مثلها مثل كثير من الشخصيات التي تظهر على السوشيال ميديا وتختفي، في وقت من الأوقات ظهرت بنت من العدم، قالت كلام ليس له أي معنى، ولكن نصيبها إنه تحول بين يوم وليلة تريند، وهي فعلت مثل محمد عامل نظافة محل الكشري، ، ولكن الفرق بينها وبينه إنها جميلة المظهر.. هي سندس عبدالهادي.
من فترة كدة ظهرت بنت على السوشيال ميديا في مقطع فيديو وهي بتتكلم كمداخلة مصورة لواحد من المواقع، وهي بتحكي عن مشاكلها الشخصية، واللي كانت لافتة للانتباه في ظل الظروف اللي الناس بتمر بيها.
البنت دي هي سندس عبدالهادي، وكانت خارجة من الجامعة يومها، ووقفوها عشان يصوروا معاها، فبدأت تحكي عن مشاكلها واللي هي إنها مش عارفة تروح الساحل، وإن الجونة مفيهاش مواصلات وحاجات من دي، وكان المثير للانتباه هنا كمان مش بس اللي بتقوله ولكن كمان طرية كلامها.
سندس بتمط الكلام بطريقة غريبة شوية، ولكن مع صوتها الناعم وطريقتها في الدلع ماشي الحال، وفي ناس سمتها «دلوعة مصر»، وده عشان طريقتها، المهم بقى سندس بدأت تعمل فيديوهات تتكلم عن نفسها، وبعدين تعمل فيديوهات بتتكلم في أي حاجة، وشوية تطلع بترقص مع صحابها.
نقطة صحابها دي بقى تنقلنا لجزء تاني، وهو إن انتشر فيديو ليها وهي بتتكلم زينا عادي سبحان الله، ولا بتمط في الكلام ولا أي حاجة، ولكن كان في بنت تاني في الفيديو اسمها علياء، هي اللي بتقوم بالمهمة دي بدالها بقى، عشان نفهم من هنا إن سندس سارقة شخصية صاحبتها.
سندس طول الفيديو اللي بتتكلم فيها عادي زي الناس، كانت بتنفي عن نفسها تهمه إن هي بتقلد علياء، اللي هي بتتكلم بنفس أسلوب سندس اللي إحنا نعرفه، وفضلوا يتخانقوا في الفيديو، وفي الآخر اتقال إن سندس دي شخصية «فيك» وكل اللي بتعمله على الناس ده تمثيل، طب ما هو تمثيل طبيعي يا جماعة، سواء كانت علياء ولا سندس الاتنين بيحوروا يعني.
ولكن الناس تعاطفت مع سندس لأنها كانت لسة البنت الدلوعة في نظرهم، وكمان لأن بقى عندها متابعين كتير وشباب قاعدين يعاكسوها ومعجبين بيها وكل واحد منهم فاكر إنه لما يكتبها تعليق بيبن مدى إعجابه بيها هتحبه مثلا.
المهم سندس بدأت بقى تعمل حسابات على مواقع التواصل واللي بتحقق مشاهدات بالملايين، وهي كلها بتقدم محتوى تافه، شوية بتحط ميك أب وشوية بترقص وشوية بتهرج مع صحابها، وشوية بتتخانق مع الناس اللي بيعاكسوها، وساعات تحكي عن مشاكلها اللي مالهاش لزمة دي.
وكنا طول الوقت بنلاقي فيديوهات سندس موجودة، ولكن لأنه حالة زي حالات كتير حتى لو طولت شوية، الناس مع الوقت نسيت سندس، وبرغم إنها لسة بتنزل بوستات، وعندها متابعين كتير، لكن مبقاش ليها نفس الرواج اللي كان موجود الأول.
وظهرت في برنامج صبايا الشمس مع الإعلامية ريهام سعيد، وقالت إن هي مصرية مية مية، وإنا باباها لوا متقاعد، ومامتها فنانة وممثلة وشاعرة ودرست حقوق، وإن عندها 6 إخوات هي أصغرهم.
ومن الكلمات المشهورة ليها واللي هي معروفة بيها “كدة كدة ساحل”، “مفيش حد في الدونيا”، “مشهور أوي في نفسك يا واد يا بوبيلر”.
أخيرا نقول الحمد لله إنها لسة مقدرتش تقتحم مجال الفن زي كتير من الناس اللي بتظهر على السوشيال ميديا، لأن العملية مش ناقصة يعني.
