مازال الوطن العربي كله يتذكر أجواء فرح الأمير الحسين ولي عهد الأردن وعروسته السعودية رجوة آل سيف اللي كان فرحهم في بداية الشهر الماضي.
ومن بعد الفرح بدأت رجوة تظهر مع العيلة الملكية الأردنية بشكل رسمي علي اعتبار انها هتكون ملكة الأردن الجاية وخلاص خدت لقب صاحبة السمو الملكي.
امبارح نشرت الملكة رانيا علي حسابها علي أنستجرام مجموعة صور جديدة ليها مع سيادة الملك عبدالله ومعاهم ابنها العريس الأمير الحسين وعروسته الأميرة رجوة ،، والصور لفت كل السوشيال ميديا وتفاعل معاها كل معجبين العيلة الملكية ومبسوطين بعلاقة الملكة رانيا ومرات ابنها الجديدة رجوة.
كمان ظهروا في الصورة هما الاربعة وهما لابسين نفس الالوان وكانهم عاملين ماتشينج في اللبس والستايل واختارو اللون الازرق بكل درجاته عشان يظهرو بيه مع بعض، والملكة رانيا كانت حريصة انها تنشر صورة عفوية جدا للاميرة رجوة علي حسابها الرسمي واللي تفاعل معاها عدد كبير جدا من المتابعين سواء من الشعب الاردني او الشعب السعودي وغيرهم من الوطن العربي.
مش بس المتابعين ده في نجوم كمان اتفاعلو مع صور الملكة رانيا وابنها ومراته وكتبوا تعليقات لطيفة وعبروا عن حبهم ليهم ، منهم النجمة الاماراتية أحلام اللي علقت بقلبين لونهم ازرق نفس لون اللبس اللي لابسينه
كمان النجمة غادة عبدالرازق عملتلهم قلوب علي الصور وكتب كتير من المتابعين ان احنا لسه منسناش اجواء الفرح ولسه فاكرين تفاصيل الحفل الاسطوري اللي اتعمل للامير حسين ورجوة من شهر لدرجة انهم طالبوا العيلة الملكية ان هما يسرعو في جوازه الاميرة سلمي او الامير هاشم ولاد الملكة رانيا اللي لسه متجوزوش وده من كتر حب الناس في احتفالات العيلة الملكية الاردنية.
كمان متابعين كتير طلبوا من الملكة رانيا ان يكون في حساب مخصوص علي انستجرام للاميرة رجوة عشان هي كمان تنشر صورها مع جوزها وكل افراد العيلة وكل المتابعين كانو معجبين باطلالة رجوة وقد ايه هي طبيعيه ومعندهاش تكلف في الميكب او اللبس وانها بدات تختار لبسها بنفس ستايل حماتها الملكة رانيا وده كان شئ واضح من ايام الخطوبه
اما بقي اول ظهور للاميرة رجوة وجوزها ولي العهد كان بعد جوازهم بشهر بالظبط ووقتها نشر الامير الحسين صورة مع عروسته رجوة علي حسابه علي انستجرام عشان يعيدوا علي الوطن العربي كله بمناسبة عيد الاضحي وكتب حسين : مني انا ورجوة كل عام وانتم بخير،، وديه كانت اول صورة للعروسين بعد الفرح الضخم اللي اتعملهم والصورة جابت مليون لايك وكم كبير جدا من التعليقات والناس كانت فرحانه بيهم وبجمالهم وبعفويتهم خاصة ان رجوة دايما بنحب تظهر طبيعيه ومش بتحب نعمل ميكب اوفر.
وبردو الناس سالتهم في التعليقات علي حساب رجوة الشخصي علي انستجرام من كتر ما الجمهور حبها واتعلق بيها وبقو عايزين يشوفو صورها واطلالتها كل يوم علي نفس طريقة الملكة رانيا.
وبعد ما كتبوا كتاب رجوة والامير حسين ، الديوان الملكي الاردني منح السعودية رجوة لقب صاحبة السمو الملكي الاميرة رجوة الحسين المعظمة وبكده هي بقت فرد اساسي في العيلة الملكيه وليها حق انها تتكلم باسم العيلة وتمثلها في اي نشاط او فعاليات لانها خلاص بقت زوجة ولي عهد الاردن يعني الملكة الجاية.
واضح من الصور والفرح اللي اتعمل ان العيلة الملكيه الاردنية بيحبو الاميرة رجوة جدا وبيحترموها وبيتعاملوا معاها زي الاميرتين سلمي وايمان بنات الملكة رانيا وكمان هي بنت ذكية لانها قدرت تكسب ودهم واحترامهم مش هما بس لكن حب الوطن العربي كله.
حنه وفرح رجوة كان شاهد علي حب الأردن للبنت السعودية اللي دخلت العيله جديد وده كان باين من طريقة الملكة رانيا مع عروسة ابنها الجديدة رجوة واللي كانت من يوم الحنة بتاخدها في حضنها وتطبطب عليها وتتباها بيها قدام كل الناس
كمان اخوات الامير حسين سلمي وايمان في الفرح الكبير كانو هما اللي ماشيين ورا العروسة يظبطولها فستانها من غير ما يفكرو في انهم اميرات وبنات الملك وفي ١٠٠ واحده غيرهم ممكن يعملو الدور ده لكن هما اختارو يكونو جمب اخوهم وعروسته ويهتمو بادق التفاصيل ويتعاملو معاها بكل حب وتواضع وده زود حب واحترام الوطن العربي كله لبنات الملكة رانيا.
