حد ولا إن شغل حد مش حقيقي، أو حد ياخد منه شغل .
زي من فترة أما طلع و اتهم رامي صبري انه سرق لحن أغنية من أغانيه، وأما رامي كتب بوست ووضح فيه إن الكلام ده مش حقيقي ،عمرو مصطفى جاب ورا، و نزل بوست وقال ده تشابه أفكار و قلبها هزار .
وزي بردو الخناقة اللي كانت بينه و بين محمد رحيم الملحن، و اللي كانت بسبب ان عمرو مصطفى كان في برنامج و لبخ في الكلام على الملحنين، و رحيم موقفش انه يرد عليه بكلمتين، لا ده هدده و قاله ( وحياة عيالي ما هسيبك) .
ولو اتكلمنا بقى على أزمة حياته هتبقى طبعا على عمرو دياب، واللي اشتغلوا سنين مع بعض، وحققوا نجاح كبير .بس حصلت مشكلة بينهم، و خرج عمرو مصطفى و قال ان عمرو دياب لولاه مكنش نجح، و انه السبب في ان عمرو دياب بقى الهضبة .
و فضلوا فترة طويلة مفيش تعامل بينهم، لحد ما عمرو مصطفى كتب بوست من كام شهر انه مسامح عمرو دياب و عشرة السنين متروحش هدر، المشكلة يا جماعة إن عمرو مصطفى قال من فترة أنا خلاص ماليش دعوة بحد و هركز في شغلي و بس، طب ليه النكش يا عمرو ؟!
