من بداية ظهوره وهو يسبب حالة من القلق، والبعض استغرب من كونه رجل ويقد برامج للمرأة ، ولكنه استطاع أن يثبت نجاحه ويتحدى جميع الانتقادادت.
شريف مدكور .. اللي قدم برامج الطبخ و اللبس و الفاشون، ونجح فيهم جدا، بس حياته الشخصية مليانة مفاجآت، ناس كتير حبته زيادة بعد فترة مرضه، و ناس تانية اضايقت منه بسبب تصريحاته الغريبة شويتين، وناس تالتة بقى شغالة اشاعات و التشكيك فيه هو شخصيا .
من النهاردة اسمي الحاج شريف.. ودعيت لمصر و لكل جمهوري .. جملتين عبر بيهم شريف مدكور عن فرحته بالحج.. بس بعدها على طول أعلن انه اتصاب بالكورنا .. ومن هنا بدأت الاشاعات … شوية يقولوا ده حالته خطر و ادعوله … و شوية يقولوا لا هو كويس .. بس شريف مدكور جاب الناهية و قال انه كويس و في البيت و هيكمل علاجه فيه .. و اللي بيطلعوا اشاعات مش أول مرة اتعرض ليها.
والحقيقة ان شريف مدكور أكتر مذيع اتعرض لحاجتين الهجوم و الاشاعات و الهجوم كان عليه بسبب انه نوعية البرامج اللي بيقدمها .. كلها للستات بس. و هو بس اللي بيقدمها يعني لو اتكلمنا عن أول برنامج ايه هيكون من كل بلد أكلة واللي كان بيتذاع على قنوات النيل و اللي الناس اتريقوا على طريقته الناعمة شوية مع الستات .
وبعد كده بردوا كمل في تقديم البرامج اللي تخص الفاشون و الجديد في عالم المرأة، و ازاي الست تهتم بنفسها و بنضافتها،و عند الحتة ديه الدنيا قامت، شريف قدم حلقة طالع فيها كان بيعمل سنفرة ل رجله من ضمن فقرات الحلقة بس الصورة انتشرت على السوشيال ميديا انه بيعمل ازالة لشعر رجله، و بسبب الصورة ديه شريف اتعرض لهجوم كبير .
و ان مينفعش راجل يطلع يعمل كده، ده الأسوأ كمان انهم شككوا في ميوله .. و ناس كتير قالت انه اصلا بيحب يلبس هدوم قريبة من هدوم الستات .. و اتحط في زون مش حلوة لفترة طويلة .. وده اللي خلاه يطلع في لايف و يقول انه بقاله ٢٠ سنه بيتشتم و بيطلع عليه كلام مش حلو و مش هيسامح أي حد غلط في حقه و مستني الحساب عند ربنا .
الناس بدأت تتعاطف مع شريف بعد اعلان مرضه وانه اتصاب بسرطان القولون.. و بدأت رحلة علاجه بالكيماوي .. فترة علاجه ديه طلع عليه اشاعات كتير .. ما بين ان حالته مش بتستجيب للعلاج .. لحالته تدهورت .. وهكذا من الكلام ده .. اللي كان هو دائما بيطلع ينفيه بنفسه .. و كان مستمر في تقديم برنامجه .. لحد ما أعلن انه تعافى من السرطان بس لسه أثر الكيماوي عليه موجود .. و انه لسه بيحس بتنميل في رجله بسببه .
بس منقدرش ننكر ان شريف ليه تصريحات قوية شوية .. زي الشروط اللي حطها لاي محجبة هتظهر معاه في البرنامج .. و انها لازم تكون لابسة لبس واسع، و أي واحدة لابسة حاجة ضيقة مش هتطلع معاه .
و الحقيقة كلامه ده ناس قالت مش من حقه يتحكم في لبس حد و مش من حقه يقول ان في شروط علشان محجبة و ناس تانية شافت ان كلامه منطقي شوية وانه اتكلم من ناحية ان اللي هيطلع ده هيكون قدوة ل غيره .
اما حياته الشخصية ف شريف شغله كمذيع مش أول حاجة في حياته .. لان أصلا دراسته مش اعلام .. و اشتغل في صنع الاثاث لفترة طويلة لحد ما دخل مجال التقديم البرامج ..
ناس كتير كانت بتفضل تساله انه ايه رافض الجواز .. مع انه معاه الامكانيات ل ده .. بس وجهة نظر شريف مختلفة .. مع انه خطب كذا مرة .. و مفيش واحدة كملت و شايف انه مش قد الجواز .. وقال ” آه معايا فلوس لكن الفلوس مش كل حاجة …ما عنديش خلق أصحى كل يوم ألاقي زوجة في وشي…وعيال رضع ودوشة وتربية لما يكبروا.. أنا بحب الهدوء .. بحب النظام و مقدرش أغير حاجة دلوقتي اتعودت عليها .. علشان كده أنا مش قد الجواز …
حاجة كمان مش كتير يعرفوها على شريف مدكور .. انه كان بيشارك في تغسيل الأموات .. و انه كان حابب جدا مشاركته ليهم لحد ما اتعلم و بقى بيعمل ده لواحده .. و قال قبل كده “أصل القبر ده الحاجة الوحيدة اللى تعلم البنى آدم قيمة الحياة…وتعمل من العيال رجالة..بس مين يفهم لأن دي الحقيقة الوحيدة اللي في حياتنا..
