نحن في أيام خير والناس تحب تعمل الخير بزيادة، فتخيل عندما تجد سيدة في الشارع تقول لك أنها لا تجد الطعام، بالطبع أنك لن تنتظر لحظة وستعطيها ما في جيبك.
بس عمرك فكرت ان الست اللي قدامك دي مليونيرة ومعاها فلوس تعيشك انت وأهلك مرتاحين، اهو ده اللي حصل بالحرف مع الشحاتة المليونيرة..نصباية جديدة من قلب القاهرة تخليك تضرب كف على كف!
“أرملة ومعايا 3 بنات ومحتاجة مساعدة يا جماعة بالله عليكوا ساعدوني ولو لقمة فايضة منك تساعدني ده انا مش معايا أكل عيالي ولا ليا أب ولا أم ولا أخ ولا أخت”
دي بداية حدوتة شحاتة القاهرة الجديدة اللي قعدت في الشارع تنادي على اللي رايح واللي جاي عشان تطلب منه المساعدة لأنها غلبانة يا ولداه ومحدش من المسؤولين معبرها.
والصراحه الست ادت الشغلانه بكل اتقان: مره تزعق بعلو الصوت عشان تسمع الكل، ومرة توطي صوتها عشان تستعطفهم لغاية ما انتشر ليها فيديو على الفيسبوك والناس متضايقة من وجودها في المكان.
وهنا بقى الداخليه قامت بالواجب لان أجهزة الامن فحصت الفيديو عشان تعرف مكانها بالظبط وفعلا راحت جابتها عشان نكتشف المفاجأة:
الست دي أصلا من مركز منيا القمح في محافظة الشرقية، ومن فترة كده لفت على جيرانها ومعارفها من أهالي القرية عشان تجمع منهم مبالغ كبيرة، قال إيه هتشغلهم في تجارة الأجهزة الكهربية.
وللأسف الناس صدقتها وقدرت تلم منهم 6 مليون جنيه مرة واحدة بس مقدرتش تسدد اللي عليها، وفي المقابل الأهالي مسكتوش ورفعوا عليها قضايا نصب، فالست تعمل إيه؟
خدت ديلها في أسنانها وقالت يافكيك عشان تهرب لمحافظة الاسماعيلية وتستخبي هناك عن عيون الحكومة والناس لغاية ماتشوف هتعمل ايه.
وفعلا بعد شوية تفكير، قررت تنزل القاهرة عشان تشحت في شوارعها وتحديدا في مدينة نصر والتجمع الخامس: مناطق الناس فيها متريشة ومعاهم قرشين حلوين يعني كل يوم هتعرف تطلع بمبلغ محترم.
و ياريتها اكتفت بالقعدة في الشارع، دي لبست النقاب عشان تبان متدينة وتصعب على الناس اكتر فتجمع مبالغ أكبر ، وهي اللي اعترفت بلسانها وهي بتقول: انا كنت بلبس النقاب علشان الناس تفتكر إني متدينة وبروح التجمع ومدينة نصر، وأحكي حكايتي بصوت عالي علشان أجمع فلوس وأنا بحكي حكايتي، وكنت باستخدام أسلوب الصوت العالي علشان ألفت نظر الناس ليا.
وفعلا النيابة لما دورت ورا الست دي بعد القبض عليها، اكتشفت انها هربانة من أحكام في 35 قضية نصب، بس برضه في سؤال محير: شحاتة القاهرة الجديدة عملت ايه بال6 مليون؟ هل خسرتهم في التجارة فعلا؟ ولا مخبياهم في مكان معين؟ محدش عارف لغاية دلوقتي.
بس الأكيد ان قصتها انتشرت على الفيسبوك عشان الناس تسميها بالشحاتة المليونيرة، وناس تانية تستغرب من جرأتها: ازاي تبقى هربانة من أحكام وتنزل العاصمة تشوف نصباية جديدة؟
انتوا بقي موقفكم إيه بعد ماعرفتوا حكاية شحاتة القاهرة الجديدة؟ وهل الللي عملته يخليك ترفض تساعد الناس في الشارع بعد كده ولا انت هتطلع اللي فيه النصب وتسيب كل واحد لنيته؟
