انفصال محمد فراج وبسنت شوقي، احدث اختراعات السوشيال ميديا التي دائما تطارد النجوم وطبعا هذه ضريبة الشهرة ، وبسبب قصة الحب التي عاشها فراج وبسنت والجمهور عاشها معهم ، فأصبحنا مركزين في كل تفاصيلهم وحياتهم.
من يومين بدأت تنتشر اشاعة بتقول ان محمد فراج وبسنت شوقي انفصلوا في هدوء بعد قصة الحب اللي شوفناها الكام سنة اللي فاتوا ، وهو بقى الثنائي تريند وهااااتك يا صور على السوشيال ميديا بتتكلم عن الموضوع، لكن طلع الموضوع مش حقيقي ومجرد كلام فيسبوك ، لكن اصلا جه منين؟ انا هقولك
في رمضان ظهر الكابل محمد وبسنت في برنامج المقالب بتاع رامز جلال، ومن وقتها مشوفنهمش مع بعض تاني خالص ، ومفيش اي صور ليهم جديدة على انستجرام وفي حالة هدوء كدا بينهم.
وطبعا احنا شعب نحب ندخل اوي في حياة كل الناس، فالجمهور اعتبر ان في حاجة بتحصل ، وانهم اختفوا فترة من ساعة رمضان لحد دلوقتي يبقى بسسس اكيد بيطلقوا.
ومن هنا جت اشاعة الانفصال الغريبة دي واللي ملهاش ملامح اصلا ولا ليها اي سبب ، ويمكن ده اللي ضايق محمد فراج وقرر يرد بطريقته.
طبعا هو مقالش اي حاجة ولا حتى بسنت اتكلمت ، بس اكيد سمع بالقصة وحب يطمن الناس انه لسة مع بسنت ومنفصلوش ولا حاجة .. عمل ايه بقى ؟
محمد فراج بعد اشاعة طلاقه دي نشر صورة لمراته حبيبته بسنت ، ستوري عنده على انستجرام ، وهي صورة ليها من رحلتهم في دبي.
ودي كانت طريقة غير مباشرة عشان يقول للناس انه الانفصال مش حقيقي ، وانا لسة اهو بحبها وادي صورتها كمان يا جدعان ، من غير ما يتكلم ولا يطلع بيانات ولا يقول حرف.
كمان واحد من المقربين لمحمد نفى القصة دي خالص ، وقال : فراج وبسنت في دبي بيقضوا إجازة والأتنين زي الفل مفيش حاجة من الكلام ده.
محمد وبسنت اتجوزوا السنة اللي فاتت وفرحهم كان قالب الدنيا وعملوه في فندق كبير في الغردقة وحضره نجوم كتير
قصة محمد فراج وبسنت بقالها حوالي 6 سنين ، وهي قالت انها في الاول مكنتش بطيقه لكن بعد كدا اكتشفت انه حد لذيذ وبدا يبقى في كيميا بينهم بعد اتقابلوا في لوكيشن تصوير مسلسل تحت السيطرة اللي شارك فيه فراج.
وبعدها ظهروا مع بعض على السجادة الحمرا في مهرجان الجونة السينمائي وكان واضح اوي الانسجام بينهم ، وبعدها اعلنوا انهم اتخطبوا وبدأ الجمهور يعرف قصتهم.
واتأخر جواز محمد فراج وبسنت شوقي ، شوية عن المعاد اللي كانوا محددينه وده بسبب الظروف اللي عشناها بسبب كورونا ، وكمان وقتها فراج كان بيصور اعمال جديدة خدت كل وقته ، وكان منها مسلسل لعبة نيوتن مع منى ذكي اللي كسر الدنيا في رمضان.
وبعد ما الدينا راقت اتجوز فراج وبسنت في مايو 2022، وهما من اكتر الكابلز المحبوبة في الوسط الفني والجمهور كان متابع قصتهم بشكل كبير.
اما بقى عن الشغل ، فانهاردة تم الاعلان عن برمو فيلم ” فوي” لمحمد فراج ونيللي كريم ، واللي ظهر فيه اعمى ، وقالوا ان الفيلم متاخد عن احداث حقيقية وده تاني عمل يجمع فراج ونيللي كريم اني بعد مسلسل تحت السيطرة.
ده طبعا غير اننا كلنا مستنين عرض الجزء التاني من مسلسل الغرفة 207 اللي ابدع فيه فراج من كام شهر ولسة متسنين الباقي.
وبسنت شوقي كان اخر حاجة شوفناها فيها دورها في مسلسل علاقة مشروعة رمضان اللي فات مع ياسر جلال و مي عمر.
