لقاء مشردة فيصل حياتها انتهت، البنت التى قضت كثير من عمرها تنام فى الشارع، رغم أن أبوها يقال عنه أنه رجل غنى.نهاية حزينة للقاء الشهيرة مشردة شارع فيصل البنت التى كلكم تابعتوا قصتها خلال السنين الماضية
إيه اللى حصل للقاء في آخر أيامها ؟ امتى وفين البنت انتهت حياتها ؟ .. كل ده وأكتر هنعرفه مع بعض في الفيديو.
في البداية كده لازم كلنا نترحم على لقاء وندعوا لها أن ربنا يرحمها ويرزقها الجنه، لقاء بنت شارع فيصل، البنت اللى عيونها ملونه و بريئه زي الملايكه .. البنت اللى قضت أوقات كتير من حياتها في الشارع على الرغم من أبوها يقال انه كان رجل غن.
البنت دى عرفنا من شويه ان حياتها انتهت، انتهت فجأة وبدون أي مقدمات، مرة واحدة وصلنا خبر من دار الرعاية اللى كانت فيها أن روحها طلعت، البنت اللى معروف عنها انها لسه صغيره مكملتش 30 سنة روحها طلعت.
إيه السبب في كده ؟
مفيش معلومة أكيدة لسه بالسبب في كده، بس كل اللى نعرفه انها كانت مصابة بالمرض الخبيث وكان ليها في الممنوعات.
طيب ليه بنت في سنها يحصل معاها كل ده ؟
اللى ممكن يفسر كده فعلاً هى الأوقات والأزمات اللى مرت بيها البنت في الشارع، لقاء شوفنا ليها كتير فيديوهات وصور على السوشيال ميديا، كلها بتحكي أن البنت لفترات طويلة كانت عايشه تايهة فى الدنيا، بتمشى في شوارع منطقة فيصل وتنام تحت الكبارى، وقت ما يجيها النوم تنام، وقت ماتجوع بتتصرف وتاكل اي حاجه.
لحد ما ربنا كرمها أول مرة بسيده فاضله من فيصل شافت البنت وشافت المضايقات اللى بتحصل معاه في الشارع فقررت تاخدها عندها الشقه تضايفها وتاخد بالها منها، الست شافت ان لقاء بنت كويسه شكلها بنت ناس وغريبه عنها قوي البهدله اللي هي فيها دى.
ماهو مش معقول العيون الملونه والملامح البريئه الجميله دى تنام في الشارع وتتساب للشباب يضايقوها في الرايحه والجايه، فقررت الست تاخدها عندها لحد ماتعرف أهلها مين و سايبينها كده ليه .
خلال الفتره دى تدخلت أكثر من جهة عشان تساعد لقاء ويحاولوا يشوفوا حل للأزمات اللى مرت بيها وأثرت عليها وخلت وضعها بقى سئ للغاية، وقتها قررت دار رعاية أنها تاخد لقاء عندها تشوف حالتها ايه ويساعدوها هما بمعرفتهم، وده حصل فعلاً البنت راحت معاهم أول مرة وفضلت في دار الرعاية لفترة، طول الفتره دى كان بيحاول العاملين في الدار أنهم يرعوها ويساعدوها تتعافى من كل المشاكل والأزمات النفسية اللى كانت عندها، نجحوا فى كده نسبياً بس بعدها البنت قررت ترجع للشارع مره تانيه، ماتعرفش هي حالتها بقت كده ليه ولا ايه بالظبط اللى مرت بيه.
على العموم هى خرجت فعلا من دار الرعايه بدون علم أصحاب الدار والمشرفين عليها، اللى لما عرفوا أعلنوا أنها مشيت وبلغوا اهلها، ودلوقتي أعلنوا خبر رحيلها المفاجئ.
لقاء روحها طلعت وهي عند أهلها في الشرقيه، من 4 ايام بالظبط حصل اللى حصل، وتم الصلاة عليها يوم الجمعة اللى فات، ويقال إن فيه مرض غريب هو السبب في اللى حصلها.
ترحموا على لقاء ياجماعه، ادعولها ربنا يرحمها ويرزقها الجنه، دي بنت عانت كتير قوي في الشارع وحصلها أزمات صعبة جداً على اي حد يمر بيها.
