فنانين يترعبوا من حاجات عادية.. شيرين عبدالوهاب كرهت المدارس ويحيى الفخراني رفض مشهد بسبب فار وأحمد السقا نفس المعاناة.
الجمهور في الغالب يرسم صورة مثالية عن النجوم المفضّلين لهم، لكن في الآخربتطلع الصورة المرسومة خطأ وإن مثلًا الفنان الذيي يضرب ويعمل أكشن ده يطلع في الآخر عنده فوبيا ويخاف منها مبيخافش منها عيل صغير مثلًا.
وفي التقرير اللي معانا ده هنقولكم على النجوم اللي بتلازمهم فوبيا غريبة بيعانوا منها في حياتهم، رغم إن كلمة “فوبيا” تُعتبر تعب نفسي بس هما كشفوا عن الحاجات دي عادي ولا همهم حد.
الأسانسير
نيكول سابا بتخاف من الأسانسير لدرجة إنها كل ما تكبر مش تحلى وبس لأ تخاف أكتر كمان ومش بس كده ده عندها استعداد تطلع أدوار عالية على رجليها عادي لدرجة إنها طلعت 15 دور على السلالم بس حالفة ما تطلع في أسانسير ولا تخطي عتبته، وكمان بتخاف من الأماكن المغلقة بس عادي بتتعايش مع الموضوع ده يعني لما بتركب طيارة مثلًا بتعرق جدًا وبتحس بخوف جامد بس مع الوقت بتعدي الأمور.
الفار وسنينه
تخيلوا نجم الأكشن في مصر واللي الجمهور بيعتبره الأول ويمكن الوحيد في النوعية دي بيخاف من الأماكن العالية إزاي يا جدع ده بينط في الأفلام من أماكن مرتفعة عادي ياسيدي ماشي التمثيل حاجة وبيضغط على نفسه عشان التصوير ويتحمل بس في فيلم أفريكانو شكله تعب المخرج معاه لما نط في المية وساب التصوير.
وفي الحقيقة بقى ميقدرش يقف في أدوار عالية ويبص ولا ينط في الحقيقة، استنوا ده كمان بيخاف من الحشرات وظهر في برنامج مع أروى وكانت جايباله فار وقتها قالها استهدي بالله متخرجيهوش واتريق على نفسه وقال مش بخاف منها بس بعمل لها حساب.
تخيلوا بقى إن الفنان الكبير يحيى الفخراني اللي معروف عنه رزانته وهدوئه وده كمان واضح في أعماله يخاف من الفران زي نجم الأكش هو في إيه يا جماعة صلوا على النبي كده وقولوا كلام غير ده، بس لأ الفار ليه قصة معاه في التصوير وكان عنده مشهد ينام على فرن ويعدي من جنبه الفار ووقتها رفض يعمل المشهد.
القطة
مين يتخيل إن القطة اللي بتكون عادية جدًا لما بتكون مصاحبة صاحبها ووفية معاه يعني قط بيتي عادي يتخاف منه ليه عايز أفهم، ده بقى اللي بيخاف منه الفنان حسن الرداد، ومش بس كده ده بيخاف يمشي على البلاط وده بعد ما وقع مرة واتجرح في وشه وده استدعى يتخيط 3 غرز.
الأرانب
الغريبة بقى إن أمير كرارة اللي عنده فوبيا عمل مقلب في أمينة خليل وهي ضيفته في برنامجه وهوب جابلها أرنب وهو عارف إنها بتخاف منهم وعندها فوبيا وقالتله حرام عليك يا أمير أنا طول عمري مش بحبهم جابولي أرنب وأنا صغيرة ومعنديش فكرة حصله إيه بس أهو في يوم من الأيام راح طيب إيه بقى اللي بيعاني منه أمير نفسه.
ده حيوان أليف
وهو شايف إن الناس بتربط الأمور وبتشوف إنه نجم الأكشن مينفعش يخاف طيب هو بيخاف من إيه مش هتصدقوا والله عنده فوبيا من الكلاب وقال إنه مش ضامن إنه ميتعضش منه لدرجة إن لو كلب اللي هو حيوان أليف عادي لو دخل الاستوديو هيسيب المكان ويطلع يجري، ورغم كده في كلبين عنده في البيت بتوع ولاده ولكن هو ملوش دعوة بيهم خالص.
زلزال 1992
وكان الزلزال اللي حصل في مصر سنة 1992 هو السبب في إن شيرين عبدالوهاب يكون عندها فوبيا من المدارس وبتمشي منها عشان بتحس إن المدرسة هتقع عليها وهي جوه الفصل، وقالت كرهت المدرسة وكرهت إني أقعد على تختة، وكمان بتعاني من فويبا ركوب الطيارة وبسبب كده بتاخد مهدئات عشان تعرف تكمل الرحلة.
فوبيا كوميدية
زي ما الفنان أحمد عيد كوميديان جامد الجمهور بيحبه كانت الفوبيا اللي بيعاني منها بردوا غريبة ومضحكة وكوميدية زيه كده في حد يخاف من اللحوم آه هو قال إنه بقى عنده خوف تكون اللحمة مش حلوة ومخلوطة وعشان كده قطع الشك باليقين ومبقاش ياكلها أصلًا.
