لا يوجد شخص فى منطقة ” عنيزة” السعودية إلا ويعرفه، محبوب لدرجه فوق الوصف، يعيش من 40 سنه هناك، عندما سافر عمل فى تربية الغنم، وأصبح متقن لهجة السعوديين لدرجه إن كنت لاتعرفه ستقول إنه واحد منهم.
مين الحاج سعد ده ؟ .. ليه السعوديين بيحبوه قوى كده ؟ .. وليه هوا رافض ينزل مصر تانى بقاله 40 سنة؟ .. كل ده وأكتر هنعرفه مع بعض فى الفيديو ده.
بطل الفيديو اللى معانا ده أسمه الحاج سعد الصياد أبو هانى، فى السعودية كل اللى يعرفه بيقوله يا سعد، سعد لوحدها كده من غير أى تكاليف ولا حاجه، هما يعتبروا الراجل ده أخوهم وواحد منهم، عاش الحاج سعد في السعودية من أكتر من 40 سنه، أو ماسافر الراجل هناك كان شغال في رعاية الغنم وخلافة، وفضل على الحال ده فتره لحد ما أمور أتيسرت وبقى يشتغل في التجاره عند الكفيل بتاعه، الكفيل اللى أنتهت حياته من فتره ومن بعدها والحاج سعد قاعد مع أولاده، الراجل الكبيرة اللى كفل الحاج سعد أول مانزل السعودية كان موصى أولاده أنه لما حياته تنتهى هما ياخدوا بالهم من الحاج سعد ويراعوه كويس، كان معتبره واحد من عياله وليه عنده حق.
الحاج سعد عنده خفة ظل فوق الوصف، أول ماتسمع الحاج سعد بيتكلم لازم هتضحك على كلامه وأسلوبه الفكاهى الظريف، وده اللى مخلى أهل منطقة ” عنيزه” فى السعودية متمسكين بيه قوى وكل شويه واحد يروح يقعد معاه ويزوره، بيحبوا يسمعوا كلام الحاج سعد وحكاويه القديمة مع الكفيل بتاعه وحكايات زمان.
دى حتى اللهجة السعودية اتقنها الحاج سعد قوى لدرجه أنه لو ماتعرفش أنه مصرى هتقول عليه سعودى، ده سعودي أب وأم كمان، ماهوا بقى بيتكلم زيهم بالظبط، نفس الصوت ونفس طريقه الكلام، ده بقى بيهزر مع المصريين اللى هناك فى السعودية ويفهمهم فى الأول أنه سعودى وبعدين يقولهم الحقيقة.
الحاج سعد دلوقتى بقى واحد من أهل منطقة “عنيزة” السعودية، بقى واحد من أهل المنطقة للدرجة الكافية انه بيشارك فى كل المناسبات العامه فيها، مافيش فرح ولا حزن إلا وتلاقى الحاج سعد موجود، واقف جنب أهل “عنيزه” كأنه واحد منهم وعشان كده بيحبوه قوى ومقدرينه جدا، و بيحبوا يقعدوا معاه ويشاركهم أفراحهم وجلساتهم الخاصة، الحاج سعد بقى عارف أهل المنطقة واحد واحد، مفيش واحد فى “عنيزة” مايعرفوش، حتى الأولاد الصغار يعرفهم كلهم بالأسم وهما كمان يعرفوه من كلام أبهاتهم عليه وأجدادهم.
الحاج سعد دلوقتى رافض يرجع لمصر نهائي، شايف أنه من أهل السعودية وأهلها هما ناسه اللى بيخافوا عليه وبيخاف عليهم لدرجة أنه شايف أنه هيفارق الحياة لو مشي ده حتى عايز يدفن فيها.. محبة كبيرة قوي بين الحاج سعد وأهل منطقة “عنيزة” في السعودية للدرجه اللى مخلياهم هما كمان مش عايزين يسيبوه يرجع مصر، متمسكين بيه جدا .. تفتكروا أنتم الحاج سعد يرجع مصر ولا لأ ؟ يسيب حب أهل المنطقة دول كلهم ويرجع ولا يكمل فى السعودية؟.. أكتبوا أراكم فى التعليقات.
